ބިލެއްދޫއަށް ރައީސް ދެއްވީ ބިން ހިއްކެން އޮތް އެންމެ ބޮޑުކޮށް ހިއްކައިދޭނެކަމުގެ ޔަގީންކަން

ފ. ބިލެއްދޫގެ ބިން ހިއްކެން އޮތް އެންމެ ބޮޑަކަށް ހިއްކަވައިދެއްވާނެ ކަމުގެ ޔަގީންކަން ރައީސް ޑރ. މުޙައްމަދު މުޢިއްޒު ދެއްވައިފިއެވެ.

ރައީސް އެފަދައިން ވިދާޅުވީ އެމަނިކުފާނު އަތޮޅުތެރެއަށް ކުރައްވަމުންގެންދަވާ ދަތުރުފުޅުގެ ތެރެއިން ނިލަންދެ އަތޮޅު އުތުރުބުރީގެ ބިލެއްދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

އެގޮތުން އެރަށުގެ ތަރައްގީގެ މަޝްރޫއުތަކުގެ ވާހަކަ ހިއްސާކުރައްވަމުން ރައީސް ވިދާޅުވީ، ބިލެއްދޫއަށް ގެންނަ ތަރައްގީގެ ކޮންމެ މަޝްރޫއަކީ ވެސް ރައްޔިތުން، އެ ދާއިރާއަކުން ނުހަނު އެދިއެދި ތިބި މަޝްރޫއުތަށް ކަމަށެވެ.

އެގޮތުން ސިއްޚީ ދާއިރާއިން ސިއްޚީ މަރުކަޒު، ފުލުހުންގެ ޚިދުމަތް ޤާއިމްކުރުން، ކުޅިވަރާއި ފިޓްނެސް، މަގު ހެދުމާއި އަދި ބަނދަރު ހެދުމަކީ ވެސް ނުހަނު މުހިންމު ކަންކަންކަމަށް ރައީސް ވިދާޅުވިއެވެ. އެގޮތުން ބަނދަރުގެ މަސައްކަތަށް އިޝާރަތްކުރައްވަމުން ރައީސް ވިދާޅުވި ގޮތުގައި، ބަނދަރުގެ މަސައްކަތް ސަރުކާރުން ކުރިޔަށްގެންދާނީ ވީހާ ވެސް ބޮޑަށް، ބަނދަރުގެ ބޭނުން ހިފޭނެ ގޮތަށް ޖާގަ ތަނަވަސްކޮށްގެންނެވެ.

ބަނދަރުގެ ވާހަކަ ދައްކާއިރު އަޅުގަނޑު ދޭނެ ޔަގީންކަމަކީ އިރާދަކުރެއްވިއްޔާ މި ފެށޭ މަސައްކަތަކީ މި ރަށުގައި ބަނދަރު އެކި ގޮތްގޮތުން ފުޅާކުރުން ނޫނިއްޔާ ޖާގަ ތަނަވަސްކުރުން. އެގޮތަށް ބޮޑަށް ދަންނަވަން ބޭނުންވަނީ. ޖާގަ ތަނަވަސްކުރެވެން އޮތް އެންމެ ފުޅާމިނެއްގައި ޑިޒައިނަށް ގެނެވޭނެ ބަދަލުތަކެއް ގެނެސްގެން. ރައްޔިތުންގެ އެކްސްޕެކްޓޭޝަންއަށް ވީއެންމެ ފުޅާމިނެއްގައި ނުވަތަ އުންމީދުތައް އެދޭ މިންވަރު ޙާސިލްކޮށްދިނުމުގައި ބަނދަރު އަޅުގަނޑުމެން ހަދާނީ މިދެންނެވި ގޮތަށް ވިސްނައިގެން. ވީހާވެސް ބޮޑަކަށް ރައްޔިތުން އެދޭގޮތަށްކަމުގެ ފުރިހަމަ ޔަގީންކަން އަޅުގަނޑު ދެން.

ރައީސް ޑރ. މުޙައްމަދު މުޢިއްޒު

އެއާއެކު ބަނދަރާއި ރަށުގެ ބިން ހިއްކުން ގުޅިލާމެހިފައިވާކަން ފާހަގަކުރައްވަމުން ރައީސް ވިދާޅުވީ، އެ ރަށުގެ ބަނދަރާއި އެކު އެ ރަށުގެ ބިން ވެސް ހިއްކެން އޮތް އެންމެ ބޮޑަކަށް ހިއްކަވައިދެއްވާނެ ކަމަށެވެ.

އެގޮތުން ތިމާވެށީގެ ރައްކާތެރިކަމަށްޓަކައި ފަޅުން ދޫކުރަންޖެހޭ ޖާގައެއް އޮންނަ ކަމަށާއި، އެ ޖާގައިން ބާއްވަންޖެހޭ ވަރު ބޭއްވުމަށްފަހު، ދެން އޮތް ބައި އެއްކޮށް ހިއްކަވައިދެއްވާނެ ކަމަށް ރައީސް ވިދާޅުވިއެވެ. އަދި އެމްޓީސީސީން އެ ރަށުން ފައިބާނީ އެ މަސައްކަތްތައް ކޮށް ނިންމުމުން ކަމަށް ވެސް ރައީސް ވަނީ ވިދާޅުވެފައެވެ.

ހަމައެއާއެކު ޖާގަ އިތުރުކުރުމަށް، ބިން ބޮޑުކުރުމަށް މި ރަށުގެ ފަޅުތެރެއިން ހިއްކެން އޮތް އެންމެ ބޮޑުމިނަކަށް ހިއްކައިދިނުމުގެ މަޝްރޫއެއް މި ބަނދަރު މަޝްރޫއާ ގުޅިގެން އަޅުގަނޑުމެން ގެންގޮސްދޭނެ ކަމުގެ ޔަގީންކަން ތިބޭފުޅުންނަށް ދެން. ފަރުގެ އެންމެ އެޖުން ފެށިގެން އެންވަޔަރަމެންޓަލް ޕްރޮޓެކްޝަން ޤަވާއިދުތަކުގެ ތެރެއިން ދޫކުރަންޖެހޭ ޖާގަ އޮވޭ ކޮންމެ ރަށެއްގައި ވެސް. އެއީ ރައްކަލަކަށްޓަކައި، ޤުދުރަތީ ގޮތުން ކުރަންޖެހޭ ކަމެއް. އެހެންވީމާ އެ ޖާގަ އެންމެ ކުޑަމިނުން ބާއްވަންޖެހޭ ވަރަށް ބާއްވާފައި ރަށަށް ބިން އިތުރުކުރެވޭނެ އެންމެ ބޮޑު މިނަށް ބިން އިތުރުކޮށްދޭނެ ވާހަކަ މި ދެންނެވީ. އެންމެ މެކްސިމަމް ރަށަށް ބިން އިތުރުކުރެވެން އޮތް މިންވަރަށް ކޮށްދޭނަން. އެ ޔަގީންކަން ދެން.

ރައީސް ޑރ. މުޙައްމަދު މުޢިއްޒު

ރައީސް އެފަދައިން ވިދާޅުވިއިރު، ބިން ހިއްކުމާއި ބަނދަރުގެ އަޕްގްރޭޑްގެ މަސައްކަތުގެ އިތުރުން، އިތުރު ބައެއް މަޝްރޫއުތަކެއް ވެސް މިއަދު އެ ރަށުގައި ވަނީ ފަށާފައެވެ. އެގޮތުން ޕޮލިސް ސްޓޭޝަނުގެ މަސައްކަތާއި، ސިއްޚީ މަރުކަޒުގެ އައު އިމާރާތުގެ މަސައްކަތުގެ އިތުރުން، އެ ރަށުގައި ބަހައްޓާ ބީއެމްއެލްގެ ޚިދުމަތް ވެސް މިއަދު ވަނީ ފަށާފައެވެ.