މާލޭ މަގުތައް ހެދުމުގެ މަސައްކަތް ދަނީ ކުރިއަށް؛ ޑިޒައިން އެންޑް ސާވޭ ޓީމް މިމަހު އަންނާނެ: މުއްޠަލިބު

ޗައިނާ ސަރުކާރުގެ ހިލޭ އެހީއާއެކު މާލޭގެ މަގުތައް ހެދުމަށް ވެފައިވާ އެއްބަސްވުމާ އެއްގޮތަށް އެ މަސައްކަތް ބާރަށް ކުރިއަށްދާ ކަމަށާަ، އެގައުމުގެ ސަރުކާރުންނާއި، ރާއްޖޭގެ ސަރުކާރުންވެސް އެ މަސައްކަތް ލަސްކުރުމަށް މަސައްކަތް ނުކުރާ ކަމަށް މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް ޑޮކްޓަރ ޢަބްދުالله މުއްޠަލިބް ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި ‏ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް (ކުޑޫ) ވަނީ އެ މަޝްރޫޢު ކުރިއަށް ނުދާކަން ފާހަގަކުރައްވައި، އޭގެ ސަބަބު އޮޅުން ފިލުއްވަން ވަޒީރާ ސުވާލުކުރައްވާފައެވެ.

އެ ސުވާލަށް ޖަވާބު ދެއްވަމުން ވަޒީރު މުއްޠަލިބު ވިދާޅުވީ، ހިލޭ އެހީއާއި، ލޯން އެހީއާއި، ދައުލަތުގެ ބަޖެޓުން ޚަރަދުކޮށްގެން ކުރިއަށް ގެންދާ ޕްރޮޖެކްޓް ތަކަކީ މުޅިން ތަފާތު އުސޫލު ތަކެއްގެ ދަށުން ތަފާތު ގޮތްގިތަށް ކުރިއަށް ގެންދާ ޕްރޮޖެކްޓް ތަކެއް ކަމަށެވެ.

ދުނިޔޭގެ ކޮންމެ ގައުމެއްގެ ވިޔަސް، ހިލޭ އެހީގައި ކުރިއަށްގެންދާ ޕްރޮޖެކްޓް ތަކަކީ އެގައުމެއްގައި ކަނޑައަޅާފައި އޮންނަ އުސޫލުތަކާ ގަވާއިދުތަކުގެ ތެރެއިން ކުރިއަށްދާ މަޝްރޫޢުއެއް. ރައީސް މުޢިއްޒު ޗައިނާއަށް ކުރެއްވި ފުރަމާނަ ދަތުރުފުޅުގެ ތެރެއިން ހަމަޖެހިގެން އިއުލާން ކުރެއްވި މާލޭ މަގުތައް ހެދުމުގެ މަޝްރޫޢު އޭރުއްސުރެ ފެށިގެން ޗައިނާއިން ހިލޭ އެހީ ދިނުމަށް ކަނޑައަޅާފައިވާ އުސޫލުތަކަށް މަސައްކަތްތައް ކުރިއަށް އެބަދޭ

މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް ޑޮކްޓަރ ޢަބްދުالله މުއްޠަލިބް

އެގޮތުން މީގެ ކުރިންވެސް ޗައިނާއިން ދޭ ހިލޭ އެހީގެ ދަށުން މީގެ ކުރިންވެސް ކުރިއަށް ގެންދެވުނު މަޝްރޫޢުތައް ކުރިއަށް ގެންގޮސްފައިވާނީ، އެ ޕްރިޖެކްޓޭއްގެ ފީޒިބިލިޓީ ސްޓަޑީޒް ސްޓޭޖް ނިންމައި، ސާވޭ ޑިޒައިން ސްޓޭޖް ނިންމުމަށްފަހު ކޮންސްޓްރަކްޝަން ސްޓޭޖާ ހަމައަށް ދިޔުމަށްފަހުގައި ކަން ފާހަގަކުރެއްވިއެވެ.

މިއިން ކޮންމެ ސްޓޭޖެއްގައިވެސް ޗައިނާގައި ޓެންޑާ ކުރެވިގެން ވަކި ބަޔަކު ހޮވައިގެން އެބަޔަކު އައިސް މަސައްކަތްކޮށްފައި އަނެއް ސްޓޭޖަށް ދިޔުމަށްޓަކައި އެއްބަސްވުމެއްގައި ސޮއިކޮށްގެން އަބަދުވެސް ކުރިއަށްދަނީ. އެ އުސޫލުން މަގުހެދުމުގެ މަޝްރޫޢުވެސް ކުރިއަށްދަނީ.

މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް ޑޮކްޓަރ ޢަބްދުالله މުއްޠަލިބް

މަގު ހެދުމުގެ މަސައްކަތުގެ އަދާހަމަ ދެއްވަމުން ވަޒީރު އިތުރަށް ވިދާޅުވީ، ފީޒިބިލިޓީގެ މަސައްކަތް މިހާރު ނިމިފައިވާ ކަމަށާ ސާވޭ ޑިޒައިން ކުރާނެ ބަޔަކު ހޮވާފައިވާ ކަމަށެވެ. އަދި ސާވޭ ޑިޒައިންކުރާ ޓީމު މި މަސްތެރޭގައި ރާއްޖެ އަންނާނެ ކަމަށާ، އެ މަސައްކަތް ނިމުމުން ކުރިއަށް ހުރި މަސައްކަތް ކުރުމަށް ބަޔަކު ހޯދުމަށް ޗައިނާގައި ޓެންޑާ މަރުހަލާ ކުރިއަށް ގެންދާނެ ކަމަށާ، މަސައްކަތަށް ކޮންޓެކްޓަރު ކަނޑައެޅުމުން އެ މަސައްކަތް ކުރިއަށް ދާނެ ކަމަށް  ވިދާޅުވިއެވެ.

ވަޒީރު ވިދާޅުވީ މަސައްކަތް ލަސްކުރަން ޗައިނާއިން އަދި ރާއްޖެއިންވެސް މަސައްކަތް ނުކުރާ ކަމަށާ، އޭގެ ބަދަލުގައި ސަރުކާރުން މިހާރުވެސް އަންނަނީ ކުރެވެން ހުރި މަސައްކަތެއް ކޮށްގެން މާލޭ މަގުތަކުގެ ޖާގަ ތަނަވަސްކޮށް ރައްޔޮތުންނަށް ފަސޭހަ ކޮށްދެއްވަން ކަމަށެވެ.