އުސޫލުން ބޭރުން އަމިއްލަ ކުންފުނިތަކަށް މަޝްރޫއުތައް ދޭންފެށީ އެމްޑީޕީ ވެރިކަމުގައި: އުމަރު

އުސޫލުން ބޭރުން އަމިއްލަ ކުންފުނިތަކަށް ސަރުކާރުގެ މަޝްރޫޢުތައް ދިނުމުގެ ކުޅިވަރު ފެށީ އެމްޑީޕީގެ ވެރިކަމުގައިކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި އުމަރު ވިދާޅުވީ ރައްޔިތުންގެ މަޖިލިސް މެންބަރުންނައި ޕާޓީ މީހުންނަށް ސަރުކާރުން ކޮންޓްރެކްޓްތައް ދިނުމުގެ "ކުޅިވަރު ފެށުނީ" 2010 ވަނަ އަހަރު ކުރީގެ ރައީސް ނަޝީދުގެ ވެރިކަމުގައި ކަމަށެވެ. އެގޮތުން ޕާޓީގެ ގާތް މީހުންނަށް މަޝްރޫޢުތައް އޭރު ބަހާލާފައިވާކަން އުމަރުގެ ޕޯސްޓްގައި ވަނީ ފާހަގަކޮށްފައެވެ.

އެއިރެއްގައި އޮންނަ ސަރުކާރާ ގާތްމީހުންނަށް މަޝްރޫޢުތައް ދިނުމަކީ ދެމިގެންއައި ސަގާފަތެއްކަން ފާހަގަކުރައްވަމުން އުމަރު ވިދާޅުވީ މިއަދުވެސް ކަންކަން ހިނގަނީ ހަމަ އެމަގުންކަމަށެވެ.

[މަޖިލިސް މެންބަރުންގެ ކުންފުނިތަކަށް މަޝްރޫއުތައް ހަވާލުކުރުމުގެ މަސައްކަތް ފެށުނީ] ރައީސް ނަޝީދުގެ ވެރިކަމުގައި އެއިރުގެ މަޖިލިސް މެންބަރު ރީކޯ މޫސާ މަނިކުގެ ކުންފުނި ހެވީ ލޯޑަށް 20 މިލިއަން ޑޮލަރަށް އެވޯޑް ކުރެވުނު ތިލަފުށީ ބިން ހިއްކުމުގެ ޕްރޮޖެކްޓާއެކުއެވެ. މިކަން ނިމުނީ ޕްރޮޖެކްޓް ފެއިލްވެ، އެހެން ޕާޓީއެއް ސަރުކާރަށް އައުމާއެކު ރީކޯ މޫސާ ޕާޓީ ބަދަލުކުރައްވައި، އެކަމުގެ އިނާމަކަށް ބަދަލުގެ ގޮތުގައި ލ. އަތޮޅުގެ ބޮޑުހުރާ، ފަރެސް އަދި ކުޑަފަރެސް ހަމަ އެ ކުންފުންޏަށް ދީގެންނެވެ.

ކުރީގެ ހޯމް މިނިސްޓަރު އުމަރު ނަސީރު

އުމަރު ވިދާޅުވީ ސަރުކާރުން ކުންފުނިތަކަށް ހަވާލުކުރި ކަންކަން ކުރިއަށްދާނޭކަން އޭނާ ގަބޫލުނުކުރައްވާކަމަށާއި، އެކަން ފެނިގެންދާނޭކަމަށެވެ.

އުމަރު އެފަދައިން ވިދާޅުވިއިރު، މާލިއްޔަތުގެ ގަވާއިދަށް ގެނައި ބަދަލާއި އެކު، ކޮންޓްރެކްޓާ ފައިނޭންސް އުސޫލުން ހިންގުމަށް ޕްރައިވެޓް 53 ކުންފުންޏަކާއި އެކު 206 އެއްބަސްވުންތަކުގައި ސަރުކާރުން ސޮއިކޮށްފައިވަނީ މިދިޔަ ބުރާސްފަތި ދުވަހުއެވެ. އެ ދުވަހު ސަރުކާރުން އެ ކުންފުނިތަކާއި އެކު ސޮއި ކުރި އެއްބަސްވުންތަކުގެ ޖުމްލަ އަގަކީ 2.7 ބިލިއަން ރުފިޔާއެވެ.ޓާ ފައިނޭންސް އުސޫލުން ހިންގުމަށް ޕްރައިވެޓް 53 ކުންފުންޏަކާއި އެކު އެއްބަސްވުންތަކުގައި ސަރުކާރުން ސޮއިކުރުމާއި ގުޅިގެން އިދިކޮޅު އެމްޑީޕީން ވެސް ވަނީ ކަންބޮޑުވުން ފާޅުކޮށްފައެވެ.

އެގޮތުން ސަރުކާރުން ބޭނުންވާ ބަޔަކަށް މަންފާ ހޯދައި ދޭން ހަވާލުކުރި މަޝްރޫއުތަކުގެ މައްސަލަ އެމްޑީޕީގެ ވެރިކަމެއްގައި ބަލައި ފިޔަވަޅު އަޅާނެ ކަމަށް އެ ޕާޓީން ބުނެފައިވެއެވެ.

އެހެން ނަމަވެސް ބުރާސްފަތި ދުވަހުގެ އެ ޖަލްސާގައި ރައީސް ޑރ. މުޙައްމަދު މުޢިއްޒު ވިދާޅުވި ގޮތުގައި، ސަރުކާރުން 206 އެއްބަސްވުން ހަވާލުކުރި ހުރިހާ ކުންފުންޏަކީ ވެސް  ތިން އަހަރުގެ ދުވަހުގެ "އޮޑިޓެޑް ފައިނޭންޝަލް ސްޓޭޓްމަންޓް" ހުށަހަޅައިފައިވާ ކުންފުނިތަކެވެ. އަދި އެކުންފުނިތަކާއި އެ މަސައްކަތްތައް ހަވާލުކޮށްފައިވަނީ  މާލިއްޔަތު ގަވާއިދުގެ ތެރެއިން ކަމުގެ ޔަގީންކަން އެ މަނިކުފާނު ދެއްވައިފައިވެއެވެ.

އެގޮތުން އެ ސްޓޭޓްމަންޓު ހުށަހަޅައިގެން ނޫން ގޮތަކަށް އެ އިން އެއްވެސް ކުންފުންޏަކުން މިއަދު ސޮއިކުރި މޭޒާ ހަމައަށް ވެސް ނާދެވޭނެ ކަމަށް ވެސް އެމަނިކުފާނު ވިދާޅުވެފައިވެއެވެ.