ދުންފަތާ ދުރުވެ ޞިއްޙަތު ރައްކާތެރިކުރަން ފަސްޓް ލޭޑީ ގޮވާލައްވައިފި

ދުންފަތުގެ އިސްތިޢުމާލުކުރާ ހުރިހާ ފަރާތްތަކުން އެ އާދައާ ދުރުވެ ޞިއްޙަތު ރައްކާތެރިކުރުމަށް ސާބިތު ފިޔަވަޅެއް އެޅުމަށް ފަސްޓް ލޭޑީ ސާޖިދާ މުޙައްމަދު ގޮވާލައްވައިފިއެވެ.

ދުނިޔޭގެ ދުންފަތުގެ އިސްތިޢުމާލު ނުކުރާ ދުވަސް ފާހަގަކުރުމަށް މ. މުލަކު ސްކޫލް ހޯލުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ފަސްޓް ލޭޑީ ވިދާޅުވީ، ޤައުމީ ދުންފަތާ ދެކޮޅު ކެމްޕެއިން ފެށުމަކީ ރާއްޖޭގައި ދުންފަތުގެ އިސްތިޢުމާލު މަދުކުރުމަށް އެޅޭ ވަރަށް މުހިންމު ފިޔަވަޅެއް ކަމުގައެވެ.

އަދި މި ކެމްޕެއިންގެ ސަބަބުން މި އަހަރުގެ ދުންފަތުގެ ދުވަހުގެ ޝިޢާރުގެ މެސެޖުތައް އިތުރަށް ވަރުގަދަވެ ދެމެހެއްޓެނިވި ބަދަލެއް ގެނައުމަށް އެހީވާނެ ކަމުގެ ޔަޤީންކަން އެބައޮތް ކަމަށް ވިދާޅުވިއެވެ. މީގެ އިތުރުން ދުންފަތުގެ ވަބާއިން މުޖުތަމަޢު ރައްކާތެރިކުރުމުގައި ކެފޭ ރެސްޓޯރެންޓް އަދި އެހެނިހެން ވިޔަފާރިތަކުން ނަމޫނާ ދައުރެއް އަދާކުރުމަށް ވެސް އެ ކަމަނާ ގޮވާލެއްވިއެވެ

މި ޖަލްސާގައި ފަސްޓް ލޭޑީ ވަނީ "އެންޓި-ޓޮބެކޯ ކެމްޕެއިން: ޓައިމް ޓު ކުއިޓް" ކެމްޕެއިންގެ ލޯގޯ ރަސްމީކޮށް އިފްތިތާޙުކުރައްވައިފައެވެ. މި ކެމްޕެއިނަކީ 2026 ވަނަ އަހަރުގެ މެއި މަހުގެ 31 ވަނަ ދުވަހު އިޢުލާނުކުރި ފަސް އަހަރު ދުވަހުގެ ޤައުމީ މަޝްރޫޢެކެވެ. އެ ކަމަނާ ވަނީ ލައިވް ކެންވަސް ހަރަކާތެއްގައި ބައިވެރިވެވަޑައިގެން ދުންފަތާ ނޫނެކޭ ބުނުމަށް ގޮވާލާ ޕްލެޖް ބޯޑެއްގައި ސޮއިކުރައްވައިފައެވެ.

މި ރަސްމިއްޔާތުގައި ދުންފަތް ކޮންޓްރޯލްކުރުމުގައި ފާހަގަކޮށްލެވޭ ޚިދުމަތްކޮށްފައިވާ ފަރާތްތަކަށް ދެއްވާ ހެލްތް މިނިސްޓަރުގެ އެވޯޑް ލިބޭ ފަރާތްތައް ވެސް އިޢުލާނުކޮށްފައިވެއެވެ. ޖަލްސާއަށް ފަހު ފަސްޓް ލޭޑީ ވަނީ މުލަކު ސްކޫލުގެ ދަރިވަރުން ދުންފަތުގެ ދުވަހާ ގުޅިގެން ތައްޔާރުކުރި ޕޯސްޓަރު މުބާރާތުގެ ހުށަހެޅުންތައް ބައްލަވާލައްވައި ވަނަ ހޯދި ދަރިވަރުންނާ އެކު ފޮޓޯ ނަންގަވައިފައެވެ.

މި ރަސްމިއްޔާތުގައި ހެލްތް މިނިސްޓަރު ގީލާ ޢަލީ ޔޫތް މިނިސްޓަރު ޢަބްދުﷲ ރާފިޢު ޑަބްލިޔުއެޗްއޯ ގެ ރާއްޖެ ރެޕްރެޒެންޓެޓިވް ޕެއިޑެން އަދި މުލަކު ދާއިރާގެ މެންބަރު އިބްރާހީމް ނައުފަލް ބައިވެރިވެވަޑައިގެންނެވިއެވެ. ފަސްޓް ލޭޑީ ވަނީ މި ދަތުރުފުޅުގައި މ. މުލަކު ފިޓްނެސް އެންޑް ރެކްރިއޭޝަން ސެންޓަރު ވެސް ރަސްމީކޮށް ހުޅުއްވައިދެއްވައިފައެވެ. ކޮންމެ މީހުން ދިރިއުޅޭ ރަށެއްގައި ފިޓްނެސް ސެންޓަރާއި އައުޓްޑޯ ޖިމް ޤާއިމުކުރެއްވުމަކީ ރައީސް ޑރ. މުޙައްމަދު މުޢިއްޒުގެ ވަޢުދުފުޅެކެވެ.