އަޅުގަނޑުގެ ގޭގައި ދަމާފައި ހުރި އިންޑިޔާ އައުޓް ބެނާ ހޯދައިގެން، އެ އަލުން ދަމާނަން: ރައީސް ޔާމީން

އެމަނިކުފާނުގެ ގެކޮޅުގައި ދަމާފައިހުރި “އިންޑިޔާ އައުޓް” ބެނާ ފުލުހުންގެ އަތުން ހޯދައިގެން އެ ބެނާ އަލުން ގޭގެ ބޭރުގައި ދަމާނެ ކަމަށް ކުރީގެ ރައީސް އަބްދުالله ޔާމީން އަބްދުލްގައްޔޫމް ވިދާޅުވެއްޖެއެވެ.

ރައީސް ޔާމީން ޖަލުން މިނިވަންވެ ވަޑައިގެން ނޫސްވެރިންނަށް ރޭ ދެއްވި ފުރަތަމަ ބަސްދީގަތުމުގައި އެމަނިކުފާނު ވިދާޅުވީ، މީގެ ކުރިން ޕީޕީއެމް/ ޕީއެންސީގެ ބޭފުޅުން “އިންޑިޔާ އައުޓް” ގޮވި ނަމަވެސް މިއަދު އެ ވާހަކަ ދައްކާ އަޑު ނީވޭ ކަމަށެވެ.

އަދި ކުރީގެ ރައީސް، އިބްރާހީމް މުހައްމަދު ޞާލިހުގެ ގަރާރަކުން އިންޑިޔާ އައުޓް ހަރަކާތް ހުއްޓުވާފައި ވާއިރު، އެ ގަރާރު ނެރެވޭނެ ކަމަށް އެއްވެސް ދިވެހި ރައްޔިތަކު ގަބޫލު ނުކުރައްވާ ކަމަށް ޔާމީން ވިދާޅުވިއެވެ. އެހެން ނަމަވެސް، އަދިވެސް އެ ގަރާރު ބާތިލް ނުކުރެވޭ ކަމަށް ވިދާޅުވިއެވެ.

އަޅުގަނޑުމެން އެންމެން އިދިކޮޅުގައި ތިބި އިރުން ފެށިގެން ދެއްކި ވާހަކައެއް،  އިންޑިޔާ އައުޓް ގަރާރަކީ ގަނޫނާ ޚިލާފަށް ނެރުއްވި ގަރާރެއް ކަމަށް. ހުރިހާ ލޯޔަރުން އެއްބަސްވޭ. އެކަމު މި ސަރުކާރު، އަޅުގަނޑުމެންގެ ސަރުކާރު އައިއްސަ އޭތި ދިފާއު ކުރަނީ ކީއްވެގެންހެއްޔޭ. ކީއްވެގެން ހެއްޔޭ މިހާރު އިންޑިޔާ އައުޓް ނުހިންގިގެން މިއުޅެނީ.

ކުރީގެ ރައީސް އަބްދުالله ޔާމީން އަބްދުލްގައްޔޫމް

މިއާއެކު އިންޑިޔާ އައުޓް ކެންޕެއިން ކުރިއަށް ގެންދަވަން ނުކުންނަވާނަންތޯ ކުރެއްވި ސުވާލަކަށް ޖަވާބު ދެއްވަމުން ރައީސް ޔާމީން ވަނީ އެއީ ޝައްކެއްވެސް އޮތް ކަމެއް ނޫން” ކަމަށް ވިދާޅުވެފައެވެ. ޔާމީން ވިދާޅުވި ގޮތުގައި، އެމަނިކުފާނުގެ ސިޔާސީ ގަބޫލުކުރުންތަކާއި އުސޫލުތަކަށް ބަދަލެއް ނާދެއެވެ. އަދި މިއަދު އެމަނިކުފާނު ކިރައްވާނެ ކަމަކީ، އެމަނިކުފާނުގެ ގެކޮޅުގައު ދަމާފައި ހުއްޓާ ފުލުހުން އައިސް ނެންގެވި ބެނާ ހޯއްދަވައިގެން އެ ބެނާ އަލުން އެ ގޭގެ ބޭރުގައި ދެމުން ކަމަށްވެސް ވިދާޅުވިއެވެ.

މާދަމާ، (މިއަދު) ކުރަން ނިންމާފައި އޮތް ކަމަކީއަޅުގަނޑުމެން ގޭގައި ދަމާފައި އޮތް އިންޑިޔާ އައުޓް ބެނާ، ފުލުހުން ވަނީ ގެންގޮއްސަ. އެ ހޯދުމުގެ މަސައްކަތް މާދަމާ ކުރާނީ. ކޯޓަށް ވަންނާނަން. ފުލުހުންނަށް ފުރަތަމަ ލިޔާނީ އެ ބެނާ ދޭށޭ. ދެން އިތުރު އެއްޗެއް ޚަރަދު ނުކޮށް އެ ބެނާ ދަމާލެވުނިއްޔާ ރަނވަޅުވާނެ ދެއްތޯ

ކުރީގެ ރައީސް އަބްދުالله ޔާމީން އަބްދުލްގައްޔޫމް

ދިވެހިރާއްޖޭގައި އިންޑިޔާ ސިފައިން ތިބުމާއި ދެކޮޅަށް ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައި އިދިކޮޅުން ފެށި އިންޑިޔާ އައުޓް ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމުގައި ބުނެ ޞާލިހު ނެރުއްވި ގަރާރާއި ގުޅިގެން މާލެ އާއި ރާއްޖޭގެ އެކި ކަންކޮޅުތަކުގައި ދަމާފައި ހުރި އިންޑިޔާ އައުޓް ބެނާތައް ފުލުހުން ވަނީ ނަގާފައެވެ. އެގޮތުން ރައީސް ޔާމީންގެ ގެކޮޅުގައި ދަމާފައި ހުރި ބޮޑު ބެނާވެސް ފުލުހުން ނެގިއެވެ.