ގެއްލުނު ތިން މީހުން ހޯދަން ބޭރުގެ އެހީ ހޯދަނީ

ހުވަދޫ ކަނޑަށް ސަޕްލައި ދޯންޏެއް ބަންޑުން ޖަހާލައި ހިނގި ހިތާމަވެރި ހާދިސާގައި ގެއްލުނު ތިން މީހުން ހޯދުމުގެ އޮޕަރޭޝަނަށް ބޭރުގެ އެހީތެރިކަން ހޯދަމުންދާކަމަށް ފޮރުން މިނިސްތްރީން ބުނެފިއެވެ.

ދިވެހި ހާރިޖިއްޔާއިން ބުނީ ސޯޝަލް މީޑިއާގައި ހިއްސާކުރި ޕޯސްޓެއްގައި ބުނެފައިވަނީ، އުޅަނދާ ގުޅޭގޮތުން ބޭނުންވާ ފަންނީ އެހީތެރިކަން ހޯދުމަށް ރާއްޖޭގެ ބައިލެޓަރަލް ޕާޓްނަރުންނާއެކު ދަނީ މަޝްވަރާ ކުރެވެމުންދާކަމަށެވެ. ހާރިޖިއްޔާގެ އޮފީހުން ބުނީ، މީހުން ހޯދުމުގެ މަސައްކަތުގައި ލިބެންހުރި ހުރިހާ ވަސީލަތެއްގެ ބޭނުން ހިފައި، އެ މަސައްކަތް ހުއްޓުމެއްނެތި ކުރިއަށް ގެންދާނެކަމުގެ ޔަގީންކަން ދޭކަމަށެވެ.

ގެއްލުނު މީހުން ހޯދުމަށް ކުރަމުންގެންދާ މަސައްކަތްތަކުގައި މިހާތަނަށް ކަނޑާއި ވައިގެމަގުން 7400 އަކަ ނޯޓިކަލް މޭލްގެ ސަރަހައްދެއް ބެލިފައިވާކަމަށް އެމްއެންޑީއެފުން ވަނީ ބުނެފައެވެ. މި އޮޕަރޭޝަނުގައި އެންމެބޮޑު ސަރަހައްދެއް ބަލާފައިވަނީ ވައިގެމަގުންނެވެ.

އެގޮތުން ވައިގެ މަގުން 6112 އަކަ ނޯޓިކަލް މޭލު، ކަނޑުމަގުން 1370.10 އަކަ ނޯޓިކަލް މޭލުގެ ސަރަހައްދެއް ވަނީ ބެލިފައިވާކަމަށް އެމްއެންޑީއެފުން ބުންޏެވެ. މިހާތަނަށް ކުރެވުނު މަސައްކަތުން ގެއްލުނު މީހުންގެ ހަބަރެއް ނުވާކަމަށް އެމްއެންޑީއެފުން ބުންޏެވެ.

މި ހާދިސާގައި ގެއްލިގެން ހޯދަމުންދާ ތިން މީހުންގެ ތެރޭގައި ހިމެނެނީ ދޯނީގެ ކެޕްޓަން، މުޙައްމަދު ހަމްދޫން (35 އަހަރު)، ތ. މަޑިފުށި، މީހުން ސަލާމަތްކުރުމުގެ މަސައްކަތުގައި އެހީތެރިވާން އުޅުނު ފުލުހުންގެ ސާޖަންޓް، ޢަލީ ނާފިޢު (33 އަހަރު) އަދި އެމްއެންޑީއެފްގެ ސްޓާފް ސާޖަންޓް، އިބްރާހީމް އަހްމަދު (39 އަހަރު)އެވެ.

ސަޕްލައި ދޯންޏަށް ރާޅު އަރައި މި ހާދިސާ ހިނގިއިރު އޭގައި ތިބި 8 މީހުންގެ ތެރެއިން 7 މީހަކު ސަލާމަތް ކުރިއެވެ. މި ދޯނި ބަންޑުން ޖަހާލި ހާދިސާ ހިނގާފައިވަނީ މިދިޔަ ބުދަދުވަހުގެ ރޭ 22:37 ހާއިރުއެވެ. މި ހާދިސާ ހިނގާފައިވަނީ ލާމު އަތޮޅުން ފުރައިގެން ހުވަދު އަތޮޅަށް ހިލަޔާއި ހިލަވެލި ބަރުކޮށްގެން ދަތުރުކުރަނިކޮށް ރާޅުއަރައި ދިޔަވެގެންނެވެ.