ދުންފަތް މަނާކުރުމަކީ ބައެއް ކުށްތައް އިތުރުވާންވީ ސަބަބެއް ކަމަށް ޤަބޫލެއް ނުކުރަން: ވަޒީރު ނާޒިމް
ދުންފަތް އެތެރެކުރުމުގެ ޤަވާއިދު ހަރުކަށިކޮށް، ދުންފަތް މަނާ ކުރުމުގެ ގާނޫނަށް ގެނެވުނު ބަދަލުގެ ސަބަބުން ކުށްއިތުރުވާ ކަމަށް ގަބޫލުނުކުރައްވާ ކަމަށް ހެލްތު މިނިސްޓަރު އަބްދުالله ނާޒިމް ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް، ވަނީ ދުންފަތް މަނާކުރުމުގެ ގާނޫނަށް ގެނެވުނު ބަދަލުގެ ސަބަބުން ސީރިއަސް އެންޑް އޯގަނައިޒްޑް ކްރައިމް އިތުރުވެފައިވާކަން ފާހަގަކުރައްވާފައެވެ.
އެގޮތުން، ކަސްޓަމްސްގެ ބެލުމުގެ ދަށުގައި ހުރި ސިނގިރޭޓް ކޮންޓެއިނަރު ގެއްލުނު ކަމަށާ، އަދި ފުލުހުންގެ ބެލުމުގެ ދަށުގައި ހުރި ސިނގިރޭޓް ތަކެއްވެސް ގެއްލުނުކަން އޭނާ ފާހަގަކުރެއްވިއެވެ.
”ވަޒީރު ޤަބޫލުކުރައްވަންތޯ މިއީ މި ބޭން އާ ގުޅިގެން ދިމާވި ކަމެއް ކަމަށް؟“ މެންބަރު ވަޒީރު ނާޒިމްއާަ ސުވާލުކުރެއްވިއެވެ.
އެ ސުވާލަށް ޖަވާބު ދެއްވަމުން ވަޒީރު ވިދާޅުވީ، ކޮންމެ ބަދަލެއްގެ ސަބަބުންވެސް އެ ބަދަލާ ދެކޮޅަށް ބައެއް ކަންކަން ހިނގާނެ ކަމަށެވެ.
”ކޮންމެ ޗޭންޖަކީވެސް އޭގެ ސަބަބުން ރިޕާކަޝަންތަކެއް އަންނާނެ ކަމެއް. އެކަމަކު އަޅުގަނޑު ނުދެކެން ދުންފަތާ ގުޅިގެން އަޅުގަނޑުމެން މި އަޅަމުން އަންނަ ފިޔަވަޅުތައް އެއީ ކްރައިމްސްތައް އިތުރުވާންވީ ސަބަބެއް ކަމެއް. އެކަމެއް އަޅުގަނޑު ޕާސަނީ ގަބޫލެއް ނުކުރަން.“ ވަޒީރު ނާޒިމް ވިދާޅުވިއެވެ.
ވަޒީރު މިހެން ވިދާޅުވެފައިވާއިރު ވަގަށް ސިނގިރޭޓާއި ވޭޕް އެތެރެކޮށް ހެޔޮ އަގުގައި އެ ވިއްކާ މައްސަލަތައް މިފަހުން ވަނީ ބޮޑުވެފައެވެ. އެފަދަ ފަރާތްތައް ޖޫރިމަނާ ކުރެވެމުންދާއިރު، ވަގަށް އެތެރެ ކޮށްގެން ހިފަހައްޓާފައި ހުންނަ ސިނގިރޭޓް ފަދަ ތަކެތި ބައެއް ފުލުހުންނާއި ކަސްޓަމްސްގެ މުވައްޒަފުންގެ ބައިވެރި ވުމާއެކު ”ގެއްލޭ“ މައްސަލަތައްވެސް އަންނަނީ ފެންމަތިވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
