ފެބްރުއަރީ 14ގައި 11136 ފަތުރުވެރީން އައި، އެއީ ރެކޯޑެެއް

ރާއްޖޭގެ ތާރީހުގައި އެއް ދުވަހެއްގައި އެންމެ ގިނަ ފަތުރުވެރީން ރާއްޖެ އައިސްފައިވަނީ މިދިޔަ ފެބްރުއަރީ މަހުގެ 14 ވަނަ ދުވަހު ކަމަށް ފަތުރުވެރިކަމާއި ބެހޭ ވަޒީރު ތޯރިގް އިބްރާހިމް ވިދާޅުވެއްޖެ އެވެ.

ވަޒީރު, އެކަން ހާމަކުރެއްވީ މިއަދު ރައީސުލްޖުމްހުރިއްޔާގެ އޮފީހުގައި އޮތް ނޫސްވެރީންގެ ބައްދަލްވުމުގަ އެވެ. ވަޒީރު ވިދާޅުވި ގޮތުގައި މިދިޔަ ފެބްރުއަރީ 14 ވަނަ ދުވަހު ރާއްޖެއަށް 11,136 ފަތުރުވެރީން އައެވެ. އެއީ ތާރީހީ ރެކޯޑެއް ކަމަށް ވިދާޅުވި އެވެ.

މި އަހަރުގެ މިހާތަނަށް ރާއްޖެއަށް އެންމެ ގިނަ ފަތުރުވެރީން އައީ ޗައިނާ އިންނެވެ. ޗައިނާ އަކީ މި ފަހުން ރާއްޖޭގެ އެއް ނަންބަރު މާކެޓެވެ. މި އަހަރުގެ ފުރަތަމަ ދެ މަސް ދުވަހު އެ ގައުމުން ވަނީ 74,792 ފަތުރުވެރީން ރާއްޖެ އައިސްފަ އެވެ.

ދެން އެންމެ ގިނައީ ރަޝިޔާގެ ފަތުރުވެރީންނެވެ. ފެބްރުއަރީ 26 ގެ ނިޔަަލަށް އެ ގައުމުން ވަނީ 51,858 ފަތުރުވެރީން ރާއްޖެ އައިސްފަ އެވެ. ތިންވަނާގައި އޮތީ އިޓަލީ އެވެ. އެ ގައުމުން 44,343 ފަތުރުވެރީން ރާއްޖެ އައިސްފައިވެ އެވެ. އިނގިރޭސިވިލާތުން 42,092 ފަތުރުވެރީން އައިސްފައިވާއިރު ޖަރުމަނުން 27,880 ފަތުރުވެރީން އައިސްފައިވެ އެވެ.

ފްރާންސް އިން 16,843 ފަތުރުވެރީން އައިސްފައިވާއިރު އަވައްޓެރި އިންޑިއާއިން ވަނީ 16,395 ފަތުރުވެރީން އައިސްފަ އެވެ.

ވަޒީރު ފާހަގަކުރެއްވި ގޮތުގައި ރާއްޖެއަށް އެންމެ ގިނައިން ފަތުރުވެރީން ޒިޔާރަތްކޮށްފައިވާ 10 ގައުމުގެ ތެރޭގައި ޔޫރަޕްގެ ހަތް ގައުމެއް ހިމެނެ އެވެ. ދެން އެންމެ ގިނައިން ފަތުރުވެރީން އަންނަނީ އޭޝިޔާގެ ބައްރުންނެވެ.

ފަތުރުވެރީންގެ ސާވޭއެއް, 80 އިންސައްތަ ހިތްހަމަޖެހޭ

ވަޒީރު ވިދާޅުވި ގޮތުގައި 2025 ވަނަ އަހަރުގެ ޑިސެންބަރު މަހުގެ ތެރޭގައި ރާާއްޖެއަށް ޒިޔާރަތްކުރި ފަތުރުވެރީންނަށް އަމާޒުކޮށް ވަނީ ސާވޭއެއް ކުރިއަށް ގެންގޮސްފަ އެވެ.

މި ސާވޭގައި ބައިވެރިވި 80 އިންސައްތަ މީހުން ރާއްޖޭގައި ހޭދަކުރި ޗުއްޓީއާމެދު ވަރަށް ބޮޑަށް ހިތްހަމަޖެހޭ ކަމަށް ވަނީ ބުނެފަ އެވެ. އަދި 90 އިންސައްތައަށް ވުރެ ގިނަ މީހުން އަލުން އެނބުރި އަންނަން ބޭނުންވާ ކަން ވަނީ ހާމަކޮށްފަ އެވެ.

މިއީ 2019 ވަނަ އަހަރުގެ ފަހުން މިފަދަ ސާވޭއެއް ކުރިއަށް ގެންދެވުނު ފުރަތަމަ ފަހަރުގައި ވަޒީރު ވިދާޅުވި އެވެ.