އައްޑޫ ލިންކު ރޯޑު އޮތީ ވަރަށް ހާލުގައި؛ މަރާމާތު ކުރަން 400 މިލިއަން ޚަރަދުވާނެ: ޑރ. މުއްޠަލިބު

އައްޑޫ ލިންކު ރޯޑަކީ ކޮންމެހެންވެސް ހަދަންޖެހޭ ތަނެއް ކަމަށާ، އެ މަގު ރަނގަޅު ފެންވަރެއްގައި މަރާމާތު ކުރަން 400 މިލިއަނެއްހާ ރުފިޔާ ހޭދަވާނެ ކަމަށް އިންފްރާސްޓްރަކްޗާ މިނިސްޓަރު ޑރ. އަބްދުالله މުއްޠަލިބު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަށް ޖަވާބު ދެއްވަމުން މުއްޠަލިބު ވިދާޅުވީ، އައްޑޫ ލިންކު ރޯޑަކީ ވަރަށް ހާލުގައި އޮތް މަގެއް ކަމަށާ އެ މަގު ކޮންމެހެންވެސް ހަދަންޖެހޭ ކަމަށެވެ.

އެގޮތުން ސަރުކާރުން މެޝިނަރީ ހޯދައިގެން ހަގީގަތުގައި އެ މަގަށް އެކަނިވެސް އަޅުގަނޑުމެންގެ އަންދާޒާއަކީ 400 ވަރަކަށް މިލިއަން ރުފިޔާ ދާނެއޭ ރަނގަޅު ފެންވަރަކަށް ހަދާ ކަމަށް ވަންޏާމުން.

އިންފްރާސްޓްރަކްޗާ މިނިސްޓަރު ޑރ. އަބްދުالله މުއްޠަލިބު

އެހެންކަމުން އެ މަޝްރޫޢު ވީ އެންމެ ޚަރަދު ކުޑަކޮށް، ސީދާ ކޮސްޓް ޕްރައިޒްގައި ކުރިއަށް ގެންދިޔުމަށް، މެޝިނަރީޒް ހޯދުމަށްފަހު އާރްޑީސީއާ ހަވާލުކުރެއްވި ކަމަށް މުއްޠަލިބު ވިދާޅުވިއެވެ. އަދި މަގު ސާފުކުރުމުގެ މަސައްކަތް ކުރިއަށް ގެންދާކަންވެސް ފާހަގަކުރެއްވިއެވެ.

އެހެންނަމަވެސް އައްޑޫ ރައްޔިތުން ބޭނުންވަނީ ތާރު އަޅާފައި ރައްޔިތުންނަށް ފަސޭހަވާނެ ގޮތެއް ހެދުން. އެހެންވީނާ މަސައްކަތް އެބަކުރަން އެ މަސައްކަތް އަވަސްކުރެވޭނެ ގޮތެއް ހޯދަން އެހެން ބަޔަކާ ހަވާލުކޮށްގެން، ސީދާ. ލިންކު ރޯޑުގެ މަސައްކަތް އެކަނި، ތާރުއެޅުމުގެ މަސައްކަތް ބަޔަކާ ހަވާލުކޮށްގެން ނަމަވެސް.

އިންފްރާސްޓްރަކްޗާ މިނިސްޓަރު ޑރ. އަބްދުالله މުއްޠަލިބު

ވަޒީރު ވިދާޅުވީ އައްޑޫ ލިންކު ރޯޑުގެ މަސައްކަތަކީ ޚަރަދު ބޮޑު މަސައްކަތަކަށްވުމުން ވީހާވެސް ޚަރަދު ކުޑަކޮށް ކުރުމަށް ސަރުކާރުން މަސައްކަތް ކުރާ ކަމަށާ، އެ މަގު ނޫން އެހެން މަގުތައް އާރްޑީސީން ކުރިއަށް ގެންދާ ގޮތަށް ބާއްވައި، އެމަގުގެ މަސައްކަތް ބަޔަކާ ހަވާލުކޮށްގެން ކުރިއަށް ގެންދަން މަސައްކަތް ކުރައްވާ ކަމަށެވެ.

އައްޑޫ ލިންކް ރޯޑަކީ 2003 ގައި ބޭނުން ކުރަން ފެށި މަގެކެވެ. ފާއިތުވި މުއްދަތުގެ ތެރޭގައި އެމަގު ވަރަށް ބޮޑަށް ހަލާކުވެ، އެކި ފަހަރުމަތިން މަރާމާތުކުރި ނަމަވެސް މަގުގެ ހާލަތު އޮތީ ވަރަށް ދަށްކޮށެވެ. އައްޑޫގެ ބޮޑު އާބާދީއެއް 24 ގަޑިއިރު އެމަގު ބޭނުންކުރާއިރު ނުރައްކާތެރި އެތައް ހާދިސާތަކެއް ވަނީ ހިނގާފައެވެ. ބައެއް ހާދިސާތަކުގައި އެތައް ބައެއްގެ ފުރާނަ ގެއްލިގެން ގޮސްފައިވެއެވެ.

އައްޑޫގެ ލިންކު ރޯޑު ޒަމާނީ ފެންވަރަށް ތަރައްޤީކުރުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން، އާރުޑީސީއާ ހަވާލުކުރީ މިދިޔަ އަހަރުގެ އޭޕްރީލް މަހުގެ ތެރޭގައެވެ.

ލިންކް ރޯޑު ތަރައްޤީކުރުމުގެ މަސައްކަތުގެ ދަށުން ޖުމްލަ 12.3 ކިލޯމީޓަރުގެ ސަރަހައްދެއް ޒަމާނީ ފެންވަރަށް ތަރައްޤީކުރާނެއެވެ. އަދި ސީޓީބީ އަޅާފައިވާ 67.58 ކިލޯމީޓަރުގެ މަގުގައި ތާރު އެޅުމުގެ މަސައްކަތްވެސް ކުރިއަށްދާނެކަމަށް މީގެ ކުރިން އާރްޑީސީން ވަނީ ބުނެފައެވެ.