އެމްޑީޕީގެ ފަލްސަފާ ޤަބޫލުކުރި ދުވަސްތައް މާޒީވެ ހިނގައްޖެ: އަބްދުއްރަހީމް
އިދިކޮޅު އެމްޑީޕީގެ ފަލްސަފާ ރައްޔިތުން ޤަބޫލުކުރި ދުވަސްތައް މާޒީވެ ހިނގައްޖެކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަޙީމް އަބްދުالله ވިދާޅުވެއްޖެއެވެ.
ރާއްޖޭގެ ސިޔާސީ މަޝްރަހް މިހާރު ހުރިގޮތާ ބެހޭގޮތުން އެމްއެމްޓީވީގައި ވާހަކަދައްކަވަމުން އަބްދުއްރަހީމް ވިދާޅުވީ، އެމްޑީޕީން ވެރިކަމަށް އައިސް ދެން ކަންތައްވީގޮތް ރައްޔިތުންނަށް ވަރަށް ރަނގަޅަށް އެނގޭކަމަށެވެ. އެގޮތުން ޤައުމަށް އާމްދަނީ ލިބޭ ތަންތަނުގެ ހިއްސާ ބޭރުގެ ފަރާތްތަކަށް ވިއްކާލިއިރު، ލޯނު ނަގަން ދެން ހުރި ތަންތަން ރަހުނުކުރިކަން އަބްދުއްރަހީމް ފާހަގަކުރެއްވިއެވެ.
އަބްދުއްރަހީމް ވިދާޅުވީ އެންމެ ފުރަތަަ އެމްޑީޕީއަށް ވެރިކަން ލިބިގެން ކަންކަން ވެގެންދިޔަގޮތް އަދިވެސް ރައްޔިތުން ހަނދާން ހުއްނާނޭކަމަށެވެ. އެގޮތުން 12.42 ރޭޓްގައި އޮތް ޑޮލަރު ރޭޓް ބޭންޑެއް އެޅުވުމުގެ ނަތީޖާއެއްގެ ގޮތުން ޑޮލަރެއްގެ އަގު 16 ރުފިޔާއަށް އަރައިގެން ދިއުމާއި ތަކެތީގެ އަގުތަކާއި، އަސާސީ ހިދުމަތްތަކުގެ އަގުތަކުގެ އަގުތައް މައްޗަށްގޮސް މުޒާހަރާކުރުމަށް މަގުމައްޗަށް ނިކުންނަން ޖެހުނުކަމަށް އަބްދުއްރަހީމް ވިދާޅުވިއެވެ.
އެމްޑީޕީގެ ގޮވާލުމަށް ރައްޔިތުން މިހާރު އިޖާބަނުދެނީ މާޒީގައި ކަންކަން ވެ ދިޔަގޮތުންކަމަށް އޭނާ ވިދާޅުވިއެވެ.
ތަކެތީގެ އަގު ބޮޑުވަނީ ރައްޔިތުން ހަނާވަނީގެ ނަމުގަ އަޅުގަނޑުމެން ނިކުތީ. އެއީ މަޖުބޫރުވެގެން ނިކުތީ. ކަރަންޓުގެ އަގުބޮޑުވެގެން އަޅުގަނޑުމެން ނިކުތީމު. މިއަދުގަ އެއްކަލަ އެމީހުން ގޮވާދީމަ ނުނިކުނަނި ކީއްވެގެން؟ އެއީ ރައްޔިތުންނަށް އެނގޭ އޭރާއި މިއަދުގެ ތަފާތު. އެއީ ނުނިކުނަ ސަބަބަކީ
ޕީއެންސީގެ ޗެއާޕާސަން އަބްދުއްރަޙީމް އަބްދުالله
އަބްދުއްރަހީމް ވިދާޅުވީއެމްޑީޕީ ސަރުކާރުގައި ތަންތަން އެޅުމަށް އެކިފަރާތްތަކާ ހަވާލުކުރުމުގެ ކަންކަން ވަރަށް ބާރަށް ކުރިއަށްދިޔަނަމަވެސް އެއްވެސް މަސައްކަތެއް ކުރިއަށް ގޮސްފައިނުވާކަމަށެވެ. އަދި ޤާނޫނާ ހިލާފަށް ފައިސާ ޗާޕުކޮށް ދަރަނި އިންތިތިހާއަށް ނެގިއިރު، ބަދަލުގައި ދައުލަތުގެ ބައިތުލްމާލަށް އާމްދަނީއެއް ލިބޭނޭފަދަ ގޮތަކަށް ކަންކަން މެނޭޖް ކުރެވިފައި ނުވާކަން އަބްދުއްރަހީމްގެ ވާހަކަފުޅުގައި ފާހަގަކުރެއްވިއެވެ.
އަބްދުއްރަހީމް ވިދާޅުވީ އަދުގެ ސަރުކާރުން މިދިޔަ މަހެއްހާ ދުވަހުގެ ތެރޭގައި ރެކޯޑް އަދަދަކަށް ދަރަނި އަދާކުރިއިރު، ދަރަނިތައް އަދާކޮށްފައިވަނީ ބޭރުގެ އެއްވެސް ފަރާތަކުން ފައިސާ ނުހޯދައިކަމަށެވެ. އެގޮތުން ރައީސް ޑރ.މުހައްމަދު މުއިއްޒުގެ ސަރުކާރުން އެހާބޮޑު ދަރަންޏެއް އަދާކުރީ ދައުލަތުގެ ބައިތުލްމާލަށް ލިބޭ އެއްޗަކުން ހަރަދުތައް މެނޭޖްކޮށްގެންކަމަށް އަބްދުއްރަހީމް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
