މަގު ކޮނުމުގެ މަސައްކަތް ކުރާއިރު ކަރަންޓު ވިއުގައަށް ގެއްލުމެއް ނުލިބޭނެ ގޮތަށް ކުރުމަށް ސްޓެލްކޯއިން އެދިއްޖެ

ޢިމާރާތްކުރުމާއި މަގު ކޮނުމުގެ މަސައްކަތްތައް ޒިންމާދާރުކަމާ އެކު ކުރިއަށް ގެންދިއުމަށް ސްޓެލްކޯއިން އެދިއްޖެއެވެ.

ހުޅުމާލޭ ފުރަތަމަ ފިޔަވަހީގައި ބިންކޮނުމުގެ މަސައްކަތެއްގެ ތެރޭގައި ހައިވޯލްޓޭޖް ކޭބަލަކަށް ގެއްލުންވެ އިއްޔެ އެ ސަރަހައްދުން ކަރަންޓުގެ ޚިދުމަތް ވަނީ މެދު ކެނޑިފައެވެ.

ކަރަންޓު ކެނޑެން މެދުވެރިވީ ކުރެދިމާ ހިނގުމުގައި އަމިއްލަ ފަރާތަކުން ހިންގި ޢިމާރާތްކުރުމުގެ މަޝްރޫޢެއްގެ ތެރެއިން ބިން ކޮނުމުގައި ބިމުގެ އަޑީގައި އޮތް ހައިވޯލްޓޭޖް ކޭބަލަކަށް ލިބުނު ގެއްލުމުގެ ސަބަބުން ކަމަށް ސްޓެލްކޯއިން ބުނެފައިވެއެވެ.

މީގެ ކުރިން މިދިޔަ ބުރާސްފަތި ދުވަހު ވެސް މިފަދަ ހާދިސާއެއް ހިނގައި ފުރަތަމަ ފިޔަވަހީގެ ބައެއް ސަރަޙައްދުތަކުން ކަރަންޓުގެ ޚިދުމަތް ކެނޑިފައިވާ ކަން ސްޓެލްކޯއިން ވަނީ ފާހަގަކޮށްފައެވެ.

ކައިރިކައިރީގައި މިފަދަ ހާދިސާތައް ތަކުރާރުވެ ކަރަންޓު ވިއުގައަށް ގެއްލުން ލިބެމުން ދިއުމަކީ ޢާންމު ރައްޔިތުންނަށް ބޮޑެތި ދަތިތައް ކުރިމަތިވާ ކަމެއް ކަމުގައި ސްޓެލްކޯއިން ފާހަގަކޮށްފައިވެއެވެ.

އެ ކުންފުނިން ވަނީ ޢިމާރާތްކުރުމާއި ބިންކޮނުމުގެ މަސައްކަތް ކުރާ ހުރިހާ ފަރާތްތަކުން ވެސް ބިމު އަޑީގައި އޮންނަ ކަރަންޓު ވިއުގައަށް ގެއްލުން ނުވާނެ ގޮތަށް މަސައްކަތްތައް ރާވައިގެން ކުރިއަށް ގެންދިއުމަށް އިލްތިމާސްކޮށްފައެވެ.

ފަހަކަށް އައިސް ހުޅުމާލޭގައި ޢިމާރާތްކުރުމުގެ މަސައްކަތްތަކުގެ ތެރެއިން ކަރަންޓު ކޭބަލްތަކަށް ގެއްލުންވެ ޚިދުމަތް މެދުކެނޑޭ މައްސަލަ ދަނީ ތަކުރާރުވަމުންނެވެ.