ފަރެސްމާތޮޑާ އެއާޕޯޓުގައި ކިއޮސްކެއް ހިންގާނެ ފަރާތެއް ހޯދަނީ

ފަރެސްމާތޮޑާ އެއާޕޯޓުގައި ކާބޯތަކެތީގެ ހިދުމަތްދޭ ކިއޮސްކެއް ތަރައްގީކޮށް ހިންގުމަށް ޝައުގުވެރިވާ ފަރާތްތަކަށް އެ ފުރުސަތު ހުޅުވާލައިފިއެވެ.

މިކަމާ ގުޅިގެން ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރް.އޭ.ސީ.އެލް) އިން ވަނީ ބީލަން ހުށަހެޅުމުގެ ފުރުސަތު އާއްމުކޮށް ހުޅުވާލާފައެވެ.

އާރް.އޭ.ސީ.އެލް އިން ކޮށްފައިވާ އިޢުލާނެއްގައިވާ ގޮތުން، މި މަޝްރޫޢުގެ ދަށުން ކުއްޔަށް ދޫކުރުމަށް ހަމަޖެހިފައިވަނީ ޖުމްލަ 454.13 އަކަފޫޓުގެ ސަރަހައްދެކެވެ. މީގެ ތެރޭގައި ކިއޮސްކް ތަރައްގީކުރުމަށް ކަނޑައަޅާފައިވާ 122.17 އަކަފޫޓުގެ ބިމުގެ އިތުރުން، އިހުތިޔާރީ ބައެއްގެ ގޮތުގައި ކަސްޓަމަރުން މަޑުކޮށްލައިގެން ތިބޭނެ 331.96 އަކަފޫޓުގެ ސަރަހައްދެއް ހިމެނެއެވެ.

މި މަސައްކަތަށް ޝައުގުވެރިވާ ފަރާތްތަކުން މިމަހުގެ 26 ވަނަ ދުވަހުގެ މެންދުރުފަހު 03:00 ގެ ކުރިން، ބީލަން ހުށަހަޅަން ޖެހޭނޭކަމަށް އެ ކުންފުނިން ބުނެއެވެ.

މި ކިއޮސްކަކީ އެއާޕޯޓުން ދަތުރުކުރާ ފަސިންޖަރުންނާއި އެއާޕޯޓަށް ޒިޔާރަތްކުރާ ފަރާތްތަކަށް ފެންވަރު ރަނގަޅު ކާބޯތަކެތީގެ ހިދުމަތް ފޯރުކޮށްދިނުމުގެ މަގުސަދުގައި ތަރައްގީކުރާ ތަނެކެވެ.

ފަރެސްމާތޮޑާ އެއާޕޯޓް ތަރައްޤީކުރުމުގެ މަސައްކަތް ކުރިއަށްގެންގޮސްފައިވަނީ އެމްޓީސީސީންނެވެ. މި އެއާޕޯޓަކީ، މުޅި ހުވަދު އަތޮޅަށްވެސް ދިރުން ގެނުވަދޭނެ އެއާޕޯޓަކަށް ވާނޭކަމަށް އެމްޓީސީސީން ވަނީ ބުނެފައެވެ.  ފަރެސްމާތޮޑާ އެއާޕޯޓަކީ 1200 މީޓަރު ދިގު އަދި 30 މީޓަރު ފުޅާ ރަންވޭއެއް ހިމެނޭ އެއާޕޯޓެކެވެ.