އަޅުގަނޑުމެންގެ ވެރިކަން ނިމުނުއިރު އިގްތިޞާދު އޮތީ ހަމައަކަށް އެޅި އިތުރަށް ފުޅާވެފައި: އަމީރު

އެމްޑީޕީގެ ވެރިކަން ނިމުނު އިރު، ދިވެހިރާއްޖޭގެ އިޤްތިޞާދު އޮތީ ހަމައަކަށް އެޅި އިތުރަށް ފުޅާވެފައިވާ ކަމަށް އެ ވެރިކަމުގައި ފިނޭންސް މިނިސްޓަރުގެ މަގާމުގައި ހުންނެވި އިބްރާޙީމް އަމީރު ވިދާޅުވެއްޖެެއެވެ.

ރާއްޖޭގެ އިގްތިޞާދީ ޙާލަތާއިމެދު ކަންބޮޑުވުން ފާޅުކޮށް އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި އަމީރު ވިދާޅުވީ، މި ސަރުކާރުގެ ނާގާބިލު ކަމުގެ ސަބަބުން، ރާއްޖޭގެ މާލީ ސިޔާސަތުތައް ފެއިލްވަމުންދާ ކަމަށެވެ. އަދި ރާއްޖޭގެ ދަރަނި ބޮޑުވެ، މިއިން ޒަމާނަކު ރިޒާވް ދަށް ނުވާ މިންވަރަށް ދަށްވެފައިވާ ކަމަށާ، ސަރުކާރުން މާލީ ކަންކަން ސިއްރު ކުރަމުންދާ ކަމަށްވެސް އޭނާ ވިދާޅުވިއެވެ.

މިކަން ކަމުގެ ތަފްސީލް ހާމަކުރައްވަމުން އަމީރު ވިދާޅުވީ، ނިމިދިޔަ ވެރިކަމުގައި ރާއްޖެއަށާ ދުނިޔެއަށްވެސް މިހާތަނަށް ކުރިމަތުވެފައި ނުވާވަރަށް އިގްތިޞާދީ ދަތިތަކާއި ކުރިމަތިވި ކަމަށެވެ. އެގޮތުން، ކޮވިޑްގެ ބަލި މަޑުކަމާއި، ރަޝިއާ-ޔުކްރެއިން ހަނގާމައިގެ ސަބަބުން މުޅި ދުނިޔެއަށްވެސް އިގްތިޞާދީ ބޮޑެތި ދަތިތަކަކާ ކުރިމަތިލާން ޖެހުނު ކަން އޭނާ ފާހަގަކުރެއްވިއެވެ.

އެކަމަކު އަޅުގަނޑުމެން އެކަންކަމަށް އެކަށޭނެ ފިޔަވަޅުތައް އަޅައި، އަޅުގަނޑުމެން އިގްތިޞާދު ހަމަމަގަށް އެޅުވިން. އެމްޑީޕީ ވެރިކަމުގައި މިދިޔަ ފަސް އަހަރުގައި ކޮވިޑް 19 އަދި އޭގެ ފަހުން ޔުކްރެއިން ހަނގުރާމައާއި އެކު ދިމާވި ދަތިތަކުން އަރައިގަނެ، އަޅުގަނޑުމެން ސަރުކާރު ބަދަލުވިއިރު، އިގްތިޞާދު ހަމަމަގަށް އަޅުވާފައި، 2019 ވަނަ އަހަރު، އަޅުގަނޑުމެންނާ ވެރިކަން ހަވާލުވިއިރު އޮތް އިގްތިޞާދަށްވުރެ ބޮޑު ފުޅާ އިގްތިޞާދެއް މި ސަރުކާރާ ހަވާލުވިއިރު ދިނިން

ފިނޭންސް މިނިސްޓަރ އިބްރާޙިމް އަމީރު

މީގެ އިތުރުން، ކޮވިޑާއި، ރަޝިޔާ-ޔުކްރެއިން ހަމގުރާމައިގައި ކުރިމަތިވި އިގްތިޞާދީ ޝޮކް ތަކާއެކު، ދަރަނި ނަގައިގެންވެސް އެ ގޮންޖެހުންތަކުން ސަލާމަތްވުމަށް މަސައްކަތްލކުރެއްވި ކަމަށް އަމީރު ވިދާޅުވިއެވެ.

އޭގެ ކާމިޔާބީއަކީ، 2021 ވަނަ އަހަރު ރާއްޖޭގެ އިގްތިޞާދު 42 ޕަސެންޓް ގްރޯވެ، 2023 ވަނަ އަހަރު ގާތްގަނޑަކަށް 13 ޕަސެންޓް އިގްތިޞާދު ކުރިއަރައި ދިޔަ.

ފިނޭންސް މިނިސްޓަރ އިބްރާޙިމް އަމީރު

އަމީރު މިފަދައިން ވިދާޅުވެފައިވާއިރު، މިދިޔަ ފަސް އަހަރުގައި، ދަރަނި ދެއްކުމަށްވެސް ދަރަނި ނަގައި، ފާއިތުވެދިޔަ 40 އަހަރު ސަރުކާރަކުން ނުއުފައްދާ މިންވަރަށް ދަރަނި އުފައްދާފައިވާ ކަމަށް އަދުގެ ސަރުކާރުން ބުނެއެވެ.

އެގޮތުން، މިދިޔަ ސަރުކާރު ނިމުނު އިރު ރާއްޖޭގެ ޖުމްލަ ދަރަނި 120 ބިލިއަނަށް އަރާފައިވާކަން ފާހަގަކޮށްލަންޖެހެއެވެ.