ފަނޑިޔާރުންނަށް މި ވަރަށް ނުފޫޒު ފޯރުވި އޭޖީއެއް ނުދެކެން: މަހާޒް

ދެހާސް އަށްވަނަ އަހަރުގެ ފަހުން މިހާރުގެ ބަންޑާރަ ނާއިބު އަހްމަދު އުޝާމް ފަދައިން ފަނޑިޔާރުންނަށް ނުފޫޒު ފޯރުވި ބަންޑާރަ ނާއިބެއް ނެތް ކަަމަށް ސުޕްރީމް ކޯޓްގެ ކުރީގެ ފަނޑިޔާރު މަހާޒް އަލީ ޒާހިރު ވިދާޅުވެއްޖެ އެވެ.

މި ސަރުކާރުން ވެރިކަމަށް އައިސް މަގާމުން ދުރުކުރި މަހާޒް މިހެން ވިދާޅުވީ މިއަދު އެކްސްގައި ކުރެއްވި ޕޯސްޓެއްގަ އެވެ. އުއްތަމަ ފަނޑިޔާރު އަހްމަދު މުއުތަސިމް އަދުނާނު, ޝަރަފުވެރިކަމާއެެކު ވަކިވެވަޑައިގެންނެވުމާއި ގުޅިގެން އުޝާމް ކުރެއްވި ޕޯސްޓަކަށް ރައްދު ދެއްވާ މަހާޒް ވަނީ ފަނޑިޔާރުންނަށް ނުފޫޒު ފޯރުވަން އުޝާމް މަަސައްކަތް ކުރެއްވި ކަމަށް ތުހުމަތު ކުރައްވާފަ އެވެ.

އެ ޕޯސްޓްގައި މަހާޒް ވަނީ އެ ދެ ބޭފުޅުން ވާހަކަ ދެއްކެވި މެސެޖްތަކެއް ހިމެނޭ ސްކްރީންޝޮޓެއް އާންމު ކުރައްވާފަ އެވެ. އެ ސްކްރީންޝޮޓްގައި ދެ ބޭފުޅުން ކޯލެއް ކުރައްވާފައިވާ ކަން އެނގެ އެވެ.

މަހާޒް ވިދާޅުވި ގޮތުގައި މި 8 މިނެޓްގެ ފޯނު ކޯލަކީ 10 ފެބްރުއަރީ 2025 ގައި ސުޕްރީމް ކޯޓުގެ ފަނޑިޔާރުންގެ މައްސަލައެއް ދައުލަތުގެ އިދާރާއަކުން ބަލަން ނޫޅޭ ކަމަށާއި 25 އޮކްޓޯބަރ 2022 ގައި ހިނގާ އޮތް ހާދިސާއެއްގެ މައްސަލަ ވެސް ޖޭއެސްސީން ނުބަލާނެ ކަމުގައި ވަކީލެއް މެދުވެރިކޮށް ބަންޑާރަ ނާއިބު ގުޅުވި ގުޅުވުމެއް ކަމަށެވެ.

ބަންޑާރަ ނާއިބުގެ އެ މެސެޖު ސާފުވި ކަމަށާއި، 2022 ގެ ވާހަކަ މިހާރު ދައްކާނީ ކީއްވެގެންކަން އެނގޭ ކަމުގަ އެ ވަކީލު ގާތުގަ ބުނިން ކަމަށްވެސް މަހާޒް ވިދާޅުވި އެވެ.

މަހާޒް ވިދާޅުވި ގޮތުގައި 2008 ގެ ފަހުން ފަނޑިޔާރުންނަށް މި ވަރަށް ނުފޫޒު ފޯރުވި ބަންޑާރަނާއިބަކު ދެކެވަޑައިނުގަންނަވަ އެވެ.

ކުރީގެ ބައެއް ފަނޑިޔާރުންނާއި ބައެއް ވަަކީލުންނާއި އިދިކޮޅު ސިޔާސީ ވެރީން ވެސް ގެންދަވަނީ އުޝާމް, ފަނޑިޔާރުންނަށް ނުފޫޒު ފޯރުވާ ކަމަށް ތުހުމަތު ކުރައްވަމުންނެވެ. ނަމަވެސް އެ ތުހުމަތު އުޝާމް ދޮގު ކުރައްވަ އެވެ.