ހޯރަފުށީ ކައުންސިލުން މަޖިލިސް ކެމްޕޭނަށް ދައުލަތުގެ ވަސީލަތްތައް ބޭނުންކުރާ މައްސަލަ ބެލުމަށް ގޮވާލައިފި!

ހއ.ހޯރަފުށީ ކައުންސިލުން މަޖިލިސް ކެމްޕޭނަށް ދައުލަތުގެ ވަސީލަތްތައް ބޭނުންކުރާކަމަށާއި އެ މައްސަލަ ކަމާބެހޭ މުއައްސަސާތަކުން ބެލުމަށް ސަރުކާރު ހިންގާ ކޯލިޝަން ޕީޕީއެމް/ޕީއެންސީ ކޮންގްރެސް އިން ގޮވާލައިފިއެވެ.

އެ ކޯލިޝަނުން ނެރުނު ބަޔާނެއްގައި ބުނީ، ރައްޔިތުންގެ މަޖިލީހުގެ އިންތިޚާބަށް ނުފޫޒު ފޯރުވުމަށް ހޯރަފުށީ ކައުންސިލުން ހިންގަމުންދާ ކަންތައްތައް ކުށްވެރިކުރާކަމަށާއި، އެމްޑީޕީގެ މެޖޯރިޓީ އޮންނަ ކައުންސިލުން ޕީޕީއެމް/ޕީއެންސީ ކޯލިޝަންގެ ފަރާތުން އިންތިހާބުގައި ވާދަކުރާ ކެނޑިޑޭޓަށް އެންޓި ކެމްޕޭން ކުރާ ކަމަށެވެ.

މީގެ އިތުރުންވެސް، ހޯރަފުށީގައި ހުރި ކައުންސިލްގެ ހުރިހާ ވަސީލަތްތައް އެމްޑީޕީ ކެނޑިޑޭޓުގެ ކެމްޕޭނަށް ބޭނުންކުރަމުންދާ ކަމަށާއި، އެގޮތުން، ކައުންސިލްގެ މުވައްޒަފުން ކެމްޕެއިންގައި ބޭނުންކުރުމާ، ތަނުގައި ހުރި ވެހިކަލްތަކާއި ޕްރިންޓަރާ ކަރުދާހާއި އެހެނިހެން ވަސީލަތްތައްވެސް ބޭނުންކުރަމުންދާ ކަމަށް ވެސް ކޯލިޝަނުން ނެރުނު ބަޔާނުގައި ވެއެވެ.

މިވަގުތު ހޯރަފުށީ ކައުންސިލްގެ އަމާޒު ހުރީ ޤާނޫނުން އެކައުންސިލާއި މަތިކޮށްފައިވާ ޒިންމާ އަދާކުރުމަށްވުރެ ބޮޑަށް، ރަސްމީގަޑީގައި އާއި ނުރަސްމީ ގަޑީގައިވެސް އިދިކޮޅު ކެންޑިޑޭޓަށް ކެމްޕެއިން ކޮށްދިނުމަށްކަން ފާހަގަކޮށް، ޕީޕީއެމް/ޕީއެންސީ އިން ބުނީ އިންތިޚާބާ ދިމާކޮށް ކައުންސިލުން ގޯތި ވެސް ދެމުންދާ ކަމަށެވެ.

ގޯތި ދިނުމުގެ އިތުރުންވެސް، މިހާރު ކައުންސިލުން ބިން ދޫކޮށްފައިވާ ފަރާތްތަކުގެ ބިން ބޮޑުކޮށްދޭނެ ކަމަށްވެސް ބުނަމުންދާއިރު، މިއީ ކަނޑައެޅިގެން އިންތިޚާބުތަކާބެހޭ ޤާނޫނާވެސް ޚިލާފުކަމެއްކަމަށް ވެސް މި ބަޔާނުގައި ވަނީ ބުނެފައެވެ.

އެހެންކަމުން، އެ ކޯލިޝަނުން ވަނީ ޤާނޫނުތަކުގައި ކަނޑައެޅިފައިވާ ހުދޫދުގެ ތެރޭގައި ކެމްޕެއިން ކުރުމަށް އެ ކޯލިޝަނުން ހޯރަފުށީ ކައުންސިލް މެމްބަރުންނަށް ގޮވާލާފައެވެ. އަދި ދައުލަތުގެ ވަސީލަތްތައް ކައުންސިލުން ނަހަމަ ގޮތުގައި ބޭނުންކުރަމުންދާ މައްސަލަ ކަމާބެހޭ ފަރާތްތަކުން ބަލައި، ތަހުގީގު ކުރުމަށް ވެސް ޕީޕީއެމް/ޕީއެންސީ ކޯލިޝަނުން ވަނީ ގޮވާލާފައެވެ.