ހަފްތާ ބަންދުގައި ޕާސްޕޯޓްގެ ސްޓޮކް ލިބޭނެ، 2646 ޕާސްޕޯޓްގެ ބެކްލޮގެއް

މި ހަފްތާ ބަންދުގައި ޕާސްޕޯޓްގެ ސްޓޮކް ލިބޭނެ ކަމަށާ އަންނަ އާދިއްތަ ދުވަހުން ފެށިގެން ޕާސްޕޯޓްގެ ހިދުމަތް އާންމު ހާލަތަށް ގެނެވޭނެ ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެ އެވެ.

މިދިޔަ 11 އަހަރު ރާއްޖެއަށް "ޕާސްޕޯޓު ބުކްލެޓް" ފޯރުކޮށްދޭ ޖަރުމަންވިލާތުގެ ކުންފުނީގެ ޕްރިންޓް ހައުސްގެ މެޝިންތަކަށް ދިމާވި މައްސަލަތަކަކާއި ގުޅިގެން ޕާސްޕޯޓް ދޫކުރުން ކޮންޓްރޯލް ކުރި އެވެ. މިއަދު އޮތް ނޫސްވެރީންގެ ބައްދަލްވުމެއްގައި މިނިސްޓަރު އިހްސާން ވިދާޅުވީ މި ހަފްތާ ބަންދުގައި ޕާސްޕޯޓްގެ ސްޓޮކް ލިބޭނެ ކަމަށެވެ.

އަދި އަންނަ އާދިއްތަ ދުވަހުން ފެށިގެން ޕާސްޕޯޓްގެ ހިދުމަތް އާންމު ހާލަތަށް ގެނެވޭނެ ކަމަށް ވިދާޅުވި އެވެ. މިނިސްޓަރު ވިދާޅުވީ ޕާސްޕޯޓްގެ ބުކްލެޓް ލިބުން ދަތިވެ ބެކްލޮގެއް އުފެދިފައިވާ ކަމަށެވެ. އެގޮތުން 2646 ޕާސްޕޯޓްގެ ބެކްލޮގެއް އެބައޮތް ކަމުގައި ވިދާޅުވި އެވެ.

އިތުރު ގަޑީގައި މަސައްކަތްކޮށްގެން ކުރިއަށް އޮތް ފަސް ދުވަސްތެރޭ ބެކްލޮކް ފިލުވާލެވޭނެ ކަމަށްވެސް ވިދާޅުވި އެވެ.

މިނިސްޓަރު ވިދާޅުވީ ޕާސްޕޯޓްގެ ބުކްލެޓް ލިބުން ދަތިވީނަމަވެސް ބޭރަށް ކިޔަވަންދާ ކުދީންނާއި ބޭސްފަރުވާއަށް ދާން ޖެހުނު މީހުންނާއި އެހެނިހެން ބޭނުންތަކުގައި ބޭރަށް ދަތުރުކުރަން ޖެހުނު މީހުންނަށް ޕާސްޕޯޓް ހައްދައިދިން ކަމަށެވެ.

ޕާސްޕޯޓްގެ ހިދުމަތް މިހާރު 39 ސަރަޙައްދަކުން ދެމުން ގެންދާއިރު ދުވާލަކު 350 ޕާސްޕޯޓް ހަދަން ހުށައަޅާ ކަމަށް މިނިސްޓަރު ވިދާޅުވި އެވެ. މީގެ އިތުރުން ލަންކާއާ މެލޭޝިޔާއިން ވެސް ޕާސްޕޯޓްގެ ހިދުމަތް ފޯރުކޮށްދެ އެވެ.