އެމެރިކާގެ ފަސްގަނޑުގައި އީރާނުން ދައްކަމުންދާ މޮޅު ކުޅުމާއެކު ޓްރަމްޕްއަށް ފާޑުކިޔާ މީމްތަކުން މީސްމީޑިއާ ފުރާލައިފި

ފީފާ ވޯލްޑް ކަޕްގައި އެމެރިކާގެ ފަސްގަނޑުގައި، އީރާނު ޓީމުން ބަލިނުވެ ދަމަހައްޓަމުންދާ ރެކޯޑާއެކު، އެމެރިކާގެ ރައީސް ޑޮނަލްޑް ޓްރަމްޕަށް އަމާޒުކޮށް ހަދާފައިވާ މީމްތަކުން މީސް މީޑިއާ ފުރާލައިފިއެވެ.

މުބާރާތުގެ ގްރޫޕް 'ޖީ' އެއްގައި ހިމެނޭ އީރާނުން މިހާތަނަށް ކުޅުނު ދެ މެޗުން ވެސް ވަނީ ބަލިނުވެ ސަލާމަތްވެފައެވެ. ފުރަތަމަ މެޗުގައި ނިއުޒީލެންޑާ ވާދަކޮށް 2-2 އިން އެއްވަރުވިއިރު، އާދީއްތަ ދުވަހު ލޮސް އެންޖެލިސް ސްޓޭޑިއަމްގައި ވަރުގަދަ ބެލްޖިއަމްއާ ދެކޮޅަށް ކުޅުނު މެޗު ވަނީ 0-0 އިން އެއްވަރުކޮށްފައެވެ.

އީރާނާއި އެމެރިކާ އަދި އިޒްރޭލާ ދެމެދު އޮތް ސިޔާސީ ނުތަނަވަސްކަމުގެ ސަބަބުން، އީރާނު ޓީމަށް މި މުބާރާތުގައި ކުރިމަތިލާން ޖެހިފައިވަނީ އާދަޔާ ހިލާފު ގޮންޖެހުންތަކަކާއެވެ. އެމެރިކާގެ ބޯޑަރު ތެރޭގައި ކޭމްޕް ކުރުމުގެ ހުއްދަ ނުލިބުމުން، އީރާނު ޓީމުން ތިބެން ޖެހިފައިވަނީ މެކްސިކޯގައެވެ. ކޮންމެ މެޗަކަށް އެމެރިކާއަށް ދަތުރުކުރަނީ ވަރުގަދަ ސެކިއުރިޓީ ޗެކްތަކަކަށް ފަހުގައެވެ.

ނަމަވެސް އެމެރިކާގެ ފަސްގަނޑުގައި އީރާނު "ބަލިނުކުރެވުނު" ކަމަށް ބުނެ ސިޔާސީ ގޮތުންނާއި ކުޅިވަރުގެ ގޮތުން މިކަން ވަނީ ގިނަ ބައެއްގެ ސަމާލު ކަމަށް އައިސްފައެވެ.

މެޗަށްފަހު ވާހަކަ ދައްކަމުން އީރާނުގެ ހެޑް ކޯޗު އާމިރު ގަލެނޮއީ ބުނީ، މިއީ އެ ގައުމުގެ ފުޓްބޯޅަ ތާރީޚުގައި ލިޔެވިގެންދާނެ ބޮޑު ކާމިޔާބީއެއް ކަމަށެވެ.

"ވޭތުވެދިޔަ ހަ މަސް ދުވަހު އަހަރެމެން ތިބީ ހަނގުރާމައިގެ ހާލަތެއްގައި. ލީގު މެދުކަނޑާލައި، އެކުވެރިކަމުގެ މެޗުތައް ކެންސަލްވި. އެންމެ އުނދަގޫ ހާލަތުގައި ވޯލްޑް ކަޕަށް އައިސް މިފަދަ ނަތީޖާއެއް ނެރުމަކީ ކޮންމެ ކޮންމެ ޓީމަކަށް ކުރެވޭނެ ކަމެއް ނޫން،" ރޮއިޓާސްއަށް ދިން އިންޓަވިއުއެއްގައި އޭނާ ބުންޏެވެ.

އީރާނުގެ މި ހިތްވަރުގަދަ ކުޅުމާއި، އެމެރިކާގެ ފަސްގަނޑުގައި އެ ޓީމުން ދައްކަމުންދާ ސާބިތުކަމުގެ ސަބަބުން މުޅި ދުނިޔޭގެ ސަމާލުކަން މިހާރު ވަނީ އެ ޓީމަށް ހުއްޓިފައެވެ.