މަޖިލިސް އިންތިޚާބުގައި އިމްރާނަށާއި އަލީ ޒާހިރަށްވެސް ލިބުނީ ނާކާމިޔާބީ!

20 ވަނަ ރައްޔިތުންގެ މަޖިލީހުގައި އަދާލަތު ޕާޓީގެ ރައީސް އަދި ކުރީގެ ހޯމް މިނިސްޓަރު ޢިމްރާން އަބްދުالله އާއި ކުރީގެ ރައީސް އޮފީހުގެ ޗީފް އިފް ސްޓާފް ޢަލީ ޒާހިރަށްވެސް ނާކާމިޔާބީއާ ކުރިމަތިލާން ޖެހިއްޖެއެވެ.

މަޖިލިސް އިންތިޚާބުގައި ޢިމްރާން ވާދަކުރެއްވީ މަކުނުދޫ ދާއިރާ އަށެވެ. އެ ދާއިރާއަށް އިމްރާން އަދާލަތު ޕާޓީގެ ޓިކެޓްގައި ވާދަކުރެއްވި އިރު، މަކުނުދޫ ދާއިރާގެ މިހާރުގެ މެންބަރު މުހައްމަދު ރާއީ އެމްޑީޕީ ޓިކެޓްގައި އަދި ޕީއެންސީ ޓިކެޓްގައި އާދަމް ޝަފީގް ވާދަކުރެއްވިއެވެ.

މަކުނުދޫ ދާއިރާގެ ވަގުތީ ނަތީޖާ؛

* އާދަމް ޝަފީގް ( ޕީއެންސީ) — 1223 (%44.17)

* އިމްރާން އަބްދުالله (އަދާލަތު) — 821 (%29.65)

* މުހައްމަދު ރާއީ (އެމްޑީޕީ) — 725 (%26.18)

އިމްރާންގެ އިތުރުން އަލީ ޒާހިރު ވާދަ ކުރެއްވި ފެލިދޫ ދާއިރާގެ ގޮނޑިވެސް ކާމިޔާަބު ކޮށްފައިވަނީ ވެރިކަން ކުރާ ޕީއެންސީންނެވެ. އެ ދާއިރާއަށް އަލީ ޒާހިރު ވާދަކުރެއްވީ އެމްޑީޕީގެ ތާއީދާއެކު އެވެ. އަދި އަލީ ޒާހިރު ވާދަކުރައްވާތީ އެ ދާއިރާއަށް އެމްޑީޕީ ކެންޑިޑޭޓަކު ވާދައެއްވެސް ނުކުރައްވައެވެ.

ފެލިދޫ ދާއިރާގެ ނަތީޖާ؛

* އާދަމް ޒާހިރު ( ޕީއެންސީ ) - 339 ވޯޓު (%38)

* އަލީ ޒާހިރު ( އަމިއްލަ ) - 287 ވޯޓު (%32)

* ހުސައިން ޒައިދުލް އާރިފް ( އަމިއްލަ ) - 179 ވޯޓު (%20)

* ޝުޖާއު އަލީ ( ޑެމޮކްރެޓްސް) - 102 ވޯޓު (%11)

އިއްޔެގެ އިންތިޚާބުގައި އަދާލަތު ޕާޓީގެ ފަރާތުން ވާދަކުރެއްވި ހަތަރު ކެންޑިޑޭޓުންނަށް ވެސް ވަނީ ނާކާމިޔާބީއާ ކުރިމަރިލާން ޖެހުފައެވެ.

އަދާލަތުން ވާދަކުރި 4 ގޮނޑޫގެ އިތުރުން، ވިހިވަނަ މަޖިލީހުގެ 93 ދާއިރާއަށް ޖުމުލަ 90 ދާއިރާއަކަށް ޕީއެންސީގެ ކެންޑިޑޭޓުން ވާދަކުރިއެވެ. އަދި އިދިކޮޅު އެމްޑީޕީން 89 ދާއިރާއަކަށް ވާދަކުރިއެވެ.

އަދި، އަމިއްލަ 130 ކެންޑިޑޭޓުންނާއި، ޖުމްހޫރީ ޕާޓީ (ޖޭޕީ)ގެ 10 ކެންޑިޑޭޓުންނާއި ދަ ޑިމޮކްރެޓްސްގެ 39 ކެންޑިޑޭޓުން އިންތިޚާބުގައި ވާދަކުރިއެވެ.

އިންތިޚާބުގެ ވަގުތީ ނަތީޖާތައް ދައްކާގޮތުން ސަރުކާރު ހިންގާ ޕީއެންސީން ވަނީ މަޖިލީހުގެ 71 ގޮނޑި ލިބި ސުޕަމެޖޯރިޓީ ލިބިފައިވާއިރު، ޕާޓީގެ ތާއީދާއެކު ގޮނޑި ކާމިޔާބު ކުރި ކެންޑިޑޭޓުން ހިމަނައިގެން ސަރުކާރަށް އެއްބާރުލުން ދޭނެ 75 ކެންޑިޑޭޓުން މަޖިލީހުގައި ތިބޭނެއެވެ.