އާރުޑީސީގެ މައްސަލައާ ގުޅިގެން، މޫކޭ އަދި ޔާސިރުގެ ޕާސްޕޯޓް ހިފަހައްޓައިފި

ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ހިޔާނާތުގެ މައްސަލައާ ގުޅިގެން އެކުންފުނީގެ ކުރީގެ މެނޭޖިންގ ޑިރެކްޓަރު މޫސާ އަލިމަނިކް (ވަޑި މޫކޭ) ސީއެފްއޯ ޔާސިރު ހަސަންގެ ޕާސްޕޯޓް ހިފަހައްޓައިފިއެވެ.

މިކަމާ ގުޅިގެން ފުލުހުންވެސް ވަނީ، މޫކޭ އަދި ޔާސިރު ފުރުން މަނާކޮށްފައިވާކަން ޔަގީންކޮށްދީފައެވެ. ފުލުހުން ބުނީ، އެފަރާތުން ތަހުގީގުކުރަމުންދާ މައްސަލައަކާ ގުޅިގެން އާރުޑީސީގެ ކުރީގެ އެމްޑީ މޫސާ އަލިމަނިކް، އަދި ސީއެފްއޯ ޔާސިރު ހަސަން ފުރުން މަނާކުރުމުގެ އަމުރު ނެރި، އެކަނ އެފަރާތްތަކަށް އަންގާފައިވާކަމަށެވެ.

އާރުޑީސީގެ ހިޔާނާތުގެ މައްސަލައާ ގުޅިގެން ފުލުހުން ވަނީ ބްރާސްފަތި ދުވަހުގެ ރޭ ދަންވަރުގެ ވަގުތެއްގައި މޫކޭ އަދި ޔާސިރު ދިރިއުޅުއްވާގެއަށް ފުލުހުންވަދެ އިލެކްޓްރޯނިކް ސާމާނުތަކެއް ގެންގޮސްފައެވެ. މީގެ ތެރެއިން ފުލުހުން ވަނީ ޔާސިރުއާ ގުޅުންހުރި ދެ ތަނެއް ބަލައި ފާސްކޮށްފައެވެ. މިކަމާ ގުޅިގެން އެމްޑީޕީން ބުނެފައިވަނީ، މި ސަރުކާރުން އިދިކޮޅު ފަރާތްތަކުގެ މައްސަލަތައް ބަލަނީ ސަރުކާރަށް ކުރާ ތުހުމަތުތައް އޮއްބާލަންކަމަށެވެ.

ފުލުހުން އަންނަނީ އާރުޑީސީ ހިޔާނާތާގުޅޭ މައްސަލައެއް ތަހުގީގުކުރަމުންނެވެ. އެގޮތުން ފުލުހުން ވަނީ މިދިޔަ އަހަރުގެ ނޮވެމްބަރުމަހު އާރުޑީސީ އޮފީހަށްވަދެ މައްސަލައާ ގުޅޭ މައުލޫމާތު ހޯދުމަށް ގިނަ އަދަދެއްގެ ލިޔެކިޔުންތައް ގެންގޮސްފައެވެ. އާރުޑީސީ ހިޔާނާތުގެ މައްސަލައާ ގުޅޭގޮތުން ފުލުހުން މީގެ ކުރިން ބުނެފައިވަނީ ކުންފުނީގެ ފައިސާ، މުއައްޒަފުންގެ އަމިއްލަ އެކައުންޓުތަކަށް ވަދެފައިވާކަމަށާއި، މިގޮތުން އެ މުއައްޒަފުންގެ އެކައުންޓްތަކަށް ވަދެފައިވާ ފައިސާގެ އަދަދު 11 މިލިއަން ރުފިޔާއަށް އަރާކަމަށެވެ.