ހާހަކަށް ވުރެ ގިނަ ބައިވެރިންނާއެކު، ޤުރުއާން ކިޔެވުމުގެ ޤައުމީ މުބާރާތް މިރޭ ފަށަނީ

119 މުއައްސަސާއަކުން ބައިވެރިވާ 1،037 ބައިވެރިންނާއެކު، ކީރިތި ޤުރްއާން ކިޔެވުމުގެ 37 ވަނަ ޤައުމީ މުބާރާތް މިރޭ ފަށާނެއެވެ.

އެ މުބާރާތް ފެށުމުގެ ގޮތުން ޚާއްސަ ރަސްމިއްޔާތެއް ވެސް މިރޭ އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވުމަށް ހަމަޖެހިފައިވެއެވެ.

މި މުބާރާތުގެ ކިޔެވުން ކުރިޔަށްދާނީ ސަލާމްން ރަސްގެފާނު މިސްކިތުގައެވެ. މި އަހަރުގެ މުބާރާތުގައި ބަލައިގެން ކުޔެވުމުގެ ގޮފީގައި 582 ފަރާތަކުންނާއި، ނުބަލައި ކިޔެވުމުގެ ގޮފީގައި 424 ފަރާތަކުންގެ އިތުރުން، ޙާފިޡުންގެ ގޮފީގައި 31 ޙާފިޡުން ކިޔަވާނެއެވެ.

އިސްލާމީ ވުޒާރާއިން މައުލޫމާތު ދިން ގޮތުގައި، މުބާރާތުގައި ބައިވެރިވާ ފަރާތްތަކުގެ ތެރެއިން ބަލައިގެން ކިޔެވުމުގެ ގޮފީގެ ކިޔެވުން ކުރިއަށްދާނީ ސަލްމާން ރަސްގެފާނު މިސްކިތުގެ 4 ވަނަ ފަންގިފިލާ އޮޑިޓޯރިމްގައެވެ. އަދި ނުބަލާ ކިޔެވުމުގެ ގޮފީގެ ކިޔެވުން ކުރިއަށްދާނީ ސަލްމާން ރަސްގެފާނު މިސްކިތުގެ 5 ވަނަ ފަންގިފިލާގެ މަލްޓިޕާޕަސް ހޯލުގައެވެ.

އިސްލާމީ ވުޒާރާއިން ބުނި ގޮތުގައި، ރިތި ޤުރުއާން ކިޔެވުމުގެ ޤައުމީ މުބާރާތުގެ ފެންވަރު ރަނގަޅުކޮށް ފާހަގަކޮށްލެވޭ މުބާރާތަކަށް ހެދުމަކީ ރައީސުލްޖުމުޙޫރިއްްޔާ ޑރ. މުޙައްމަދު މުޢިއްޒުގެ ސަރުކާރުން އިސްކަމެއް ދެއްވައިގެން ކުރިއަށް ގެންދާ ކަމެކެވެ. އެގޮތުން މިއަހަރުގެ މުބާރާތަކީވެސް ފާހަގަކޮށްލެވޭ މުބާރާތަކަށް ހެދުމަށް ކީރިތި ޤުރުއާނާއި ބެހޭ ޤައުމީ މަރުކަޒުން ގިނަ މަސައްކަތްތަކެއް ކުރަމުން އަންނަ ކަމަށް އެ ވުޒާރާއިން ބުންޏެވެ.