އިދިކޮޅު ތިން ރައީސުންގެ ނިންމުންތައް ތަންފީޒުކުރުމަށް އެއްބާރުލުންދޭން ޕީއެންއެފުން ނިންމައިފި

އިދިކޮޅު ތިން ރައީސުންގެ ނިންމުންތައް ތަންފީޒުކުރުމަށް އެއްބާރުލުންދޭން ކުރީގެ ރައީސް ޢަބްދުﷲ ޔާމީން އިސްކޮށް ހުންނަވައިގެން އުފެއްދެވި ޕީޕަލްސް ނެޝަނަލް ފްރަންޓުން ނިންމައިފިއެވެ.

ޕީއެންއެފުން މިގޮތަށް ނިންމާފައިވަނީ އެ ޕާޓީގެ ސެނެޓްގެ ތިންވަނަ ބައްދަލުވުމުގައެވެ. މި ނިންމުން ފާސްވީ ސެނެޓްގައި ބައިވެރިވި މެމްބަރުންގެ އިއްތިފާގުންނެވެ.

މިކަމާ ގުޅިގެން ޕީއެންއެފުން ނެރުނު ބަޔާނުގައި ބުނީ، ކުރީގެ ރައީސް މުހައްމަދު ނަޝީދާއި ކުރީގެ ރައީސް އިބްރާހިމް މުހައްމަދު ސޯލިހާއި ކުރީގެ ރައީސް ޔާމީން އަބްދުލްގައްޔޫމް އެކުގައި ފައްޓަވާފައިވާ މަސައްކަތްތަކަށް އެއްބާރުލުން ދޭން ނިންމީ އަދުގެ ސަރުކާރުގެ އަމަލުތައް ހުރިގޮތުން ކަމަށެވެ.

ޕީއެންއެފުން ނެރުނު ބަޔާނުގައި ފާހަގަކޮށްފައިވާ ކަންކަމަށް ބަލާއިރު ދައުލަތުގެ އެންމެހާ ބާރުތައް ފެށި އަދި ދެމި އޮންނާނީވެސް، ރައްޔިތުންގެ ކިބައިގައިކަށް ބަޔާންކޮށްފައިވާއިރު ދައުލަތް ހިންގުމުގެ ދުސްތޫރީ އޮނިގަނޑުން ބޭރުން ސަރުކާރުން ކަންކަން ކުރަމުންދާކަން ވަނީ ފާހަގަކޮށްފައެވެ. އެގޮތުން ޝަރުއީ ނިޒާމަށް ވެރިކަމުގެ ބާރުން ބާރު ފޯރުވުމާއި، ރައްޔިތުންގެ މަޖިލީހުގެ މެމްބަރުންނަށް ސަރުކާރުން ނުފޫޒު ފޯރުވަމުންދާކަން ވަނީ ފާހަގަކޮށްފައެވެ.

އެގޮތުން ރައްޔިތުންގެ މަޖިލީހުގެ" ބާރު ކަނޑުވާލައި ފަނޑިޔާރުގެއާއި ދައުލަތުގެ މުއައްސަސާތަކުގެ މުސްތަގިއްލުކަން، ގެއްލުވާލައި ދައުލަތުގެ ބާރުތަކުގެ މައްޗަށް އޮތް ފާރަވެރިވުމުގެ ނިޒާމު ހަލާކުކޮށްލަމުންދާކަމަށް ބަޔާނުގައި ވަނީ ބުނެފައެވެ. އަދި ލާމަރުކަޒީ ނިޒާމު ފުނޑުފުނޑުކޮށް ހެޔޮވެރިކަމުގެ ނިޒާމު ހީނަރުކޮށް،" ޚުދުމުޚުތާރު، އަނިޔާވެރި، ވެރިކަމަކަށް" "ރާއްޖޭގެ މިސްރާބު ބަދަލުވެފައިވާކަން ވަނީ ފާހަގަކޮށްފައެވެ.

އަދި ޤާނޫނުތަކުން، ދިވެހި ރައްޔިތުންނަށް، ކަށަވަރުކޮށްދީފައިވާ އަސާސީ ހައްގުތަކަށް ރައީސް ޑރ. މުހައްމަދު "މުއިއްޒުގެ" ސަރުކާރުން ފާޅުކަންބޮޑު ގޮތެއްގަ އަރައިގަނެ،، އެ ޙައްޤުތަކުގެ، ޙުރުމަތް "ނަގާލާފައިވާކަންވެސް ވަނީ ފާހަގަކޮށްފައެވެ.