އިނގިރޭސިވިލާތުން ފަލަސްތީނުގެ ދައުލަތް ބަލައިގެންފި

އިނގިރޭސިވިލާތުން ފަލަސްތީނުގެ ދައުލަތް ބަލައިގަންނަކަން ހާމަކޮށް އެކަން ރަސްމީކޮށް އިއުލާނުކޮށްފި އެވެ.

އިޒްރޭލަށް އެންމެ ބޮޑަށް ވާގިވެރިވި އަދި ފަލަސްތީނު ބިމުގައި ޔަހޫދީ އިޒްރޭލްގެ ދައުލަތް ގާއިމުކުރުމުގެ މޭސްތިރި ގައުމު ކަމަށްވާ އިނގިރޭސިވިލާތުގެ މި ތާރީހީ ވަރުގަދަ ނިންމުން އިއުލާނު ކުރެއްވީ އެ ގައުމުގެ ބޮޑުވަޒީރު ކިއާ ސްޓާމާ އެވެ.

އޭނާ ވަނީ އިނގިރޭސި ވިލާތުން ފަލަސްތީނުގެ ދައުލަތް ބަލައިގަންނަ ކަން އިއުލާނު ކުރައްވާ އިނގިރޭސިންގެ އުންމީދަކީ ދެ ދައުލަތުގެ ހައްލު ކަމުގައި ވިދާޅުވެފަ އެވެ. ބޮޑުވަޒީރު ކިއާ ވިދާޅުވި ގޮތުގައި އިނގިރޭސިވިލާތު މި ނިންމުމަކީ މެދުއިރުމަތީގައި އުފެދިފައި އޮތް ބިރުވެރިކަން ނައްތާލުމެވެ.

މި ނިންމުމާއި ހަމައަށް އައިއިރު ފަލަސްތީނުގެ ހާލަތު ވަކީން ހާއްސަކޮށް އެ ގައުމުގެ ޣައްޒާ އޮތީ ތަހަންމަލު ނުކުރެވޭ ފަދަ ނިކަމެތި އަދި ބިރުވެރި ހާލަތެއްގައި ކަމަށާ އެއީ ނިމުން ގެންނަން ޖެހޭ ހާލަތެއް ކަމުގައި ކިއާ ސްޓާމާ ވިދާޅުވި އެވެ.

ވަރަށް ގިނަ ގައުމުތަކުން ފަލަސްތީނުގެ ދައުލަތް ބަލައިގަންނަމުންދާތީ ޔަހޫދީން ގޮތެއް ނެތް އަނިޔާވެރި ބޮޑުވަޒީރު ނަތަންޔާހޫ އެކަން ސިފަކޮށްފައި ވަނީ ފަލަސްތީނުގެ މިނިވަން ކަމަށްޓަކައި ހަގީގީ ޖިހާދެއް ކުރަމުންދާ ހާމަސް ޖަމާއަތުން އިޒްރޭލް ސިއްސުވާލި ކާމިޔާބު ހަމަލާ -- އޮކްޓޫބަރު 7, 2023 ގެ ދިފާއު ހަމަލާއަށް ދޭ އިނާމެއްގެ ގޮތުގަ އެވެ.

އެކަމަށް ވެސް ބޮޑުވަޒީރު ކިޔާ ސްޓާމާ ވަނީ ރައްދު ދެއްވާފަ އެވެ. ވިދާޅުވީ އެއީ ހަމާސް ބަލައިގަތުން ނޫން ކަމަށާ އަދި ހަމާސްއަށް އިނާމެއް ދިނުން ވެސް ނޫން ކަމަށެވެ. އިނގިރޭސިންގެ ނިންމުމުން ހަމާސްއަށް މުސްތަގުބަލެއްް ނުލިބޭނެ ކަމަށް ވެސް ވިދާޅުވި އެވެ. އަދި ބޭނުންވަނީ ދެ ދައުލަތުގެ އިންސާފުވެރި ހައްލެއް ކަމަށް ވިދާޅުވި އެވެ.

އިނގިރޭސިންގެ މި އިއުލާނަކީ އިޒްރޭލާއި އެ މީހުންގެ ބޮޑުވަޒީރަށް ވަރަށް ވޭންދެނިވި ކަމަކަށް ވެގެންދާނެ އެވެ.