މުހައްމަދު އިސްމާއިލްގެ ކެންޕެއިން ހޮޓްލައިން ނަންބަރެއް؛ ބޭނުން ސުވާލެއް ކުރެވޭނެ!

ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި، ޕީޕީއެމް/ޕީއެންސީގެ ޓިކެޓްގައި ވިލިމާލޭ ދާއިރާއަށް ވާދަކުރައްވާ މުހައްމަދު އިސްމާއިލްގެ ކެންޕެއިން ހޮޓްލައިން ނަންބަރެއް ތަޢާރަފްކޮށްފި އެވެ.

މުހައްމަދު އިސްމާއިލްގެ ކެންޕެއިން ޓީމުން ބުނީ، އޭނާއާއި ގުޅަން ބޭނުންވާ ފަރާތްތަކުން ނުވަތަ ބައްދަލު ކުރަން ބޭނުންވާ ފަރާތްތަކަށް އެ ފުރުސަތު ފަހިކޮށްދިނުމަށް ކެންޕެއިން ހޮޓްލައިން ނަންބަރެއް ތަޢާރަފް ކޮށްފައިވާ ކަމަށެވެ.

އެގޮތުން، ސުވާލެއް އޮތް ނަމަ ނުވަތަ ބައްދަލު ކުރަން ބޭނުން ނަމަ، 7377447 މެސެޖު ކުރުމުން މެސެޖުކުރާ ތަރުތީބުން ފުރުސަތު ދެވޭނެ ކަމަށް ބުނެފައިވެއެވެ.

މީގެ އިތުރުން، މުހައްމަދު އިސްމާއިލް ގެ ކެންޕެއިން ޓީމާއި ގުޅެން ބޭނުންވާ ފަރާތް ތަކުންވެސް އެ ނަންބަރަށް މެސެޖު ކުރުމުން އެކަން ފަހިވެގެންދާނެ ކަމަށް ބުނެފައިވެއެވެ.

އެ ނަންބަރަށް، ވައިބާ، ވަޓްސްއަޕް ނުވަތަ ޓެލެގްރާމް އިންވެސް މެސެޖު ފޮނުވޭނެ ކަމަށް ކެންޕެއިން ޓީމުން ބުނެއެވެ.

ވިލިމާލޭ ދާއިރާއަށް ވާދަކުރާ 4 ކެންޑިޑޭޓުންގެ ތެރެއިން މުހައްމަދު އިސްމާއިލް އަށް ލިބިވަޑައިގެންފައިވަނީ ކެންޑިޑޭޓް ނަންބަރު 4 އެކެވެ.

ސަރުކާރު ކޯލިޝަން، ޕީޕީއެމް/ޕީއެންސީންގެ ފަރާތުން 20 ވަނަ ރައްޔިތުންގެ މަޖިލިހުގައި ވާދަކުރައްވާނެ ކެންޑިޑޭޓެއް ކަނޑައެޅުމަށް އެކޯލިޝަނުން ކުރިއަށް ގެންދިޔަ ޕްރައިމަރީގައި ވިލިމާލޭ ދާޢިރާގެ ޓިކެޓް މުހައްމަދު އިސްމާއިލް ކަށަވަރު ކުރެއްވީ އެ ދާއިރާއަށް ވޯޓްލީ 459 މީހުންގެ ތެރެއިން 300 މީހުން ވޯޓުންނެވެ.

އެ ދާއީރާއަށް ކުރިމަތިލާން ފޯމު ލުމަށްފަހު، ވޮއިސް އަށް ދެއްވި ބަސްދީގަތުމެއްގައި މުހައްމަދު އިސްމާއިލް ވިދާޅުވީ، ބަސްދީގަތުމެއްގައި މުހައްމަދު އިސްމާއީލް ވިދާޅުވީ، ވިލިމާލޭގެ ރައްޔިތުން ތިބީ މިހާރު އެއޮތް މަރުހަލާއިން އެހެން މަރުހަލާ އަކަށް ގެންދިޔުމަށް ބޭނުންވެފައި ކަމަށެވެ. އަދި ރައްޔިތުންގެ ކަންބޮޑުވުންތައް ހުރުމުން އެ ދާއިރާ އަށް ކުރިމަތި ލުމަށް ރައްޔިތުން އެދުނު ކަމަށެވެ.

ހަމައެހެންމެ ވިލިމާލޭގެ އެކި އުމުރުފުރާ ތަކާއި ގުޅޭ ތިމާވެއްޓާއި ރައްޓެހި މާހައުލެއް ދަމަހައްޓައިދީ، ރައީސް ޑރ.މުއިއްޒުގެ ތަރައްގީއަށް ވިލިމާލޭ ރައްޔިތުންގެ އަޑު ސަރުކާރަށް އިއްވަދޭނެ ކަމަށްވެސް އޭނާ ވިދާޅުވި އެވެ.