ޣައްޒާގެ "ސޭފް ޒޯން" އަކަށް ”ބިރުވެރި“ ހަމަލާތަކެއް؛ އެތައް މުސްލިމުންނެއް ދިރިހުއްޓާ އަންދާލައިފި

ޣައްޒާގެ އަލް-މަވާސީ ސަރަޙައްދުގައި ހެދިފައިވާ "ސޭފް ޒޯން" އަށް ހައްދުފަހަނައަޅާފައިވާ އިސްރާއީލުގެ ސިފައިން ދިން ނިރުބަވެރި ހަމަލާއެއްގައި މަދުވެގެން 20 މީހުން ޝަހީދުވެ، އެތައް ބަޔަކު ޒަޚަމްވެއްޖެއެވެ. އަލްޖަޒީރާގެ ނޫސްވެރިޔާ ހާނީ މަޙްމޫދު ވިދާޅުވި ގޮތުގައި މި ހަމަލާގައި އަންހެނުންނާއި ކުޑަކުދިން ހިމެނޭހެން މުސްލިމުންތަކެއް ވަނީ ދިރިތިއްބާ އަންދާލާފައެވެ.

ރޭގެ ވަގުތެއްގައި ޑްރޯންތަކާއި ފައިޓާ ޖެޓްތައް މެދުވެރިކޮށް ދިން މި ހަމަލާ ތަކުގައި، އަލް މަވާސީ ސަރަހައްދުގައި ހުރި ޓެންޓުތަކުގައި ރޯވެ، ފަސޭހަ ކަމާއެކުގައި އަލިފާންގަޑު ވަނީ ފެތުރިގެން ގޮސްފައެވެ.

އެއާއެކު ޓެންޓު ތަކުން ފެނިގެންދިޔައީ ”ބިރުވެރި“ އަދި ހިތްދަތި މަންޒަރު ތަކެއް ކަމަށް މީހުން ސަލާމަތްކުރުމުގެ މަސައްކަތް ކުރަމުންދިޔަ މީހުންނާއި ހަވާލާދީ އަލްޖަޒީރާގެ ނޫސްވެރިޔާ ހާނީ މަޙްމޫދު ބުނެފައި ވެއެވެ.

އެގޮތުން، ހަމަލާގެ ޝިކާރައަކަށްވި ބައެއް މީހުން "ދެނެގަންނަން ނޭނގޭ ވަރަށް" އަނދައިގެން ގޮސްފައިވާ ކަމަށާއި އަނެއްބައި މީހުން "ކުދިކުދިވެ އެތިކޮޅުކޮޅަށް“ ވެފައިވާ ކަމަށް ބުނެފައިވެއެވެ.

މި ހަމަލާއާ ގުޅިގެން ބޮޑެތި އަލިފާނުގެ ހާދިސާތަކެއް ހިނގައި، ސިވިލް ޑިފެންސްގެ އެތައް ޓީމެއް މި އަލިފާން ނިއްވުމަށް މަސައްކަތް ކުރަމުންދާ ކަމަށް ވެސް ހާނީ މަޙްމޫދު ވިދާޅުވިއެވެ.

މިއީ އިސްރާއީލުން ފަލްސްތީނުގެ މުސްލިމުންގެ އަތުން ބިން ފޭރުމަށް ކުރަމުންދާ މަސައްކަތުގެ ތެރެއިން، އެމީހުން އިސްތިއުމާރު ކުރަމުންދާ ސަރަހައްދުތައް ދޫކޮށް ”ސޭފް ޒޯން“ އަށް ދިޔުމަށް ޣައްޒާގެ މުސްލިމުންނަށް އެންގުމަށްފަހު، އެ ސޭފް ޒޯނަށް ޣައްޒާގެ މުސްލިމުން ޖަމާވުމުން ދިން މިފަދަ ފުރަތަމަ ހަމަލާއެއް ނޫނެވެ.

މީގެ ކުރިންވެސް ނިރުބަވެރިން ވަނީ، 10 ”ސޭފް ޒޯން“ އަކަށް ހަމަލާދީ އެއްފަހަރާ އެތަކެއް މުސްލިމުން ޝަހީދުކޮށް އަންދާލާފައެވެ. އެހެން ކަމުން، ޣައްޒާގައި މިވަގުތު ”ސޭފް“ ނުވަތަ ރައްކާތެރި އެއްވެސް ސަރަހައްދެއް ނެތެވެ.

އިސްރާއީލުން ދެމުންދާ ހަމަލާތަކުގައި މިހާތަނަށް 44،532 ފަލަސްތީނުގެ މުސްލިމުން ވަނީ ޝަހީދުވެފައެވެ. މީގެ ތެރޭގައި އެންމެ ގިނައީ 17،492 ކުޑަކުދިންނެވެ. މީގެ އިތުރުން 105،538 މީހުން ވަނީ ޒަޚަމްވެފައެވެ. އަދި 11،000 އަށްވުރެ000 އަށްވުރެ ގިނަ މީހުން ވަނީ ގެއްލިފައެވެ.

އިސްރާއީލުން ދަނީ ދެކުނު ލެބަނަންއަށް ވެސް ހަމަލާ ދެމުންނެވެ. ހިޒްބުއްލާއާއެކު ހަދާފައިވާ ހަނގުރާމަ ހުއްޓާލުމުގެ އެއްބަސްވުމަކަށް އައުމަށްފަހުވެސް، މަޖްދަލް ޒޫން ސަރަޙައްދުގައި ހުރި ކަމަށް ބުނާ މިސައިލް ދޫކުރާ ތަނަކަށް ހަމަލާ ދިން ކަމަށް އިސްރާއީލުން ބުނެފައިވެއެވެ.