2027 ވަނަ އަހަރުގެ ދިރާސީ ކަލަންޑަރު އާންމުކޮށްފި؛ ކިޔެވުން ފެށުން ޖެނުއަރީގައި، ބޮޑު ޗުއްޓީ ޑިސެމްބަރަށް

ޖެނުއަރީ 17 ގައި ދިރާސީ އައު އަހަރު ފަށައި ޑިސެމްބަރު 9 ގައި ނިމޭ ގޮތަށް 2027 ވަނަ އަހަރުގެ ވަގުތީ ދިރާސީ ކަލަންޑަރު ތަޢުލީމީ ވުޒާރާއިން މިއަދު އާންމުކޮށްފިއެވެ.

އެ ކަލަންޑަރުގައި ދިރާސީ އަހަރު ބައްޓަންކޮށްފައި ވަނީ ޖުމްލަ 201 ދުވަހުގެ މައްޗަށެވެ. އޭގެ ތެރެއިން، ކިޔަވައިދިނުމަށް 163 ދުވަސް ކަނޑައަޅާފައިވާ އިރު އިމްތިޙާނުތަކަށް 16 ދުވަހާއި ރިޕޯޓު ތައްޔާރުކުރުމަށް 10 ދުވަސް ވަނީ ހާއްސަކޮށްފައެވެ. މީގެ އިތުރުން، މުދައްރިސުންގެ ޕްރޮފެޝަނަލް ޑިވެލޮޕްމަންޓަށް ހަތް ދުވަހާއި ކިޔަވައި ނުދޭ ފަސް ދުވަސް ހިމެނެއެވެ. މަތީ ސާނަވީގެ ކިޔެވުން ފެށުމަށް ތާވަލުކޮށްފައި ވަނީ ޖެނުއަރީ 31 ގައެވެ.

ފުރަތަމަ ޓާމުގައި 114 ސްކޫލު ދުވަސް ހިމެނޭ އިރު އެ ޓާމު ނިމެނީ ޖުލައި 15 ގައެވެ. ފުރަތަމަ ޓާމުގެ މެދު ޗުއްޓީ ކުރިއަށް ދާނީ މެއި 16 އިން 22 އަށެވެ. ފުރަތަމަ ޓާމުގެ އިމްތިޙާނު ބާއްވަން ހަމަޖެހިފައި ވަނީ ޖޫން 29 އިން ޖުލައި 10 އަށެވެ.

ދެވަނަ ޓާމު ފެށެނީ އޮގަސްޓް 1 އިން ޑިސެމްބަރު 9 އަށެވެ. އެ ޓާމުގައި 87 ސްކޫލު ދުވަސް ހިމެނެއެވެ. ދެވަނަ ޓާމުގެ މެދު ޗުއްޓީ ލިބެނީ ސެޕްޓެމްބަރު 19 އިން 25 އަށެވެ. ދެވަނަ ޓާމުގެ އިމްތިޙާނު ކުރިއަށް ގެންދިޔުމަށް ރާވާފައި ވަނީ ނޮވެމްބަރު 23 އިން ޑިސެމްބަރު ހަތަރަކަށެވެ.

ގުރޭޑް 10 އާއި ގުރޭޑް 12 ގެ ދަރިވަރުންގެ މޮކް އެގްޒާމް އޮގަސްޓް 26 އިން ސެޕްޓެމްބަރު 9 އަކަށް ބޭއްވުމަށް ތާވަލުކޮށްފައިވާ އިރު ސާނަވީ އާއި މަތީ ސާނަވީ ނިންމާ އިމްތިޙާނު އޮންނާނީ އޮކްޓޫބަރު / ނޮވެމްބަރުގައެވެ. ގްރޭޑް 11 ގެ އެޗްއެސްސީ އާއި އެޑެކްސެލް އޭއެސް އިމްތިޙާނު ކުރިއަށް ދާނީ މެއި / ޖޫންގައެވެ.

ތައުލީމީ ވުޒާރާއިން ނެރުނު ދިރާސީ ކަލަންޑަރު https://t.co/2ignQ7KL68 އަށް ވަދެގެން ބަލައިލެވޭނެއެވެ.