"އީދު އުފާ އިމުގެތެރޭ" ނަމުގައި ބޮޑު ކެމްޕެއިނެެއް ފަށަައިފި
"އީދު އުފާ އިމުގެތެރޭ" ނަމުގައި ބޮޑު ކެމްޕެއިނެެއް ފަށަައިފި އެވެ
މިއީ ގިނަ އަދަދެއްގެ މަދަނީ ޖަމިއްޔާތައް ގުޅިގެން އުފައްދާފައިވާ "ފަލަސް" ހަރަކާތުން ފެށި ކެމްޕެއިނެކެވެ. "ފަލަސް" ހަރަކާތަކީ މިދިޔަ އަހަރު އުފެއްދި ހަރަކާތެކެވެ. އެއީ ރާއްޖޭގެ ދައުވަތުގެ މައިދާނުގައި އެންމެ ހަރަކާތްތެރި ޖަމިއްޔަތުއް ސަލަފުގެ އިސް ނެގުމަށް ރާއްޖޭގެ ކޮންމެ އަތޮޅަކުން ޖަމިއްޔާއެއް ހިމެނޭގޮތަށް އިފްތިތާހު ކުރި ހަރަކާތެކެވެ.
އެ ހަރަކާތުން "އީދު އުފާ އިމުގެތެރޭ" ނަމުގައި ޚާއްސަ ކެމްޕެއިނެއް ފެށީ އީދުގެ ހަރަކާތްތައް އިސްލާމްދީނުގެ އިމުގެ ތެރޭގައި އެ ދީން ހުއްދަ ކުރާ ގޮތަށް ކުރިއަށް ގެންދިއުމަށް ބާރު އެޅުމުގެ ގޮތުންނެވެ.
މި ކެމްޕެއިން ފެށީ އދ. ދަނގެތީގަ ރޭ އޮތް "އިމުގެ ތެރެއިން" ދަރުސްގަ އެެވެ.
ރޭ އޮތް ދަރުސްގައި ޖަމިއްޔަތުއް ސަލަފުގެ އިލްމުވެރީންގެ މަޖިލީހުގެ ރައީސް އަދި އެ ޖަމިއްޔާގެ ނާއިބު ރައީސް އައްޝައިހް އަހްމަދު ސަމީރު އާއި ޖަމިއްޔަތުއް ސަލަފުގެ ދައުވާ މެނޭޖަރު އައްޝައިހް މުޖްތަބާ ހަމީދު ވަނީ އިސްލާމް ދީނުގައި ޢީދު ލައްވާފައިވާ ސަބަބުތަކާއި އެފަދަ މަތިވެރި މުނާސަބަތެއް ފާހަގަ ކުރަން ޖެހޭ ގޮތް ވަރަށް ތަފްސީލްކޮށް ވިދާޅުވެ ދެއްވާފަ އެވެ.
އަދި ޢީދު ފަދަ އިސްލާމީ މުނާސަބަތެއްގައި ދީން ހުއްދަ ނުކުރާ ފާހިޝް ކަންކަން ކުރުމާއި އެފަދަ ކަންކަން ފެތުރުމާއި އެފަދަ ކަންކަމަށް ހަރަދު ކުރުމުގެ ނުބައިކަމާއި ނުރައްކާތެރިކަން ބަޔާން ކޮށް ދެއްވި އެވެ.
އީދު ފާހަގަކުރުމުގައި ދަނގެއްޗަކީ ނަމޫނާ ރަށެއް
ރޭ މި ހަރަކާތް ފެށި އދ. ދަނގެއްޗަކީ އިސްލާމީ އުސޫލުތަކާއި އެއްގޮތަށް އީދު ފާހަގަ ކުރުމުގައި މުޅި ރާއްޖޭގައި ވެސް ނަމޫނާ ރަށެކެވެ.
އީދުގެ ކުޅިވަރުތަކާއި އެކި ހަރަކާތްތައް އިސްލާމީ އުސޫލުގެ ތެރެއިން އެންމެ ފުޅާކޮށް ކުރިއަށް ގެންދާ ރަށަކީ ދަނގެއްޗެވެ. އެކަން ރާއްޖޭގައި ފެށީ އެ ރަށުގެ ޖަމިއްޔަތުއް ޤަލަމުންނެވެ.
މިދިޔަ ތިން އަހަރުވެސް ތަފާތު ކުޅިވަރު ހަރަކާތްތަކާއި މުނިފޫހިފިލުވުމުގެ ވަރަށް ޝައުގުވެރި ހަރަކާތްތަކެއް އެެ ރަށުގައި ކުރިއަށް ގެންގޮސްފައިވެ އެވެ. އެ ހަރަކާތްތަކުގައި ބައިވެރިވުމަށާއި އީދު އުފާ ފާޅުކުރުމަށް ވަރަށް ގިނަ އަދަދެއްގެ ބަޔަކު އެ ރަށަށް ޒިޔާރަތް ވެސް ކުރެ އެވެ.
ޤަލަމްގެ މި ހަރަކާތްތަކުން ނަމޫނާ ލިބި ރާއްޖޭގެ އެހެން ރަށްރަށުގައި ވެސް އިސްލާމީ އުސޫލުތަކާއި އެއްގޮތަށް އީދުގެ ހަރަކާތްތައް ބައްޓަން ކުރަން ބައެއް ކައުންސިލްތަކާއި މަދަނީ ޖަމިއްޔާތަކުން މަސައްކަތް ކުރެ އެވެ.
ރޭ އިފްތިތާހު ކުރި "އީދު އުފާ އިމުގެތެރޭ" ކެމްޕެއިންގެ ދަށުން މުޅި ރާއްޖެއަށް އެ މައުލޫމާތު ފެތުރުމަށް ޚާއްަސަ މަސައްކަތްތަކެއް ކުރުަމަށް "ފަަލަސް" ހަރަކާތުން ވަނީ ނިންމާފަ އެވެ. އެ ހަރަކާތުގައި ހިމެނޭ ޖަމިއްޔާތަކުން އެކި ރަށްރަށުގެ ކައުންސިލްތަކާއި މަދަނީ އިތުރު ޖަމިއްޔާތައް ގުޅިގެން ކުރިއަށް އޮތް އަލްޙާ އީދު, އިސްލާމީ އުސޫލުތަކާއި އެއްގޮތަށް ފާހަގަ ކުރުމަށް ހާއްސަ މަސައްކަތްތަކެއް ކުރާނެ އެެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
