އަދަދު ނޫހުން ކުރަމުން އެދަނީ ސިޔާސީ މަސައްކަތެއް: މިނިސްޓަރ ޝިޔާމް

އަދަދު ނޫހުން މިހާރު ކުރަމުންދަނީ ސިޔާސީ މަސައްކަތެއް ކަމަށް މިނިސްޓަރ ޝިޔާމް ވިދާޅުވެއްޖެއެވެ.

މިނިސްޓަރ މިހެން ވިދާޅުވެފައިވަނީ، މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.

މިނިސްޓަރ ޝިޔާމް ވިދާޅުވި ގޮތުގައި، އަދަދު ނޫހުން މީގެ ކުރިން ވާނީ އޮން އެއަރގަ އެއީ ސަރުކާރާއި ދެކޮޅަށް މަސައްކަތްކުރާ ނޫހެއް ކަމުގައި "ޑިކްލެއަރ" ކޮށްފައެވެ. އަދި ޝިޔާމް ފާހަގަކުރެއްވި ގޮތުގައި، އަދަދު ނޫހުން މިހާރު ކުރަމުންދަނީ ސިޔާސީ މަސައްކަތެކެވެ.

އަދަދު ނޫސް އިން މީގެ ކުރިން އޮންނާނެ ހަމަ އޮން އެއަރގަ ޑިކްލެއަރ ކޮށްފަ ތިމަންނަމެންނަކީ މިއީ ސަރުކާރާއި ދެކޮޅު ނޫހެކޭ.

މިނިސްޓަރ ޝިޔާމް ވިދާޅުވިއެވެ.

އަދަދު ނޫހާއި ބެހޭގޮތުން ވާހަކަދައްކަވަމުން މިނިސްޓަރ ޝިޔާމް ވަނީ، އެމްޑީޕީން ކުރަމުންދާ މަސައްކަތް އަދަދު ނޫހުން ކުރަމުންދާކަންވެސް ފާހަގަކޮށްފައެވެ.

އެމްޑީޕީ އަޅުގަނޑުމެންނަށް ފެނިގެން މިދިޔައީ ލޯކަލް ކައުންސިލް އިންތިހާބާއި ވަރަށް ގާތްވެފަ އޮށްވާ. އޭގެ ކުރިން އެމްޑީޕީއެއް ނުފެނޭ. އަދަދު ނޫހުގެ އިސްވެރިން ފެންނަ ކޮންމެ ފަހަރަކުވެސް އަޅުގަނޑު ދަންނަވަން މިހާރު އެމްޑީޕީ ނެތީމަ ތި ބޭފުޅުން ދެއްތޯއޭ މިހާރު އަސްލު އޮޕޮޒިޝަން ޕާޓީއަކުން ކުރަން ޖެހޭ މަސައްކަތްތައް ކުރައްވަނީ. ވަރަށް ފަހުރުވެރިކަމާއެކު އެ ބޭފުޅުން އެ ވާހަކަތައް އަޅުގަނޑުމެން އަނެއްހެން ސިޔާސީ ބަހުން ދައްކާ ވާހަކައެއް ކަމަކު، އެ ބޭފުޅުން ވަރަށް ފަހުރުވެރިކަމާއެކީގަ އެކަންތައް ވަރަށް ބޮޑަށް ބަލައިގަތް. އަދަދު ނޫސް މިއަދު ކުރަމުންދާ މަސައްކަތަކީ ސިޔާސީ މަސައްކަތެއް.

މިނިސްޓަރ ޝިޔާމް އިތުރަށް ވިދާޅުވިއެވެ.

އަދަދު ނޫހުން ރައީސް ޑރ. މުހައްމަދު މުއިއްޒު ޒިނޭކުރި ކަމަށް ތުހުމަތުކޮށް ނެރުނު "އައިޝާ" ޑޮކިއުމެންޓަރީ އާއި ގުޅިގެން ފުލުހުން ވަނީ އަދަދު އޮފީހަށް ކޯޓު އަމުރެއްގެ ދަށުން ވަދެ، އެ ތަނުން ހެކި ކަމަށް ބެލެވޭ ގިނަ އިކުއިޕްމަންޓްތަކެއް ފުލުހުންގެ ބެލުމުގެ ދަށަށް ގެންގޮސްފައެވެ.

މީގެ އިތުރުން، ފުލުހުން ވަނީ މިއަދު އެ ނޫހުގެ މެނޭޖިންގ އެޑިޓަރ ވެސް ފުލުހުންގެ އިދާރާއަށް ހާޒިރުކޮށްފައެވެ. މި ތަހުގީގާއި ގުޅޭގޮތުން ފުލުހުން އިތުރު މައުލޫމާތުތަކެއް އަދި ދީފައެއް ނުވެއެވެ.