އީރާނުން ނިއުކްލިއަރ ހަތިޔާރު ނުގެންގުޅުމަށް އެއްބަސްވެއްޖެ; މުޖުތަބާ ޚާމަނާއިއާވެސް ބައްދަލުކުރަން ބޭނުން: ޓްރަމްޕް

އީރާނުން ނިއުކްލިއަރ ހަތިޔާރު ނުގެންގުޅުމަށް އެއްބަސްވެފައިވާ ކަމަށާއި، ކުރިއަށް އޮތް ތަނުގައި އެ ގައުމުގެ އެންމެ މަތީ ވެރިޔާ މުޖުތަބާ ޚާމަނާއީއާ ބައްދަލުކުރެއްވުމަކީ އެކަށީގެންވާ ކަމެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.

ބުދަ ދުވަހު ދިން އިންޓަވިއުއެއްގައި ޓްރަމްޕް ބުނީ، އީރާނުން މިހާރުވެސް ނިއުކްލިއަރ ހަތިޔާރު ނުއުފެއްދުމަށް އެއްބަސްވެފައިވާ ކަމަށެވެ. އަދި ދެ ގައުމުގެ ދެމެދުގައި އުފެދިފައިވާ ހަމަނުޖެހުންތައް ނައްތާލުމަށް ކުރެވޭ މަޝްވަރާތަކުގައި ޚާމަނާއީގެ ބައިވެރިވުން އެބައޮތް ކަމަށާއި، އީރާނުގެ ރައްޔިތުން އޭނާއަށް ވަރަށް ބޮޑަށް އިހުތިރާމް ކުރާ ކަމަށްވެސް ޓްރަމްޕް ބުނެފައިވެއެވެ.

ޚާމަނާއީގެ ސިއްހީ ހާލަތާ ގުޅޭގޮތުން ވާހަކަދައްކަމުން ޓްރަމްޕް ބުނީ، އޭނާގެ ހާލު އެހާ ރަނގަޅު ނޫން ކަމަށް މައުލޫމާތު ލިބިވަޑައިގަންނަވާ ކަމަށެވެ. ނަމަވެސް މަޝްވަރާތަކުގެ ކަންކަމުގައި އޭނާގެ ހުއްދަ ލިބެމުންދާ ކަމަށް ބުންޏެވެ. ޓްރަމްޕް އިތުރަށް ބުނީ، އަދި މިހާތަނަށް ޚާމަނާއީއާ ބައްދަލުވެފައި ނުވި ނަމަވެސް، ކަންތައްތައް ރަނގަޅަށް ދާނަމަ ކުރިއަށް އޮތް ތަނުގައި ބައްދަލުކުރަން ބޭނުންވާ ކަމަށެވެ.

ފެބްރުއަރީ 28 ވަނަ ދުވަހު އެމެރިކާއާއި އިޒްރޭލުން ދޭން ފެށި ހަމަލާތަކާ ގުޅިގެން އުފެދުނު ހަނގުރާމައަކީ ކާމިޔާބީއެއްގެ ގޮތުގައި ޓްރަމްޕް ސިފަކުރިއެވެ. އޭނާ ބުނި ގޮތުގައި އީރާނުގެ އަސްކަރިއްޔާ ވަނީ ބަލިކޮށްލެވިފައެވެ. ނަމަވެސް މި ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރަށް ބޮޑެތި ލޮޅުންތަކެއް އަރާފައިވާއިރު، ނޮވެމްބަރު މަހު އޮންނަ އެމެރިކާގެ ކޮންގްރެސް އިންތިޚާބާ ދިމާކޮށް މި ހަނގުރާމައަށް އޮތް ތާއީދު އެމެރިކާގެ ރައްޔިތުންގެ މެދުގައި ވަނީ ކުޑަވެފައެވެ.

"އީރާނުގެ މައްސަލައަކީ ބޮޑު ކާމިޔާބީއެއް. އަޅުގަނޑުމެން މިދަނީ އެއްބަސްވުމަކަށް އައުމަށް މަސައްކަތް ކުރަމުން. އެކަން ކާމިޔާބުވެއްޖެނަމަ ވަރަށް ރަނގަޅު. ނުވިނަމަ ދެން އޮތް ގޮތަކަށް ކުރިއަށް ދާނީ،" ޓްރަމްޕް ބުންޏެވެ.

ދެން އޮތް ގޮތަކީ ކޮބައިކަން ޓްރަމްޕް ސީދާ ނުބުނި ނަމަވެސް، މީގެ ކުރިން އޭނާ ވަނީ އެއްބަސްވުމަކަށް ނާދެވިއްޖެނަމަ އަލުން ހަމަލާތައް ދޭން ފަށާނެ ކަމުގެ އިންޒާރު ދީފައެވެ.