ފަލަސްތީނުގެ ޝައިޚް މަޙްމޫދު އަލްޙަސަނަތު އިސްލާމީ އުއްމަތަށް ފޮނުއްވި ކުރު މެސެޖެއް

ފަލަސްތީނު މިއަދު ވެއްޓިފަިއ އޮތް ޙާލަތު ފެނި އުންމަތް ހޭނުލާ ނަމަ، ބުނާ ބަހަކުން އަންނާނެ ބަދަލަކާމެދު، ފަލަސްތީނުގެ ޝެއިޚް މަޙްމޫދު އަލްޙަސަނަތު ސުވާލު އުފައްދަވައިފިއެވެ.

"ފަލަސްތީނުގެ 30،000 ޝަހީދުންނާއި، 70000 ޒަޚްމްވެފައިވާ މީހުންނާއި އަދި 2 މިލިއަން ގެދޮރު ނެތް މީހުންނަށް އުއްމަތް ހޭލައްވާނުލެވޭނަމަ އަޅުގަނޑުގެ ބަސްތަކުން ކުރާނީ ކޮން އަސަރެއް؟ އިތުރަށް ބުނާނީ ކާކަށް ކީކޭ؟"

ޝައިޚް މަޙްމޫދު އަލްޙަސަނަތު ވިދާޅުވިއެވެ.

ޝެއިޚް މިފަދައިން ސުވާލުކުރައްވާފައިވަނީ، އޭނާ ދެއްވި އެންމެ ކުރު ޚުޠުބާގައެވެ.

ނިރުބަވެރި އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކުގެ ސަބަބުން، ޙާލަތު ދަނީ އަދިވެސް ދުވަހެއް ދުވަހަކަށް ގޯސް ވަމުންނެވެ. އެގޮތުން އޮކްޓޫބަރު މަހުގެ 7 ވަނަ ދުވަހަށް ފަހު، މި ފެށުނު އޭޕްރިލް މަހުގެ ނިޔަލަށް 33،301 މީހުން ވަނީ ޝަހީދުކޮށްލާފައެވެ.

ހަމައެކަނި ހުޅަނގުއައްސޭރީގައިވެސް 456 މީހުން ޝަހީދު ކޮށްލާފައިވާއިރު މީގެ ތެޜޭގައި 117 އަށް ވުރެ ގިނަ ކުޑަކުދިން ހިމެނެއެވެ.

ފަލަސްތީނުގެ ސިއްޙަތާ ބެހޭ ވުޒާރާއިން ހާމަ ކުރެއްވި ގޮތުގައި ޣައްޒާގައި ޝަހީދުވި މީހުންގެ އަދަދު ވަނީ 32،845 އަށް އަރާފައެވެ. މީގެ ތެރޭގައި 13،000 އަށް ވުރެ ގިނަ ކުޑަކުދިން ހިމެނޭ އިރު، 8،400 ޝަހީދުންނަކީ އަންހެނުންނެވެ. 75،392 މީހުން ޒަޚަމްވެފައި ވާއިރު، ގެއްލިގެން ހޯދަމުންދާ މީހުންގެ އަދަދު ވަނީ 8،000 އަށް އަރާފައެވެ.

ހަނގުރާމައަށް 179 ދުވަސް ވީއިރު ކާބޯތަކެތީގެ ދަތިކަމުގެ ސަބަބުން އާބާދީގެ ބޮޑު ބައެއް ދަނީ ބަނޑުހައިހޫނު ކަމުގައި މަރުވަމުންނެވެ. ޣައްޒާގެ އުތުރުގައި 300،000 އެއްހާ މީހުން ތާށިވެފައި ތިބިއިރު، ކާބޯތަކެތި ހިމެނޭ ގޮތަށް އެހީ ފޯރުކޮށްދިނުން އިސްރާއީލުން ހުއްޓުވުމުން ފާއިތުވި ހަފްތާތަކުގައި ޖަނަވާރުތަކުގެ ކާނާ ކެއުމަށް ވަނީ މީހުންނަށް މަޖުބޫރުވެފައެވެ. އަދި ފާއިތުވި ހަފްތާތަކުގައި ރަނގަޅު ކާނާ ނުލިބި، 27 ކުޑަކުދިން ވަނީ ދުނިޔެ ދޫކޮށްފައެވެ.

ޣައްޒާގައި އަލަށް އުފަންވާ ކުދިން މަރުވާ މިންވަރު ވަރަށް ބޮޑަށް އިތުރުވަމުންދާއިރު، އުފަންވާ ކުދިންގެ ބަރުދަން ދަށް ކަމަށް ދުނިޔޭގެ ސިއްހަތު ޖަމިއްޔާއިން ޣައްޒާގައި ތިބި ޑޮކްޓަރުންނާ ހަވާލާދީ ބުނެފައެވެ.

"އެކި ޑޮކްޓަރުން، ޚާއްސަކޮށް ވިހެއުމުގެ ހޮސްޕިޓަލްތަކުގައި ތިބި ޑޮކްޓަރުން، ރިޕޯޓް ކުރަމުންދަނީ އުފަންވާއިރުވެސް ބަރުދަން މާ ލުއި ކުދިންގެ އަދަދު ވަރަށް ބޮޑަށް އިތުރުވާ ކަމަށާއި، ހަމައެކަނި އުފަންވާ ކުދިން މާ ކުޑަކަމުން ނިއޯނޭޓަލް ޕީރިއަޑުން ސަލާމަތް ނުވެވޭ"

ޑަބްލިޔުއެޗްއޯގެ ތަރުޖަމާނު މާގަރެޓް، ޖެނީވާގައި ބޭއްވި ބްރީފިންގައި ވިދާޅުވިއެވެ.