ރ. ވާދޫގައި ހަރުދަނާ ޖީލެއް ބިނާ ކުރުމަށް ދަރިވަރުންނަށް ”ކާފިއު“ އެއް

ކުށް މަދު، ހޭލުންތެރި އަދި އަމާން މުޖުތަމައެއް ބިނާކުރުމަށް ކުރަމުންދާ މަސައްކަތުގެ ދަށުން، ސްކޫލް ދަރިވަރުންގެ އަޚްލާޤީ ކަންކަން ހަރުދަނާ ކުރުމަށްޓަކައި ޚާއްޞަ ފިޔަވަޅުތަކެއް އަޅަން ރ. ވާދޫ ކައުންސިލުން ނިންމައިފިއެވެ.

ވާދޫ ކައުންސިލުން ނެރުނު އިއުލާނެއްގައި ބުނި ގޮތުގައި، ހަރުދަނާ ޖީލެއް ބިނާކުރުމަށް މަދަރުސީ ދައުރުގައި ކުދިންނަށް ދެވޭ ތަރުބިއްޔަތަކީ ނުހަނު މުހިންމު ދައުރެއް އަދާކުރާ ކަމެކެވެ.

ނަމަވެސް، އެ ރަށުގެ ބައެއް ދަރިވަރުންގެ ފަރާތުން ކަންބޮޑުވާންޖެހޭ ފަދަ ނޭދެވޭ އަމަލުތަކެއް ފެންނަމުންދާތީ، އެކަންކަން ހައްލުކުރުމަށްޓަކައި އަވަސް ފިޔަވަޅުތަކެއް އަޅަން ޖެހިފައިވާ ކަމަށް ކައުންސިލުން ވަނީ ފާހަގަކޮށްފައެވެ.

މިގޮތުން ދަރިވަރުންނާއި ބެލެނިވެރިންގެ ސަމާލުކަމަށްޓަކައި ކައުންސިލުން ވަނީ މުހިންމު އުސޫލުތަކަކަށް އަމަލުކުރުމަށް އިލްތިމާސްކޮށްފައެވެ. އޭގެ ތެރޭގައި:

1) ބެލެނިވެރިޔަކާއި ނުލައި ރޭގަނޑު 9:00 ގެ ފަހުން ބޭރުގައި ނޫޅުން.

2) އިރުއޮއްސުމަށްފަހު މައިޒާންތަކާއި، ޕާކުތައް، އަދި އިޖުތިމާއީ ގޮތުން ތަރައްގީކޮށްފައިވާ ބީޗުތައް ބޭނުން ނުކުރުން.

3) އިރުއޮއްސުމަށްފަހު ކުޅިވަރު ކުޅޭ އެއްވެސް ތަނެއް ބޭނުން ނުކުރުމާއި، ނަމާދު ވަގުތުތަކުގައި ކުޅިވަރުގެ އެއްވެސް ހަރަކާތެއް ނުހިންގުން.

4) ބެލެނިވެރިޔަކާއި ނުލައި ކަނޑުތޮއްޓަށް ނޭރުމާއި، ރަށުން ބޭރަށް ދަތުރު ނުކުރުން.

5) އުޖޫރައެއް ހޯދުމަށް ނުވަތަ އެނޫންވެސް ބޭނުމެއްގައި އުމުރާއި ނުގުޅޭ އެއްވެސް މަސައްކަތެއް ނުކުރުން.

6) ދުންފަތުގެ އިސްތިއުމާލު ނުކުރުމާއި، ދުންފަތް ގަނެވިއްކުމުގެ އެއްވެސް މުއާމަލާތެއްގައި ބައިވެރިނުވުން ހިމެނެއެވެ.

ވާދޫ ކައުންސިލުން އިތުރަށް ބުނީ، މި އުސޫލުތަކާއި ޚިލާފުވާ ދަރިވަރުންގެ ކަންކަން މިހާރަށްވުރެ ގާތުން ބަލައި، އެފަދަ ކަންކަމުގައި ހަރުދަނާ ފިޔަވަޅުތަކެއް އަޅަމުން ގެންދާނެ ކަމަށެވެ. އަދި ޤާނޫނުތަކާއި ޤަވާއިދުތަކާ އެއްގޮތަށް ދަރިވަރުންގެ އަމަލުތައް ބެހެއްޓުމަށް ނަސޭހަތްތެރިވަމުން، މިފަދަ ކަންކަމުގައި ދަރިންގެ ކަންކަމަށް އިތުރަށް ފަރުވާތެރިވެ، ޒިންމާދާރުކަމާއެކު ބެލެހެއްޓުމަށް ހުރިހާ ބެލެނިވެރިންނަށް ކައުންސިލުން ވަނީ އިލްތިމާސްކޮށްފައެވެ.