ދުބާއީގެ ކުންފުންޏަކުން ރާއްޖޭގައި ހެލިކޮޕްޓަރާއި އެވްޓޯލް އޮޕަރޭޓްކުރުމަށް ޝައުގުވެރިވެއްޖެ

ދުބާއީގެ ކުންފުންޏަކުން ރާއްޖޭގައި ހެލިކޮޕްޓަރާއި އެވްޓޯލް އޮޕަރޭޓްކުރުމަށް ޝައުގުވެރިވެއްޖެއެވެ.

ރާއްޖޭގައި އިލެކްޓްރިކް އެއާކްރާފްޓް ނުވަތަ އެވްޓޯލް އަދި ޑްރޯން ޖެއްސުމަށް ޚާއްޞަ ވާޓިޕޯޓާއި ޑްރޯންޕޯޓްތަކެއް ހެދުމަށް ރީޖަނަލް އެއާޕޯޓްސްއިން ދުބާއީގެ ދެ ކުންފުންޏަކާ ގުޅިގެން މިހާރުވަނީ މަސައްކަތް ކުރަން ނިންމައިފައެވެ.

ރީޖަނަލް އެއާޕޯޓްސްގެ މެނޭޖިންގ ޑިރެކްޓަރު އަޙްމަދު މުބީން މަޢުލޫމާތު ދެއްވިގޮތުގައި މި ޕްރޮޖެކްޓް ކުރިއަށް ގެންދިއުމަށް ޕަބްލިކް ޕްރައިވެޓް ޕާޓްނަޝިޕެއްގެ ދަށުން ދުބާއީގެ ކެޕިޓަލް ވިންގްސް އަދި އެއާ ޝެޓޯ ޑީޑަބްލިއުސީއާ އެކު މަސައްކަތް ކުރުމަށް ވަނީ ނިންމާފައެވެ. މި ދެ ކުންފުންޏަކީ ދުބާއީގެ އޭވިއޭޝަން ދާއިރާގައި މަޝްހޫރު ދެ ކުންފުނި ކަމަށްވެސް އޭނާ ވިދާޅުވިއެވެ.

މުބީން އިތުރަށް ވިދާޅުވީ މިހާރު ވަނީ މި ޕްރޮޖެކްޓަށް ޝައުގުވެރިކަން ފާޅުކޮށްފައި ކަމަށާއި، ދެން އޮތީ ޕްރޮޕޯސަލް ހުށަހެޅުމަށް އެދުމުން ތަފްސީލުތަކާއެކު ހުށަހެޅުން ކަމަށެވެ.

ދުބާއީގެ ނޫސްތަކުގައި ރިޕޯޓުކޮށްފައިވާ ގޮތުގައި މި ޕްރޮޖެކްޓުގެ ދަށުން އެއާ ޓެކްސީ އޮޕަރޭޝަންތަކާއި، ކޮމާޝަލް ކާގޯ އަދި ފަސިންޖަރުން އުފުލުމުގެ އިތުރުން އެވްޓޯލް އަދި ޑްރޯންތައް ޖެއްސުމަށް ޚާއްޞަ ސަރަޙައްދުތައް ރަށްރަށުގައި ޤާއިމުކުރެވޭނެއެވެ.

ވާޓިޕޯޓްތަކަކީ ހެލިކޮޕްޓަރު ފަދަ އިލެކްޓްރިކް އުޅަނދުތައް ކަމުގައިވާ އެވްޓޯލް ޖެއްސުމަށް ޚާއްޞަކުރެވިފައިވާ ސަރަޙައްދުތަކެކެވެ. މި ޕްރޮޖެކްޓުގެ ދަށުން ރާއްޖޭގެ އެކި ސަރަޙައްދުތަކުގައި 100 އަށްވުރެ ގިނަ ވާޓިޕޯޓް އަދި 500 ޑްރޯންޕޯޓް ޤާއިމުކުރުމަށް ވަނީ ރޭވިފައެވެ.

އެއާ ޝެޓޯގެ ޗެއާޕާސަން ޑރ. ސާމިރު މުހައްމަދު ވިދާޅުވީ، ރާއްޖެއަކީ ޓޫރިޒަމަށް މަގްބޫލު މަންޒިލަކަށްވާ އިރު ފަސޭހައިން ދަތުރުފަތުރު ކުރެވޭނެ ގޮތްތައް ހަމަޖެހުން ވަރަށް މުހިއްމު ކަމަށެވެ.

"އަޅުގަނޑުމެން ކުންފުނީގެ އެވްޓޯލް އާއި ހެލިކޮޕްޓަރުތަކުގެ އެހީގައި ޓޫރިސްޓުންނަށް މިހާރަށް ވުރެ ފަސޭހަކަމާ އެކު ދަތުރުފަތުރު ކުރެވޭނެ،"

އޭނާ ވިދާޅުވެފައިވެ އެވެ.