ކުރިއަށް އޮތް ދެތިން ހަފްތާ ތެރޭ 300 އެއްހާ މަޝްރޫއުގައި ސޮއި ކުރެވޭނެ: ރައީސް މުޢިއްޒު

ކުރިއަށް އޮތް ދެތިން ހަފްތާ ތެރޭގައި 300 އެއްހާ ތަރައްޤީގެ މަޝްރޫޢު ކުރިއަށް ގެންދިޔުމަށް އެއްބަސްވުންތަކުގައި ސޮއި ކުރެވޭނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

މ. މުލީ އެއާރޕޯޓް ހުޅުވުމަށް ބޭއްވި ޚާއްސަ ރަސްމިއްޔާތުގައި ވާހަކަދައްކަވަމުން ރައީސް މުޢިއްޒު ވިދާޅުވީ، މ އަތޮޅުގެ ރައްޔިތުންނަށް އެމަނިކުފާނު ވެވަޑައިގެންނެވި ހުރިހާ ވަޢުދުފުޅެއް ފުއްދަވާނެ ކަމަށެވެ. އެ ވަޢުދުތައް ފުއްދުމަށް ޢަމަލީ ގޮތުން ކުރަންޖެހޭ ކަންކަން ކުރުމަށް ވާންޖެހޭ ތައްޔާރީތައް ވަމުންދާ ކަމަށާ، އެއްވެސް ވަޢުދެއް މަތީން ހަނދުމަފުޅު ނުނެތޭ ކަމަށް އެމަނިކުފާނު ވިދާޅުވިއެވެ.

މިއާއެކު ރައީސް ވިދާޅުވީ، އެމަނިކުފާނު ވެރިކަމާއި ހަވާލުވެވަޑައިގެންނެވި އިރު މުޅި ރާއްޖޭގެ އެކި ކަންކޮޅުތަކުގައި އެކި ސަބަބުތަކާއި ހުރެ ހުއްޓިފައިހުރި ގިނަ މަޝްރޫޢުތަކެއް ހުރި ކަމަށެވެ.

މިހާރު އޭގެ ތެރެއިން ވަރަށް ގިނަ މަޝްރޫޢުތައް ރީ ސްޓާޓް ކުރުމަށް މިވަނީ ހުރިހާ ކަމެއް ނިމިފައި. އޭގެ ތެރެއިން އަލަށް ފެށުމަށާ އަދި ހުއްޓިފައި ހުރި ގިނަ މަޝްރޫޢުތަކެއް ފެށުމަށް އަޅުގަނޑުމެން މިހާރުވެސް ވާނެ 390 އެކި ކުންފުނިތަކާ ސޮއި ކޮށްފައި. މި ސަރުކާރުން. މި އަހަރުގެ ތެރޭގައި. އެއީ ސަރުކާރުގެ އެކިއެކި ކުންފުނި ތަކުގެ ތެރެއިން ކުރާ މަސައްކަތް

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު

އެ މަސައްކަތްތައް ހަވާލުކުރެވުނީ އެ ކުންފުނިތަކުން އެހެނިހެން މަޝްރޫޢުތައްވެސް ހިންގަމުންދާ ރަށްރަށުގައި ކަމަށާަ، އެފަދައިން ކަން ކުރެއްވީވެސް ޚަރަދު ކުޑަކޮށް ކަންކަން ކުރިއަށް ގެންދެވުމަށް ކަމަށް ރައީސް ވިދާޅުވިއެވެ.

އަދި އެ މަސަކަތްތައް ބާރަށް ކުރިއަށް ގެންދިޔުމަށް ކޮންމެ ހަފްތާއަކުވެސް އެމަނިކުފާނު މިނިސްޓަރުންނާއި ބައްދަލުކުރައްވައި މަޝްވަރާ ކުރައްވާ ކަމަށް ވިދާޅުވިއެވެ.

މީގެ އިތުރުން، މި ހިނގަމުންދާ ހަފްތާއާއި ކުރިއަށްއޮތް ދެތިން ހަފްތާތެރޭގައި 300 އަށްވުރެ ގިނަ މަޝްރޫޢުގައި ސޮއިކުރެވިގެންދާނެ ކަމަށް އެމަނިކުފާނު ވިދާޅުވިއެވެ.

މިހަފްތާ ތެރޭގައި، އަދި ކުރިއަށްއޮތް ދެތިން ހަފްތާތެރޭގަޔާއި އެކީގައި، އަދި އިތުރު ގާތްގަނޑަކަށް 300 އެއްހާ މަޝްރޫޢުގައި ސޮއި ކުރެވޭނެ. އޭގެ ތެރޭގައި ޕްރައިވެޓް ސެކްޓާއާ ގުޅުވާލާ މަޝްރޫޢުވެސް ހިމެނޭ. އެހެންވީމާ 700 ނޫނީ 800 އެއްހާ މަޝްރޫޢު މިދިޔަ ފެބްރުއަރީ މަހުން ފެށިގެން، މި ގާތްގަނޑަކަށް ހަތަރު މަސްތެރޭގައި އަޅުގަނޑުމެން މި ހަވާލު ކުރަނީ ކުންފުނިތަކާ. ބާރު ސްޕީޑްގައި މަސައްކަތްތައް ގެންގޮސް ނިންމުމަށް.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު

އެހެންކަމުން، އެކި ދާއިރާތަކުން، ރާއްޖޭގެ ހުރިހާ ކަންކޮޅުތަކެއްގައި ކުރިއަށް ގެންދިޔުމަށް އެމަނިކުފާނު ވަޢުދުވެވަޑައިގެންނެވި މަޝްރޫޢުތައް ކުރިއަށް ގެންދިޔުމަށް ބޮޑު ސަމާލުކަމެއް ދެއްވާ ކަމަށާ، އެކަން ކުރެވޭނެ މަގުފަހި ކޮށްދެއްވަމުންދާ ކަމަށް ރައީސް ވިދާޅުވިއެވެ.