ރާއްޖޭގައި އެޅޭ ފުރަތަަމަ އަންޑަރ ވޯޓާ ޓަނެލް މާލެ އާއި ރަސްމާލެ އާ ދެމެދު އަޅައި ދެ ސިޓީ ގުޅުވާލަނީ!

ދިވެހިރާއްޖޭގައި އެޅޭ ފުރަތަމަ އަންޑަރވޯޓަރ ޓަނެލް މާލެއާއި ދެމެދު އަޅައި، އެ ދެ ސިޓީ ޓަނެލް އަކުން ގުޅުވާލައްވާނެ ކަމަށް ރައީސުލްޖުމުހޫރިއްޔާ ޑރ މުހައްމަދު މުއިއްޒު މިރޭ ވިދާޅުވެއްޖެއެވެ.

ރައީސުލްޖުމްހޫރިއްޔާ މިކަން އިޢުލާން ކުރެއްވީ ހުސްވެފައިވާ މާލޭ މޭޔަރ ކަމުގެ މަގާމަށް އިންތިހާބުވެ ވަޑައިގެންފައިވާ އާދަމް ޢާޒިމް ހުވައި ކުރެއްވުމުގެ ރަސްމިއްޔާތުގައި ވާހަކަ ދައްކަވަމުންނެވެ.

މިރޭގެ ޖަލްސާގައި ވާހަކަ ދައްކަވަމުން ރައީސުލްޖުމުހޫރިއްޔާ ވިދާޅުވީ، ސަރުކާރުގެ އަމާޒަކީ، މިފަސް އަހަރު ނިމޭއިރު، ބޯހިޔާވަހިކަން ނުލިބޭ އެއްވެސް ދިވެއްސެއް ނުތިބުން ކަމަށްވާއިރު، މާލެ އާއި މުޅި ރާއްޖެއަށްވެސް ދިމާވެފައިވާ ބޯހިޔާވަހިކަމުގެ މައްސަލަ ހައްލު ކުރުމަށް އަދިވެސް އިތުރަށް ބިން ހިއްކަން ޖެހޭ ކަމަށެވެ.

އެގޮތުން، ރަސްމާލޭގެ މަޝްރޫޢު ފެއްޓެވީވެސް އެސަބަބަށްޓަކައި ކަން ފާހަގަކުރައްވައި ރައީސް މުޢިއްޒު ވަނީ، މާލެ-ރަސްމާލެ އަންޑަރ ވޯޓާ ޓަނެލް އަކުން ގުޅުވާލައްވާނެ ކަންވެސް އިއުލާން ކުރައްވާފައެވެ.

އަދި (މާލެއާއި) ރަސްމާލެ ގުޅުވާލުމަށްޓަކައި އަޅުގަނޑުމެން މިހާރު ފަންނީ، އިނޮވޭޓިވް ވަރަށް ގިނަ މަސައްކަތްތަކެއް މިހާރު ވާނީ ފަށާފައި. ވަރަށް ގާބިލް ކުންފުނިތަކާއި އަޅުގަނޑުމެން ވާނީ މަޝްވަރާތައް ފަށާފައި. މުޅި ދުނިޔޭގައިވެސް ފުރަތަމަ ފަހަރަށް ގާއިމް ކުރެވޭ، އަންޑަރ ވޯޓާ ޓަނެލް، އިރާދަކުރެއްވިޔާ މާލެއިން ރަސްމާލެއަށް އިރާދަކުރެއްވިޔާ ގުޅުވާލުމުގެ މަސައްކަތް، އެ ޓަނެލް ވެގެން ދާނީ، އެ ޓަނެލްގައި ދުއްވަ ޓްރެއިން ގައި ދާއިރުގައި، ކަނޑު އަޑީގެ ރީތި މަންޒަރުތައްވެސް ފެންނަ ޓަނެލް އަކަށް. އެ މަސައްކަތް ކުރުމަށްޓަކައި އަޅުގަނޑުމެން އެކަމުގެ ގާބިލްކަންހުރި ކުންފުނިތަކާއި އެކީގައި މިހާރު ވަނީ ފީޒިބިލިޓީ މަސައްކަތް ފަށާފައި

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް މުޢިއްޒު ވިދާޅުވީ، ރަސްމާލޭގެ އެ މުޅި މަޝްރޫޢު ވެގެން ދާނީ، މުޅި ރާއްޖޭގައި ފަތުރުވެރިކަން އެތައް ގުނައެއް ކުރިއަރައިގެންދާނެ މަޝްރޫއު އަކަށް ކަމަށެވެ.

އަދި މާލެ ސަރަހައްދުގައި މީހުން އުޅޭނީ، "ލިންކް އެޅިފައިވާ، ގުޅިފައިވާ ތަންތަނުގައި" ކަމަށްވެސް އެމަނިކުފާނު ވިދާޅުވި އެވެ.

މީގެ އިތުރުން ރާއްޖޭގެ އެކި ކަންކޮޅުތަކުގައި ވެސް، ބްރިޖުގެ މަސައްކަތް ކުރިއަށްދާނެ ކަމަށް އެމަނިކުފާނު ވިދާޅުވި އެވެ.

ރަސްމާލެ އާއި މާލެ އަންޑަރ ވޯޓާ ޓަނެލް އަކުން ގުޅުވާލައްވާނެ ކަމަށް ރައީސް މުޢިއްޒު ވިދާޅުވެފައި ވާއިރު، ރަސްމާލެ އާއި މާލެ ބްރިޖްއަކުން ގުޅާ ނުލެވޭއިރު އެތަނުގައި ބޯހިޔާވަހިކަމުގެ މަޝްރޫޢުއެއް ސަރުކާރުން ފެށުމުން އިދިކޮޅު އެމްޑީޕީން ވަރަށް ބޮޑަށް ފާޑުކިޔާފައިވެއެވެ.

އެގޮތުން، މިރޭގެ ޖަލްސާގައިވެސް އައު މޭޔަރ އާދަމް އާޒިމް ވަނީ މާލޭގެ ރައްޔިތުންގެ އެންމެ ބޮޑު އެދުމަކީ، ބްރިޖަކުން ގުޅުވާލެވޭނެ ސަރަހައްދުތަކުން ބޯހިޔާވަހިކަމުގެ ފުރުސަތުތައް ލިބެން ކަމަށް ވިދާޅުވެ، ނުސީދާ ގޮތުން އެ މަޝްރޫއު އަށް ފާޑުވިދާޅުވެފައެވެ.