ރަންފަރުގައި ރިސޯޓް ތަރައްޤީކުރުން ފިޔަވައި އެހެން ކަންކަން ކުރެވޭނެ: ރައީސް

އއ.އަތޮޅު މާޅޮހު ކައުންސިލަށް ސަރުކާރުން ދީފައިވާ ރަންފަރުގައި ރިސޯޓް ތަރައްޤީކޮށް ހިންގުން ފިޔަވައި އެނިހެން މަސައްކަތްތައް ކުރެވޭނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އއ އަތޮޅަށް ކުރައްވަމުން ގެންދަވާ ޒިޔާރަތުގައި މިއަދު އެއަތޮޅު މާޅޮހަށް ވަޑައިގެން އެރަށު ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ ރަންފަރަކީ މިހާރު މާޅޮހު ކައުންސިލަށް ދީފައިވާ ފަޅެއް ކަމަށާއި އެތަނުގައި މިހާރު ރައްޔިތުންގެ މަންފާއަށް މަސައްކަތް ކުރެވޭނޭކަމަށެވެ. ރައީސް ވިދާޅުވީ ރަންފަރުގައި ރިސޯޓް ތަރައްޤީކޮށް ފުލް ސްކޭލުގައި ހިންގުން ފިޔަވައި އެހެނިހެން އިގްތިސާދީ މަސައްކަތްތައް ކުރެވޭނޭކަމަށެވެ.

ރައީސް ވިދާޅުވީ ރަންފަރުގައި އިގްތިސާދީ މަސައްކަތްތައް ކުރުމަށް ސަރުކާރުގެ ފުރިހަމަ އެއްބާރުލުމާއި އެހީތެރިކަން ދޭނޭކަމަށެވެ.

އެގޮތުން ރަށުގެ ބޭނުންތަކަސް މިހާރު އެފަޅު ބޭނުންކުރެވޭނޭކަމަށް ރައީސް ވިދާޅުވިއެވެ. މާޅޮހުގެ ބައެއްގެ ގޮތުގައި ރަންފަރު ހަމަޖެއްސުމަކީ ރައީސުލްޖުމްހޫރިއްޔާގެ ވައުދުފުޅެކެވެ. ރައީސް ވައުދުވެ ވަޑައިގެންނެވިގޮތަށް މާޅޮހު ކައުންސިލަށް އެފަޅު ކަނޑައެޅުއްވިކަން ރައީސުލްޖުމްހޫރިއްޔާގެ އޮފީހުން ހާމަކޮށްފައިވަނީ، މިއަހަރުގެ އޮގަސްޓްމަހުގެ 6 ވަނަ ދުވަހެވެ.

މިއަދުގެ ބައްދަލުވުމުގައި ރައީސް ޑރ.މުއިއްޒު ވަނީ މި ސަރުކާރުން މާޅޮހުގެ އުމްރާނީ ތަރައްޤީއަށް ކުރުމަށް ނިންމާފައިވާ ބައެއް މަޝްރޫޢުތަކުގެ ވާހަކަ ހިއްސާކުރައްވާފައެވެ. އެގޮތުން ރަށު ސްކޫލަށް އިތުރުކުރާ ބައިގެ މަސައްކަތްތަކާއި ސިއްހީމަރުކަޒު ތަރައްޤީކުރުމުގެ އިތުރުން މަގުތައް ހެދުމުގެ ކަންކަން ކުރިއަށްގެންދިއުމަށް ނިންމާފައިވާކަން ރައީސް ވަނީ ފާހަގަކުރައްވާފައެވެ. މީގެ އިތުރުން ގޮނޑުދޮށް ހިމާޔަތްކުރުމުގެ މަސައްކަތް އަންނަ އަހަރު ފައްޓަވާނޭކަމަށް ރައީސް ވަނީ ވިދާޅުވެފައެވެ.

ރައީސްގެ ދަތުރުފުޅާ ގުޅުވައިގެން މިއަދު މާޅޮހުގައި ގާއިމްކުރަން ނިންމި ފުލުހުންގެ މަރުކަޒުގެ އަމަލީ މަސައްކަތް މިއަދު ވަނީ ފަށާފައެވެ.