ބޭރުގެ އިންވެސްޓުމަންޓުތަކަކީ ހަމައެކަނި ޓެކްސް ފައިސާ ހޯދަން އޮންނަ މަގަކަށް ވެގެން ނުވާނެ: ޑރ. މުއްޠަލިބު

ރާއްޖޭގައި ކުރެވޭ ފޮރިން ޑައިރެކްޓް އިންވެސްޓްމަންޓްތަކަކީ، ހަމައެކަނި ދައުލަތަށް ޓެކްސް ފައިސާ ހޯދާ އެއްޗަކަށް ވެގެން ނުވާނެ ކަމަށް އިމާރާތް ކުރުމާއި ގެދޮރުވެރިކާމާއި ބިނާރަބެހޭ ވަޒީރު ޑރ. ޢަބްދުالله މުއްޠަލިބް ވިދާޅުވެއްޖެއެވެ.

މާފަރު އިންޓަނޭޝަނަލް އެއަޕޯޓް ތަރައްޤީކޮށް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު މުއްޠަލިބު ވަނީ ނ އަތޮޅަކީ ދުނިޔޭގެ މަތީފަންތީގެ ރިސޯޓްތައްހުރި އެތައް ސަތޭކަ މިލިއަން ޑޮލަރުގެ އިންވެސްޓްމަންޓް ހިނގަމުންދާ އަތޮޅެއްކަން ފާހަގަ ކުރައްވާފައެވެ.

އަދި އެއާޕޯޓާއެކު ނ އަތޮޅަށް އަންނަ ތަރައްގީ އަކީ ހަމައެކަނި ރައްޔިތުން ބަލަން ތިބެންޖެހޭ ތަރައްގީއެއް ނޫން ކަމަށާ އެހެނެއް ކަމަކު، އެއީ ރައްޔިތުންގެ ބައިވެރިވުން ހިމެނޭ ތަރައްގީ އަކަށްވާންޖެހޭ ކަމަށް ވަޒީރު ވިދާޅުވިއެވެ.

”…އަޅުގަނޑުމެން މިއަދު ކުރަންވީ ސުވާލަކީ ރިސޯޓްތައް ތަރައްގީ ކުރުމަށް އަންނަ ފަރާތްތަމާ ގުޅިގެން މީހުން ދިރިއުޅޭ ރަށްރަށުގައި ވަޒީފާގެ ފުރުސަތުތަކާ،  ވިޔަފާރީގެ ފުރުސަތުތައް އިތުރު ކުރެވޭނެތޯ؟ މީގެ ޖަވާބަކަށް ވާންވާނީ އާއެކޭ. ރައީސް މުޢިއްޒުގެ ސަރުކާރުގެ ސިޔާސަތަކީ ރާއްޖެއަށް އަންނަ ތަރައްގީއާއެކު ރައްޔިތުންގެ ދިރިއުޅުމުގެ ފެންވަރު އުފުލުން.“ ވަޒީރު މުއްޠަލިބު ވިދާޅުވިއެވެ.

ރާއްޖޭގައި ކުރެވޭ ފޮރިން ޑައިރެކްޓް އިންވެސްޓްމަންޓް ތަކަކީ ހަމައެކަނި ދައުލަތަށް ޓެކްސް ފައިސާ ހޯދަން އޮންނަ މަގަކަށް ވެގެން ނުވާނެ. އެ އިންވެސްޓްމަންޓް ތަކަކީ އޭގެ ސަބަބުން ދިވެހި ޒުވާނުންނަށް ވަޒީފާގެ އިތުރުން ވިޔަފާރީގެ ފުރުސަތުތައް ލިބޭނެ އިންވެސްޓްމަންޓް ތަކަކަށް ވާންޖެހޭނެ.

ގެދޮރުވެރިކާމާއި ބިނާރަބެހޭ ވަޒީރު ޑރ. ޢަބްދުالله މުއްޠަލިބް

އެހެންކަމުން ވަޒީރު ވަނީ، މާފަރު އެއާޕޯޓަކީ އެ އަތޮޅުގެ ޒުވާނުންގެ ހުވަފެންތަކުގައި ކުލަޖެއްސުމަށް ”އުދުއްސާލާ ރަންވޭ“ އަކަށް ހެދުމަށް އެދިލައްވާފައެވެ.

ވަޒީރު އިތުރަށް ވިދާޅުވީ، ގައުމުގެ އެންމެ މުހިންމު ބިނާރަކީ ބޮޑެތި މަޝްރޫޢުތަކާއެކު ރައްޔިތުންނަށް ގެނެސްދޭ އުއްމީދު ކަމަށެވެ. އަދި މި ސަރުކާރުން މަސަައްކަތް ކުރަނީ އަންނަން އޮތް ޖީލުތަކަށް އުއްމީދު ގެނެސްދޭ ތަރައްގީ ގެނައުމަށް ކަމަށްވެސް އޭނާ ވިދާޅުވިއެވެ.