އެއާޕޯޓާ ގުޅޭ ފީތަކުން ލިބުނު އާމްދަނީ ޖެނުއަރީމަހު ރެކޯޑް އަދަދަކަށް އިތުރުވެއްޖެ

އެއާޕޯޓާ ގުޅޭ ފީތަކުން ހުސްވި ޖެނުއަރީމަހު ދައުލަތަށް ލިބުނު އާމްދަނީ ވަރަށްބޮޑަށް އިތުރުވެފައިވާކަމަށް މޯލްޑިވްސް އިންލަންޑް ރެވެނިއު އޮތޯރިޓީގެ ތަފާސްހިސާބުތަކުން ދައްކައިފިއެވެ.

މީރާއިން އެންމެފަހުން އާއްމުކުރި ޖެނުއަރީމަހު ދައުލަތުގެ އާމްދަނީ ރިޕޯޓަށް ބަލާއިރު، ޑިޕާޗާ ޓެކްސް އަދި އެއާޕޯޓް ޑިވެލޮޕްމަންޓް ފީގެ ގޮތުގައި ލިބުނު އާމްދަނީ ވަނީ މިދިޔަ އަހަރުގެ މި މުއްދަތާ އަޅާބަލާއިރު، ރެކޯޑް މިންވަރަކަށް އިތުރުވެފައެވެ. އެގޮތުން ޑިޕާޗާ ފީގެ ގޮތުގައި ހުސްވި ޖެނުއަރީމަހު މީރާއަށް 11.7 މިލިއަން ޑޮލަރު ބަލައިގަނެފައިވާއިރު، މިދިޔަ އަހަރުގެ ޖެނުއަރީމަހު މިއަދަދު އުޅެނީ 7.5 މިލިއަން ޑޮލަރުގައެވެ.

އެއާޕޯޓް ޑިވެލޮޕްމަންޓް ފީގެ ގޮތުގައި މިއަހަރުގެ ޖެނުއަރީމަހު 12.2 މިލިއަން ޑޮލަރު ބަލައިގަނެފައިވާއިރު، މިދިޔަ އަހަރުގެ ޖެނުއަރީމަހު މިއަދަދު ހުރީ 7.6 މިލިއަން ޑޮލަރުގައެވެ.

އޭޑީސީ އަދި ޑިޕާޗާ ފީން ލިބުނު އާމްދަނީ އިތުރުވެގެން ދިޔައިރު، ޑިޕާޗާ ފީގެ ގޮތުގައި މިހާރު އެއާޕޯޓުން އިކޮނޮމީ ކްލާހުގައި ފުރާ ކޮންމެ ފަސެންޖަރެއްގެ އަތުން 50 ޑޮލަރު ނަގައެވެ.

ބިޒްނަސް ކުލާހުން ދަތުރުކުރާނަމަ، ފުރާ ދިވެހިންނާއި ބިދޭސީންގެ އަތުން ކުރިން ނަގަމުން އަންނަ 60 ޑޮލަރުގެ ބަދަލުގައި ބޮޑުކުރިފަހުން ނަގަމުން އަންނަނީ 120 ޑޮލަރެވެ. އަދި އަމިއްލަ ޖެޓްތަކުގައި އަންނަ މީހުންގެ އަތުން 480 ޑޮލަރު ނަގައެވެ.

ވެލާނާ އިންޓަރނޭޝަނަލް އެއާޕޯޓްގެ އައު ޓާމިނަލްގެ ހިދުމަތް ފެށުމާއެކު ރާއްޖެ އަންނަ ފަތުރުވެރިންގެ އަދަދު ވަނީ އިތުރުވެގެން ގޮސްފައެވެ. ނަތީޖާއެއްގެ ގޮތުން އެއާޕޯޓް ފީ ތަކުންނާއި އެނޫންވެސް ދާއިރާތަކުން ރާއްޖެއަށް ލިބޭ އާމްދަނީ ވަނީ އިތުރުވެގެން ގޮސްފައެވެ.

ވީއައިއޭގެ އައު ޓާމިނަލްގެ ހިދުމަތް ފަށާފައިވަނީ މިދިޔަ އަހަރުގެ މިނިވަންދުވަހާ ދިމާކޮށް ޖުލައިމަހުގެ 26 ވަނަ ދުވަހުއެވެ. ސައުދީގެ ބިންލާދިން ގްރޫއްޕާ ހަވާލުކޮށްގެން ތަރައްޤީކުރި އައު ޓާމިނަލަށް 5 ބިިލިއަނަށްވުރެ ގިނަ ރުފިޔާ ހޭދަވިއިރު، ސަރުކާރުގެ އަމާޒަކީ އައުޓާމިނަލާއެކު އަހަރެއްގެ ތެރޭގައި 7.5 މިލިއަން ފަސެންޖަރުންނަށް ހިދުމަތް ދިނުމެވެ.