މިދިޔަ 5 އަހަރު ނެގި ބޮޑު ދަރަނިން ކުރިކަމެއް ފެންނާކަށް ނެތް: މުޙައްމަދު އިސްމާއީލް

މިދިޔަ 5 އަހަރުގެ ތެރޭގައި އޭރު ވެރިކަމުގައި ހުންނެވި ކުރީގެ ރައީސް އިބްރާހިމް މުހައްމަދު ޞާލިހު ގެ ސަރުކާރުން ނެގި ދަރަނިން ކުރިކަމެއް ފެންނަން ނެތް ކަމަށް ވިލިމާލެ ދާއިރާގެ މެމްބަރު މުޙައްމަދު އިސްމާއީލް ވިދާޅުވެއްޖެއެވެ.

ރައްޔިތުންގެ މަޖިލީހަށް ސަރުކާރުގެ ފަރާތުން ތުލުސްދޫ ދާއިރާގެ މެމްބަރު އިބްރާހިމް ނަސީމް ހުށައަޅުއްވާފައިވާ ދައުލަތުގެ ފިސްކަލް ޒިންމާގެ ބިލާއި ބެހޭ ގޮތުން ރައްޔިތުންގެ މަޖިލީހުގެ ޖަލްސާގައި މިއަދު ކުރިއަށްދިޔަ ބަހުސްގައި ވާހަކަފުޅު ދައްކަވަމުން މުހައްމަދު އިސްމާއީލް ވިދާޅުވީ، މި ބިލުގެ ވާހަކަދައްކަންވީ މިއަދު ނޫންކަމަށާއި، މިއީ މާކުރިން ދައްކަން ޖެހިފައިވާ ވާހަކައެއް ކަމަށެވެ.

މުހައްމަދު އިސްމާއީލް ވިދާޅުވީ، ސަރުކާރުތަކެއް އެކުލެވިގެން މިއަދާއި ހަމައަށް އައިރު، މިފަދަ ބިލުތައް ގާނޫނުތަކަށް ވެފައި އޮތްނަމަ، މިއަދު މި ވާހަކަތައް ދައްކަން ނުޖެހޭނެ ކަމަށެވެ.

ކުރީގެ ރައީސް އަބްދުالله ޔާމީން އަބްދުލްޤައްޔޫމްގެ ވެރިކަމުގައި ނެގި ދަރަނިތަށް ހެޔޮ ގޮތުގައި ބޭނުންކޮށްފައި ހުރިކަން ސިނަމާލެ ބްރިޖާއި ދަރުމަވަންތަ ހޮސްޕިޓަލަށް ބަލާލުމުން ހާމަވެގެންދާނެ ކަމަށް ވެސް މުހައްމަދު އިސްމާއީލް ވިދާޅުވިއެވެ.

އޭގެ ފަހުން، ރައީސް ޞާލިހު ވެރިކަމަށް ވަޑައިގެން، އެވެރިކަމުގައި ކުރި ކަންކަން ރައްޔިތުންނަށް ފެންނަން ހުރި ކަމަށާއި، ކޮވިޑުގެ ނުރައްކަލުން ސަލާމަތްވުމަށް ލޯނު ނެގި ކަމަށް ބުނި ނަމަވެސް، ކުރީ ސަރުކާރުން ކުރި ކަންތައްތައް ރައްޔިތުންނަށް މިއަދު ފެންނަން ހުރި ކަމަށް މުހައްމަދު އިސްމާއީލް ވިދާޅުވިއެވެ.

"އެ ލޯނު ނަގައިގެން ޒިންމާދާރު ކަމާއި އެކު ރައްޔިތުންނަށް ހެޔޮ ގޮތުގައި އޭގެ ބޭނުން ކުރެވިފައި ހުރިތޯ، އެކަން ބެލުމަށްޓަކައި ކަންތައްތަކެއް އެބަ ކުރަންޖެހޭ. މިއަދު ގޮސް އަރާ އެއްފަރާތެއްގައި ތިބެ، މިދިޔަ 5 އަހަރު ގައުމަށް ދެވުނު ގެއްލުން، ނެގި ބޮޑ ދަރަނިން ކުރިކަމެއް އަޅުގަނޑުމެންނަށް ފެންނާކަށް ނެތް."

މުހައްމަދު އިސްމާއީލް ވިދާޅުވިއެވެ.

މުހައްމަދު އިސްމާއީލް ވިދާޅުވީ، ދައުލަތް 100 އެތައް ބިލިއަން ރުފިޔާއިން ދަރާފައިވާއިރު، ރައީސް ޞާލިހުގެ ސަރުކާރުން ކުރި ކަމެއް ފެންނަން ނެތް ކަމަށާއި، މިވާހަކަތައް ދެއްކެނީ ކުރީ ސަރުކާރުން އެކި އެކި ގޮތްގޮތަށް އަޅުވާލައިގެންނާއި ރާވައިގެން ކަންކަން ކޮށްފައި ހުރުމުން ކަމަށެވެ.

ހަމައެއާއިއެކު،ގިނަ ޕާޓިތަކެއް އެކުލެވޭ ވެރިކަންތަކެއް ރާއްޖޭގައި އުފެދި، 20 ވަރަކަށް އަހަރު ފާއިތުވެގެންދާއިރު، އޭގެ ތެރެއިން އެންމެ އަނިޔާވެރި ވެރިކަމެއް ކޮށްފައިވަނީ ކޮންބައެއްތޯ ރައްޔިތުން އިލްމީ ގޮތުން ދިރާސާ ކުރަން ޖެހޭ ކަމަށް ވެސް މުހައްމަދު އިސްމާއީލް ވިދާޅުވިއެވެ.