ޑޮލަރުގެ މައްސަލަ ހައްލު ނުވާ ކަމަށް ބުނެ އެމްޑީޕީ ޕީޖީ، ގަވާރުނަރާ ބައްދަލު ކުރަން އެމްއެމްއޭއަށް

ޑޮލަރުގެ ޑޮލަރުގެ މައްސަލަ ހައްލުނުވެ ގިނަ ދުވަސްވެފައިވާތީ އެކަމާ ކަންބޮޑުވުންފާޅުކޮށް، އެމްޑީޕީ ޕާލަމަންޓްރީ ގުރޫޕް ގަވަރުނަރު އަޙްމަދު މުނައްވަރާއި ބައްދަލުކުރައްވަން ވަޑައިގެންނެވުމުން ބައްދަލުކުރައްވަން އިންކާރު ކުރެއްވި ކަމަށް އެޕާޓީން ބުނެފިއެވެ.

އެމްޑީޕީން ބުނެފައިވާ ގޮތުން އެ ޕާޓީގެ ޕާލަމަންޓްރީ ގްރޫޕްގެ މެންބަރުން ގަވަރުނަރާއި ބައްދަލުކުރެއްވީ މައިގަނޑު ދެ މައްސަލައެއްގައެވެ. އެއީ، ޑޮލަރުގެ އަގު ހިފެހެއްޓުމެއް ނެތި އުފުލެމުންދާއިރު އެކަމުގައި އެއްވެސް ބަހެއް ވިދާޅު ނުވެ ހުންނަވާތީ އާއި ދައުލަތުގެ ރިޒާވު ބޭނުންކޮށްގެން ރަސްމާލެ ހިއްކަން ފައިސާ ދައްކާ ކަމަށްބުނެއެވެ.

އެ ބައްދަލުވުމާއި ގުޅިގެން މީޑިއާ ތަކަށް މައުލޫމާތު ދެއްވަމުން ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވީ، ގަވަރުނަރާއި ބައްދަލުކުރައްވަން ވަޑައިގެންނެވީ، ރައްޔިތުންނާއި ޚާއްސަކޮށް ވިޔަފާރިވެރިންގެ ކަންބޮޑުވުންތައް ހިއްސާކުރެއްވުމަށް ކަމަށެވެ.

ނަމަވެސް ވަރަށް ޒިންމާދާރުކަން ކުޑަ ގޮތަކަށް، ގަވަރުނަރު ބިރުން ހުންނަވައި އަޅުގަނޑުމެންނާ ބައްދަލުކުރަން ނުޖެހޭނެ ގޮތަކަށް ވިދާޅުވެ، އެ ވަޑައިގެންނެވީ.

އެމްޑީޕީ ޕާލަމަންޓަރީ ގުރޫޕްގެ މެންބަރު މައުރޫފް ޒާކިރު

މައުރޫފް އިތުރަށް ވިދާޅުވީ، ގަވަރުނަރަށް ލިބިފައިވާ ބާރުތައް ކެންޑިފައިވާ ކަމަށާ، އެ މަގާމުގެ މަސްއޫލިއްޔަތު އަދާކުރައްވަންވެސް އެބޭފުޅާއަށް އެނގިނުލައްވާ ކަމަށެވެ. އެހެންކަމުން، ގަވަރުނަރުގެ އިތުބާރު ނެތް ކަމުގެ މައްސަލަވެސް މަޖިލީހަށް ވައްދަން ބޭނުންވާ ކަމަށާ، ނަމަވެސް އެމްޑީޕީގެ އެންމެ 12 މެންބަރުން ތިބުމުން އެކަން އެގޮތަށް ކޮށްގެންވެސް ގަވަރުނަރު މަގާމުން ވަކިކުރެވެން ނެތް ކަމަށް އޭނާ ވިދާޅުވިއެވެ.

މައުރޫފް ވިދާޅުވީ، ޑޮލަރުގެ މައްސަލާގައި ރައްޔިތުންނަށް ދެއްވާނެ ޖަވާބެއް ގަވަރުނަރުގެ ނެތް ކަމަށާ، އެ މައްސަލަ ހައްލުވާނެ ކަމުގެ އަލިމަގެއްވެސް ފެންނަން ނެތް ކަމަށެވެ.

އެހެންކަމުން، ޑޮލަރުގެ މައްސަލައާއި ގުޅިގެން ކަންބޮޑުވުން ހުރި ހުރިހާ ފަރާތްތަކުން މާދަން 11:00 ގައި އެމްއެމްއޭ ކުރިމައްޗަށް އައުމަށް އެމްޑީޕީން ވަނީ އެދިފައެވެ.