ޅެން ފަރުވާގެ ކްލިނިކާއި "ށ"އިން ފެށޭ ބަސް ހަދާ ވާހަކަ ދޮގުކޮށްފި
އައިޖީއެމްއެޗްގައި ޅެން ފަރުވާއަށް ކްލިނިކެއް ގާއިމްކުރާ ވާހަކައާއި "ށ"އިން ފެށޭ ބަސްތަކެއް އުފައްދަން މަސައްކަތްކުރަމުންދާ ކަމަށް ބުނެ ސޯޝަލް މީޑިއާގައި ފަތުރަމުން އަންނަ ވާހަކަތައް ދިވެހި ބަހާއި ސަގާފަތާއި ތަރިކައިގެ ވަޒީރު އާދަމް ނަސީރު އިބްރާހީމް ދޮގުކުރައްވައިފިއެވެ.
ދިވެހި ބަހާއި ސަގާފަތާއި ތަރިކައާއި ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ނަސީރު ވަނީ އާމްދަނީ ހޯދުމަށްޓަކައި ދޮގު ފަތުރާ ބައެއް ބްލޮގްތައް ހުންނަކަން ފާހަގަކުރައްވާފައެވެ. ވެބްސައިޓްހެން ހީވާ މިފަދަ ތަންތަނުގައި ލިޔާ ލިޔުންތަކުގެ ސަބަބުން ވަރަށް ބޮޑަށް އޮޅުންއަރާކަމަށް ވެސް ވަޒީރު ވިދާޅުވިއެވެ.
މިގޮތުން، ފާއިތުވެ ދިޔަ ހަފްތާގައި އެފަދަ ދެ ދޮގު ވާހަކައެއް ދެކެވުނުކަމަށް ވަޒީރު އާދަމް ނަސީރު ވިދާޅުވިއެވެ.
"ވޭތުވެދިޔަ ހަފުތާގައި ދެކެވުނު ދެ ވާހަކައެއް. އެއްވާހަކައަކީ އައިޖީއެމްއެޗްގައި ކްލިނިކެއް ހަދާ ވާހަކަ. އެއީ ދޮގެއް. މިވުޒާރާ ދެވަނަ ވާހަކައަކީ ވާހަކައަކީ 'ށ'އިން ފެށޭ ބަސްތަކެއް ލަފުޒުތަކެއް އުފައްދަން އުފައްދަން އަޅުގަނޑު ޕީއެސްއެމްއަށް އިންޓަވިއުއެއް ދެއްވި ވާހަކަ. ރެކޯޑިން ބެއްލެވީމަ އެނގިލައްވާނެ އެ ނެތްކަން. އެއީ އަޅުގަނޑު ނުދައްކާ ވާހަކައެއް."
ވަޒީރު ނަސީރު ވިދާޅުވިއެވެ.
ސޯޝަލް މީޑިއާގައި ފެތުރެމުންދާ ވާހަކަތަކުގައިވާގޮތުން، ޅެމުން ނަފުސާނީ ބަލިތަކަށް ފަރުވާ ދޭނެ ކްލިނިކެއް އައިޖީއެމްއެޗްގައި ހެދުމަށްޓަކައި ވަޒީރު ނަސީރު ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަރިހުގައި އެދިވަޑައިގެންފައިވާކަމަށާއި، ދައުރު ނިމުމުގެ ކުރިން 'ށ'އިން ފެށޭ ފަސް ބަހެއް ހެދުމަށް އެ ވުޒާރާއިން ވަނީ ނިންމާފައިއެވެ.
އެކަމާއި ގުޅޭ ގޮތުން އެތައްބަޔަކު ސޯޝަލް މީޑިއާގައި ފާޑުކިޔާފައިވާއިރު، ދާދި ފަހުން ތަރިކައާއި ބެހޭ ވުޒާރާއިން ވަނީ "ޕޮއެޓްރީ ތެރަޕީ"އަށް ދިވެހި ނަމެއްގެ ގޮތުގައި "ޅެން ފަރުވާ" ފާސްކޮށް އެ ކަމާ ގުޅޭ ދިރާސާ ހެދުމުގެ މަރުހަލާ ފެށުމަށް ނިންމާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
