ޕީޕީއެމް އުވާލައި، ސިޔާސީ ޕާޓީތަކުގެ ދަފްތަރުން ނަގައިފި

އެއްދުވަސްވަރެއްގައި ރާއްޖޭގެ ސިޔާސީ މައިދާނުގައި އެންމެ އުހުގައި އޮތް، އަދި ވެރިކަންކުރި، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) މިއަދު އުވާލައިފިއެވެ.

އިލެކްޝަންސް ކޮމިޝަނުން މިއަދު ގެޒެޓްކުރި އިއުލާނެއްގައި ބުނެފައިވަނީ، ސިޔާސީ ޕާޓީގެ ޤާނޫނުގެ 30 ވަނަ މާއްދާގެ ދަށުން ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް) އުވާލައި، ސިޔާސީ ޕާތީތަކުގެ ދަފްތަރުން އުނިކޮށްފައިވާކަމަށެވެ. އިލެކްޝަނުން ބުނީ، ޕީޕީއެމް އުވާލުމަށް އެ ޕާޓީގެ ސެނެޓުން ނިންމައި، ފުރިހަމަ ކުރަންޖެހޭ ކަންކަން ފުރިހަމަކޮށް އިލެކްޝަންސް ކޮމިޝަނަށް ހުށަހަޅާފައިވާކަމަށެވެ. އެހެންކަމުން މިއަދުން ފެށިގެން އެޕާޓީ އުވާލައި ސިޔާސީ ޕާޓީގެ ދަފްތަރުން އުނިކޮށްފައިވާކަމަށް އިލެކްޝަނުން ބުންޏެވެ.

ޕީޕީއެމް ސެނެޓުން އެޕާޓީ އުވާލުމަށް ނިންމީ މިދިޔަ ޑިސެމްބަރުމަހުގެ ތެރޭގައެވެ. ޕީޕީއެމް ވުޖޫދަށް އައީ ޑީއާރުޕީގެ ތެރެެގައި އުފެދުނު ހިޔާލުތަފާތުވުންތަކަސްފަހު، 2011 ވަނަ އަހަރުގެ އޮކްޓޯބަރުމަހުގެ ތެރޭގައެވެ.

ޕީޕީއެމުން ރާއްޖޭގެ ވެރިކަން ކޮށްފައިވަނީ 2013 ވަނަ އަހަރުން 2018 ވަނަ އަހަރުގެ ނިޔަލަށެވެ.

ރާއްޖޭގެ ސިޔާސީ މައިދާނުން ޕީޕީއެމްގެ ނަން ފަނޑުވާން ފެށީ ޕީއެންސީ ނަމުގައި ރައީސް ޔާމީނު އިތުރު ޕާޓިއެއް އުފެއްދި ހިސާބުންނެވެ. ޕީޕީއެމް ޓިކެޓްގައި މިދިޔަ ރިޔާސީ އިންތިހާބުގައި ވާދަކުރައްވަން ރައީސް ޔާމީނުގެ ނަން ހުށަހެޅުއްވި ނަމަވެސް ޖަލުހުކުމެއްގައި ހުންނެވުމުން ސްޕްރީމް ކޯޓުން ނިންމީ އެމަނިކުފާނަށް އިންތިހާބުގައި ވާދަނުކުރެވޭނެ ކަމަށެވެ. އެފަހަރު އިންތިހާބުގައި ވާދަކުރެއްވީ ޕީއެންސީގެ ކެނޑިޑޭޓް ޑރ.މުހައްމަދު މުއިއްޒެވެ. އިންތިހާބު ޑރ.މުއިއްޒު ކާމިޔާބު ކުރެއްވުމާއެކު ދެން އުފެދިގެން ދިޔަ ހިޔާލުތަފާތުވުންތަކާއެކު ރައީސް ޔާމީނުވެސް ފަހުން ވަނީ ޕީޕިއެމް ދޫކޮށްލައްވައި އިތުރު ޕާޓިއެއް ހައްދަވާފައެވެ.