އަގުމަގު މެދުވެރިކޮށް މިހާރު ދެހާހަށްވުރެ ގިނަ ފިހާރައިން ވިއްކާ ތަކެތީގެ އަގުތައް ފެންނާނެ: މިނިސްޓަރު
ބާޒާރުގެ އަގުތައް އެއްތަނަކުން ފަސޭހައިން އެނގޭގޮތަށް އިކޮނޮމިކް މިނިސްޓްރީން ވުޖޫދަށް ގެނައި "އަގުމަގު" ޕޯޓަލްގައި ގިނަ އަދަދެއްގެ ވިޔަފާރިތައް ރަޖިސްޓްރީކޮށްފިއެވެ.
މިކަމާ ގުޅޭގޮތުން އިގްތިސާދީ ވަޒީރު މުހައްމަދު ސައީދު ވިދާޅުވީ އަގުމަގު ޕޯޓަލުގައި މިހާތަނަށް 2،222 ވިޔަފާރި ރަޖިސްޓްރީކޮށްފައިވާކަމަށެވެ. އެގޮތުން ދުވާލެއްގެ މައްޗަށް މިހާރު 2,724 މީހުން އެ ޕޯޓަލް ބޭނުންކުރަމުންދާކަމަށެވެ. މީގެ އިތުރުން އަގުމަގު އެޕްލިކޭޝަން ޑައުންލޯޑްކުރި އަދަދު 3،300 އަށް އަރާކަމަށްވެސް މިނިސްޓަރު ވިދާޅުވިއެވެ.
އަގުމަގު އެޕްލިކޭޝަނަކީ މާލޭ ބާޒާރުގެ އަގުތަކުގެ އިތުރުން އަތޮޅުތެރޭގައި ތަކެތީގެ އަގުތައް ފެންނަން ހުންނަގޮތަށް ހިމަނައިގެން ތައްޔާރުކޮށްފައިވާ އެޕްލިކޭޝަނެކެވެ. މި އެޕްލިކޭޝަން ތައާރަފްކޮށްފައިވަނީ މިދިޔަ ޖުލަިއމަހުގެ ތެރޭގައެވެ. އިކޮނޮމިކް މިނިސްޓްރީން އޭގެ ކުރިން އެންމެ ފުރަތަމަ ތައާަރފްކުރީ އަގުމަގު ޕޯޓަލެވެ. އެއީ 2025 ވަނަ އަހަރުގެ ރޯދަމަހަށް ހާއްސަކޮށެވެ. އޭރު ޕޯޓަލުން ފެންނަނީ ހަމައެކަނި މާލޭ ބާޒާރުގެ އަގުތަކެވެ.
އިކޮނޮމިކް މިނިސްޓްރީން އަގުމަގު އެޕްލިކެޝަން ތައްޔާރު ކޮށްފައިވަނީ ރައްޔިތުންނަށް ފަސޭހަކޮށްދިނުމުގެ ގޮތުންނެވެ. އެގޮތުން މި އެޕްލިކޭޝަން މެދުވެރިކޮށް ފިހާރަތަކަށް ހިނގަން ނުޖެހި ގޭގައި ހުރެގެން ތަކެތީގެ އަގުތައް ބަލާލުމަށްފަހު ދާން ބޭނުންވާ ފިހާރަ ކަނޑައެޅިގެންދާނެއެވެ. މިކަމުގެ ސަބަބުން ބާޒާރުކުރުމަށް ހޭދަކުރަންޖެހޭ ވަގުތުތައް ވަރަށްބޮޑުތަނުން ސަލާމަތްވެގެން ދާނޭކަމަށް މިނިސްޓްރީން ބުންޏެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
