މި އަހަރުގެ މިހާތަނަށް ތެލެސީމިއާ ހަތަރު ކުދިން ވަނީ އުފަންވެފައި؛ މިއީ ފުންކޮށް ވިސްނަންޖެހޭ ކަމެއް: ޙަލީމް

މި އަހަރުގެ މިހާތަނަށްވެސް ތެލެސީމިއާ 4 ކުދިން އުފަންވެފައިވާ ކަމަށާ، އެއީ މުޅި މުޖުތަމަޢު ފުންކޮށް ވިސްނަންޖެހޭ ކަމެއް ކަމަށް މާލޭ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ޢަބްދުއްރައްޒާޤް ޙަލީމް ވިދާޅުވެއްޖެއެވެ.

ދުނިޔޭގެ ތެލެސީމިއާ ދުވަހުގެ މުނާސަބަތުގައި މީސް މީޑިއާގައި ކުރެއްވި ޕޯސްޓެއްގައި ޙަލީމް ވިދާޅުވީ، ރާއްޖޭގެ ތެލެސީމިއާ ފަރުވާގެ ނިޒާމާއި ލޭގެ ޚިދުމަތްތަކުގެ ފެންވަރު މަތިކޮށް، ދެމެހެއްޓެނިވި ގޮތެއްގައި މި ޚިދުމަތްތައް ކުރިއެރުވުމަށްޓަކައި ބޮޑެތި ކާމިޔާބީތަކެއް ހޯދުމުގެ ޢަޒުމް އާކުރަންޖެހޭ ކަމަށެވެ.

ތެލެސީމިއާ ހުންނަ ފަރާތްތަކަށް ދެވޭ ޚިދުމަތްތައް ފުޅާކުރުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުއްވާލައްވަމުން ޙަލީމް ވިދާޅުވީ، 25 މޭ 2025 ގައި "މޯލްޑިވިއަން ބްލަޑް ސަރވިސް" އަދި "ތެލަސީމިއާ އެންޑް އަދަރ ހީމޮގްލޮބިނޯޕަތީސް ސެންޓަރ" އޮރެންޖް ހިޔާ އަށް ބަދަލުކުރުމަކީ ޚިދުމަތުގެ ފެންވަރު މަތިވެގެންދިޔަ މުހިންމު ފިޔަވަޅެއް ކަމަށެވެ.

އަދި މިދިޔަ އަހަރުގެ ސެޕްޓެމްބަރު މަހުގައި އިފްތިތާޙްކުރެވުނު "ތެލެސީމިއާ ޕޭޝަންޓް ކެއަރ ސެންޓަރ" އާއެކު ރާއްޖޭގެ ހުރިހާ ސަރަޙައްދެއްގެ ކުދިންގެ ޞިއްޙީ ޙާލަތު ގާތުން ބެލޭނެ ނިޒާމެއް ކަށަވަރުވެފައިވާކަން އޭނާ ފާހަގަކުރެއްވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، 2026 ޖެނުއަރީން ފެށިގެން ތެލެސީމިއާ ހުންނަ ފަރާތްތަކަށް ޚާއްޞަ އެލަވަންސެއް ދޭން ފެށުމަކީ އާއިލާތަކަށް މާލީ ގޮތުންނާއި ނަފްސާނީ ގޮތުން ލިބިގެންދާނެ ބޮޑު ތަސައްލީއެއް ކަމަށްވެސް ޙަލީމް ވިދާޅުވިއެވެ.

މިއާއެކު ތަފާސްހިސާބުތަކަށް އަލިއަޅުވާލަމުން ޙަލީމް ވިދާޅުވީ، މި އަހަރުގެ މިހާތަނަށްވެސް ތެލެސީމިއާ 4 ކުދިން އުފަންވެފައިވާ ކަމަށާ، އެއީ ފުންކޮށް ވިސްނާލަން ޖެހޭ ކަމެއް ކަމަށެވެ.

އަދި އެކަމަށް ހޭލުންތެރިކަން އިތުރުކުރުމަށް މާލެ ސިޓީ ގްރޫޕް އޮފް ހޮސްޕިޓަލްސްއިން މުހިންމު ލަނޑުދަނޑިތަކެއް ކަނޑައަޅާފައިވާ ކަމަށާ، އެގޮތުން، ކައިވެނީގެ ކުރިން ދެވޭ ކައުންސެލިންގ ހިމެނޭހެން ތެލެސީމިއާ ކޮންޓްރޯލް ކުރުމަށް ބޭނުންވާ މަޢުލޫމާތު ފޯރުކޮށްދޭނެ ޚާއްޞަ ނިޒާމެއް މިއަހަރު ތަޢާރަފުކުރާނެ ކަމަށް ޙަލީމް ވިދާޅުވުއެވެ.

ޙަލީމްގެ ވަނީ، މުސްތަޤުބަލުގެ ޖީލުތައް މި ބަލިން ސަލާމަތްކުރުމަށްޓަކައި، ކައިވެނީގެ ކުރިން ޓެސްޓުކުރުމާއި ސިއްޙީ އިރުޝާދުތަކަށް ބޯލެނބުމަށް މުޅި އިލްތިމާސްކުރައްވާފައެވެ.