ފްލެޓާއި ގޯތި ލިބޭ ފަރާތްތަކުގެ ލިސްޓު މިއަހަރު އާންމުކުރާނަން: ރައީސް މުޢިއްޒު

ފްލެޓާއި ގޯތި ލިބޭ ފަރާތްތަކުގެ ލިސްޓު މިއަހަރުގެ ތެރޭގައި އާންމުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

މިއަދު ހެނދުނު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ މި ސަރުކާރުގެ އެންމެ ބޮޑު ވައުދަކީ ބޯހިޔާވަހިކަން ފޯރުކޮށްދިނުން ކަމަށާއި ފުލެޓާއި ގޯތި ލިބޭ މީހުންގެ ލިސްޓުތައް އާންމުކުރެއްވުމުގެ ކުރިން ފުރިހަމައަށް ވެރިފައިކުރުމުގެ މަސައްކަތް ކުރައްވަމުން ގެންދަވާ ކަމަށެވެ. އަދި އެކަން ކުރައްވާނީ ނުފޫޒުން އެއްކިބާވެ އިންސާފުވެރި ކަމާއެކު ކަންވެސް ފާހަގަކުރެއްވިއެވެ.

"އެހެންވީމަ އަޅުގަނޑުމެން ބަލަނީ އެއްވެސް ކަހަލަ ނުފޫޒެއް މިކަމުގެ ތެރެއަށް ވަނަ ނުދީ ވަރަށް ސަމާލުކަން ދީގެން މިކަން ގެންދަން. މިހެން މި ދަންނަވާ ސަބަބަކީ މީގެ ކުރީގަ އަޅުގަނޑުމެންނަށް މިކަހަލަ ޝަކުވާތައް އެބަހުރި ލިބިފަ. ކުރީގަ އެކި ފަރާތްތަކުގެ ނުފޫޒުގެ ތެރެއިން ގޮސް އެކި ފަރާތްތަކަށް ފްލެޓާއި ގޯއްޗާ މިތަންތަން ލިބިފަ ހުރިކަމަށް.  އިރާދަކުރެއްވިއްޔާ މި ސަރުކާރުންދޭ އެއްވެސް ބޯހިޔާވަހިކަމަކީ ވަކި މީހެއްގެ މީހަކަށް ވީތީ ލިބޭ އެއްޗަކަށް ނުވާނެ"ރައީސް ވިދާޅުވިއެވެ.

މިއާއެކު ރައީސް ވިދާޅުވީ، ފްލެޓާއި ގޯއްޗަށް އެދި ހުށަހަޅާފައިވާ އެޕްލިކޭޝަންތަކުގައިވާ މައުލޫމާތުތައް ބަލައި އޭގެ ސައްޙަކަން ކަށަވަރުކުރެއްވުމަށްފަހު މިއަހަރުގެ ތެރޭގައި ލިސްޓު އާންމުކުރައްވާނެ ކަމަށެވެ.

"މިއަހަރުގެ ތެރޭގައި ގޯތި ލިބޭ ހުރިހާ އެންމެންގެ ލިސްޓު ވެރިފައިކޮށް ނިންމައި އެ ފަރާތްތަކަށް ލިބޭނެކަން އެނގިގެންދާނެ" ކަމަށް ރައީސް ވިދާޅުވިއެވެ.

ފްލެޓު ލިބޭނެ ސީދާ ތާރީޚު މިވަގުތު ހާމަކުރައްވަން ދަތި ނަމަވެސް އެ މަސައްކަތް ހުއްޓުމެއްނެތި ކުރައްވަމުން ގެންދަވާ ކަމަށް ރައީސް ވިދާޅުވިއެވެ. އަދި ގޯތި ހަވާލުކުރައްވާނީ ރަސްމާލެ އެއްކޮށް ހިއްކައި ނިމުމުން ކަމަށް ވެސް ވިދާޅުވިއެވެ.

ރައީސް އިތުރަށް ވިދާޅުވީ މި ސަރުކާރުގެ އަމާޒަކީ ރައްޔިތުންގެ ބޯހިޔާވަހިކަމުގެ މައްސަލައަށް ދާއިމީ ޙައްލެއް ހޯއްދަވައިދެއްވުން ކަމަށާއި އެންމެންނަށް ބޯހިޔާވަހިކަން ފޯރުކޮށްދެއްވުމަށް ވެވަޑައިގެންފައިވާ ރިޔާސީ ވައުދު މި ދައުރުގެ ތެރޭގައި ފުއްދަވާނެ ކަމަށެވެ.