މީޑިޔާ ބިލުގައި ސޯޝަލް މީޑިޔާ ރެގިއުލޭޓްކުރުން ނުހިމެނޭނެ: ފަލާޙް

ރައްޔިތުންގެ މަޖިލީހަށް މިހާރު ހުށަހެޅިފައިވާ "މޯލްޑިވްސް މީޑިޔާ އެންޑް ރެގިއުލޭޝަން ބިލު" ގައި، ސޯޝަލް މީޑިޔާ ރެގިއުލޭޓްކުރުން ނުހިމެނޭނެ ކަމަށް ވެރިކަންކުރާ ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙް ވިދާޅުވެއްޖެއެވެ.

"އެކްސް"ގައި ކުރެއްވި ޕޯސްޓެއްގައި ފަލާޙް ވިދާޅުވީ، މިހާރު މަޖިލީހަށް ހުށަހަޅާފައިވާ ބިލުގައި ފޭސްބުކް، ޓިކްޓޮކް އަދި ޓްވިޓާ ފަދަ ޕްލެޓްފޯމްތައް ބަންދުވާގޮތަކަށް ނެތް ކަމަށެވެ.

އަދި ރައްޔިތުން ސޯޝަލް މީޑިޔާ "ގަދަޔަށް" ބޭނުންކުރަންވީ ކަމުގައި ފަލާޙް ވިދާޅުވިއެވެ.

ފަލާޙް ވިދާޅުވި ގޮތުގައި ރައީސް ޑރ. މުޙައްމަދު މުޢިއްޒު އަކީ ޒުވާނުންނާއި ރައްޔިތުންނަށް ދުވަހަކު ވެސް ނުލިބޭނެ ފަދަ އަދި ރައްޔިތުންގެ މުޅި މުސްތަޤްބަލު އުޖާލާކޮށް ރައްކާތެރިކޮށްދޭނެ ހެޔޮލަފާ ވެރިއެކެވެ.

އަދި އިދިކޮޅު އެމްޑީޕީ އަކީ "ލެޕްޓޮޕަކާއި ފަޅުރަށަކުން" މުޅި ޤައުމު ހިންގޭނެ ކަމަށް ބުނެ، ކުރީގެ ރައީސް މަޢުމޫން އަބްދުލް ޤައްޔޫމްގެ ވެރިކަން "ދޮގާއި މަކަރާއި އަދި އޮޅުވާލުމުގެ ތެރެއިން ބަދަލުކުރި ބައެއް" ކަމުގައި ވެސް ފަލާޙް ވިދާޅުވިއެވެ.

ޒަމާންތަކެއް މާޒީވިއަސް މިފަދަ ހަނދާންތަށް އާކުރަންޖެހޭ ވަގުތު އާކުރުމަކީ ވަރަށް ބޭނުންތެރި މުހިއްމުކަމެއް! އަދި މިދިޔަ ވެރިކަމުގައި އެމްޑީޕީގެ ނުފޫޒުގަދަ ފަރާތްތަކުން ކޮށްފައިވާ ވައްކަންތަކުގެ މައްސަލަތައް ކަމާއި ގުޅުންހުރި ފަރާތްތަކުން ބަލަންފަށައިފިކަން އިނގުނު ހިސާބުން ރައްޔިތުންނަށް މުޒާހަރާއަށް ގޮވާ ތެޅިފޮޅެނީމި!

ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙް

އެއާއެކު ފަލާޙް ވަނީ ނޫސްވެރިކަމުގެ ތާޖު އަޅައިގެން ތިބި އެމްޑީޕީ އެކްޓިވިސްޓުންތަކެއްގެ މަޅީގައި ޒުވާނުން ނުޖެހުމަށް އެދިވަޑައިގަންނަވާފައެވެ.

ނޫސްވެރިންނަށް ނިސްބަތްކޮށް ފަލާޙް އެފަދައިން މުޚާތަބުކުރައްވައިފައިވަނީ، މިހާރު މަޖިލީހަށް ތުޅާދޫ ދާއިރާގެ މެންބަރު އަބްދުލް ޙަންނާނު އަބޫބަކުރު ހުށަހަޅުއްވާފައިވާ މީޑީޔާގެ ރެގިއުލޭޓަރީ ބިލާ ދެކޮޅަށް ވަރަށް ގިނަ ނޫސްވެރިން ފާޑުކިޔަމުންދާ ދަނޑިވަޅެއްގައެވެ.

އެގޮތުން ނޫސްވެރިންގެ ޚިޔާލު ހޯދުމަށް އެ ކޮމެޓީން މި މަހުގެ ފުރަތަމަ ދުވަހު ބޭއްވި ކޮމެޓީގެ ޖަލްސާގައި ވެސް ހުރިހާ ނޫސްވެރިން ވަނީ އެ ބިލާ ގުޅޭ ގޮތުން ހުރި ކަންބޮޑުވުންތައް ހިއްސާކޮށްފައެވެ.

އަދި އެ ބިލު ބޭރުކުރުމަށް ގޮވާލައި 150 އަށް ވުރެ ގިނަ ނޫސްވެރިންގެ ސޮޔާއެކު، ނޫސްވެރިންގެ ޖަމިއްޔާ އެމްޖޭއޭއިން ވަނީ މަޖިލީހަށާއި ރައީސް އޮފީހަށް ޕެޓިޝަނެއް ވެސް ހުށަހަޅާފައެވެ.

އަދި މިރޭ، "ހިޔާލާއި ފިކުރު ކަފުނަށް"ގެ ނަމުގައި އާޓިފިޝަލް ބީޗުގައި ޚާއްސަ ފޯރަމެއް ބޭއްވުމަށް ވެސް ނޫސްވެރިންގެ ޖަމިއްޔާ، އެމްޖޭއޭއިން ވަނީ ނިންމާފައެވެ. އެ ފޯރަމު ފަށާނީ މިރޭ 08:45 ގައެވެ.