ތިލަމާލެ ބްރިޖް މަސައްކަތް ކުރިއަށްދަނީ ހިތްހަމަ ޖެހޭ ސްޕީޑަކުނޫން: މުއްޠަލިބް

ތިލަމާލެ ބްރިޖް މަޝްރޫޢުގެ މަސައްކަތް ކުރިއަށްދަނީ ސަރުކާރުން ހިތްހަމަޖެހޭފަދަ ސްޕީޑެއްގައި ނޫންކަމަށް މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިލިމާލޭ ރައްޔިތުންނާ ބައްދަލުކޮށްލެއްވުމަށް މިރޭ ބޭއްވި ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ ބްރިޖް މަސައްކަތް މިހާރު އެދަނީ ސަރުކާރުން އެ މަސައްކަތް ކުރަން ބޭނުންވި ވަރަށްވުރެ ސްޕީޑް ލަސްކޮށްކަމަށެވެ.

ވަޒީރު ވިދާޅުވީ ބްރިޖް މަސައްކަތްތަކުގެ ތެރެއިން މޫދު އަޑީގައި ކުރަންޖެހޭ ހުރިހާ މަސައްކަތްތަކެއް ނިމިފައިވާކަމަށެވެ. ސުޕަ ސްޓްރަކްޗަރ މަސައްކަތްތައް ކުރިއަށްދާއިރު، ބޭނުންވާ ސްޕީޑްގައި މަސައްކަތް ކުރިއަށް ނުދާކަން މިނިސްޓަރު ތަކުރާރު ކުރެއްވިއެވެ.

ކުރިން އަޅުގަނޑުމެން ކޮންޓްރެކްޓްގައި ފާހަގަކޮށްފައިވާ މުއްދަތަށް އެކަން ހާސިލްވުމަކީ ފަހަރެއްގައި ނުވެދާނެކަމެއް

ވަޒީރު މުއްތަލިބް ވިދާޅުވިއެވެ.

ވަޒީރު ވިދާޅުވީ ބްރިޖް މަސައްކަތްތަކާ ގުޅޭގޮތުން މާދަމާ އިންޑިއާ ސަފީރާއެކު ބައްދަލުވުމެއް ބޭއްވުމަށް ތާވަލްކޮށްފައިވާކަމަށެވެ. މަސައްކަތްކުރަމުންދަނީ ސަރުކާރުން ވެދެވެން އޮތް އެހީތެރިކަމެއް ދީގެން ވީހާވެސް އަވަހަކަށް ޕްރޮޖެކްޓްގެ މަސައްކަތް ކުރިއަށްގެންދަންކަން ފާހަގަކުރެއްވިއެވެ. ކޮންޓްރެކްޓަރަކީ މިފަދަ މަޝްރޫޢުއެއް ކުރިއަށްގެންދަން އައު ކުންފުންޏެއްކަން ފާހަގަކުރައްވަމުން ވަޒީރު ވިދާޅުވީ އެކަމުގެ ސަބަބުންވެސް ވަރަށްބޮޑެތި ދަތިތަކާ ކުރިމަތިލާންޖެހޭކަމަށެވެ.

އިންޑިއާގެ އެފްކޮންސް އިންފްރާސްޓްރަކްޗާ އިން ކުރިއަށް ގެންދާ މި މަޝްރޫޢަކީ 7 ބިލިއަން ރުފިޔާގެ ބޮޑު މަޝްރޫޢެކެވެ. މި މަޝްރޫއުގެ ދަށުން 6.7 ކިލޯމީޓަރުގެ ދިގު ބްރިޖަކާއި ކޯސްވޭ ލިންކެއް އަޅާނެއެވެ. އެގޮތުން ދެރަށް ދޭތެރޭ ކަނޑުގައި އަޅާ މައި ބްރިޖްތަކުގައި 140 މީޓަރު ހުންނާނެ ކަމަށް އެފްކޮންސް އިން ބުނެއެވެ.

ކުރީ ސަރުކާރުން ފެށި މަޝްރޫއު, ކުރީން ކަނޑައެޅި އެއްވެސް ތާރީޚަކަށް ނިންމާލެވޭ ގޮތެއް ނުވި އެވެ.