ހަތަރު ދުވަހުގެ މެދުކެނޑުމަކަށްފަހު އީރާނުން ބޭރަށް ފޯނުކޯލު ކުރެވޭގޮތް ހަދައިފި

އީރާނުގައި ކުރިއަށްދާ މުޒާހަރާތަކާ ގުޅިގެން މުވާސަލާތީ ޚިދުމަތްތައް ކަނޑާލާފައި އޮތުމަށްފަހު، ހަތަރު ދުވަސް ފަހުން, މިއަދު، ބޭރު ގައުމުތަކަށް ފޯނުކޯލު ކުރެވޭގޮތް ހަދައިފިއެވެ.

މި މުޒާހަރާތަކަކީ އީރާނުގެ އެކި ކަންކޮޅުތަކުގައި ކުރިއަށްދާ މުޒާހަރާތަކެއް ކަމަށްވާއިރު، މި ހަމަނުޖެހުންތަކުގައި މިހާތަނަށް މަދުވެގެން 646 މީހުން މަރުވެފައިވާ ރިޕޯޓްތައް ބުނެއެވެ.

އޭސޯސިއޭޓެޑް ޕްރެސް (އޭޕީ) އިން ބުނި ގޮތުގައި ތެހެރާންގައި ތިބި ބައެއް މީހުންނަށް އެ އެޖެންސީގެ ނޫސްވެރިންނަށް ގުޅިފައިވެއެވެ. ނަމަވެސް ޔޫއޭއީގެ ދުބާއީގައި ހުންނަ އޭޕީގެ ބިއުރޯއިން އެ ނަންބަރުތަކަށް އަލުން ގުޅޭގޮތެއް ނުވިއެވެ.

ރިޕޯޓްތައް ބުނާ ގޮތުގައި ފޯނު ކޯލުގެ ޚިދުމަތް ބައެއް ފަރާތްތަކަށް ލިބުނު ނަމަވެސް، އެސްއެމްއެސްގެ ޚިދުމަތް އަދިވެސް އޮތީ މެދުކެނޑިފައެވެ. އަދި އިންޓަނެޓް ބޭނުންކުރެވެނީ ހަމައެކަނި ސަރުކާރުން ހުއްދަދީފައިވާ ލޯކަލް ވެބްސައިޓްތަކަށް އެކަންޏެވެ.

ދުނިޔެއާ މުވާސަލާތީ ގުޅުން ކަނޑާލާފައި އޮތް ހަތަރު ދުވަހުގެ ތެރޭގައި ތެހެރާންގެ މަގުތަކުގެ ހާލަތު ހުރިގޮތް ބަޔާންކުރަމުން މަންޒަރު ދުށް މީހުން ބުނީ، ސަލާމަތީ ބާރުތަކުން މުޅި ސިޓީ ވަރުގަދައަށް ބަލަހައްޓަމުންދާ ކަމަށެވެ.

އެގޮތުން ހެލްމެޓާއި ހަށިގަނޑު ރައްކާތެރިކުރާ އާމަރާއި، އައްޑަނަ އަދި ކަރުނަގޭސް ބަޑި ހިފައިގެން ތިބި އެންޓި-ރަޔަޓް ފުލުހުން ބޮޑެތި ކަންމަތިތަކުގައި ފޯރިމަރަމުންދާ ކަމަށް އެމީހުން ބުންޏެވެ. މީގެ އިތުރުން ހަތިޔާރާއެކު އުޅޭ ބަސީޖް ފޯސްގެ މެންބަރުންނާއި، އާންމު ހެދުމުގައި ތިބި ސަލާމަތީ އޮފިޝަލުންވެސް އާންމު ތަންތަނުގައި ހަރަކާތްތެރިވަމުންދާ ކަމަށް މައުލޫމާތު ލިބެއެވެ.

މި ހަމަނުޖެހުންތަކުގެ ތެރޭގައި ބައެއް ބޭންކުތަކާއި ސަރުކާރުގެ އޮފީސްތަކުގައި ހުޅުޖަހާފައިވާއިރު، އޭޓީއެމް މެޝިންތަކަށް ބޮޑެތި ގެއްލުންތަކެއް ދީފައިވާ ކަމަށްވެސް ރިޕޯޓްތައް ބުނެއެވެ. އަދި އިންޓަނެޓްގެ ޚިދުމަތް މެދުކެނޑިފައި އޮތުމުގެ ސަބަބުން ބޭންކުތަކުގެ މުއާމަލާތްތައް ފުރިހަމަކުރުމުގައި ބޮޑެތި ގޮންޖެހުންތަކެއް ކުރިމަތިވެފައިވާ ކަމަށް މަންޒަރު ދުށް މީހުން ކިޔައިދިނެވެ.