މިލަދޫގެ ތަރައްޤިއަށް ކުރަންހުރި ގިނަ މަސައްކަތްތަކެއް މިއަހަރު ފެށޭނެ: ރައީސް

ނ. މިލަދޫގެ ތަރައްޤިއަށް ކުރަންހުރި ގިނަ މަސައްކަތްތަކެއް މިއަހަރު ފެށިގެންދާނެ ކަމަށް ރައިސުލް ޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރާއްޖޭގެ އުތުރުގެ 4 އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ނ.މިލަދޫއަށް ވަޑައިގެން އެރަށުގެ ރައްޔިތުންނާ ބައްދަލުކޮށް ވާހަކަފުޅު ދައްކަވަމުން އެމަނކުފާނު ވިދާޅުވީ މިދިޔަ ތިން މަހެއްހާ ދުވަހު ސަރުކާރުން ބަލަމުން ދިޔައީ ރަށްރަށުގެ ތަރައްޤީއަށް ކުރަންހުރި ހުރިހާ މަސައްކަތެއް ކުރެވޭނެ ފަދަ އިޤްތިޞާދެއް ބިނާކުރުމުގެ މަސައްކަތް ކަމަށެވެ.

ރައީސް ވިދާޅުވީ ޤައުމުގެ އިޤްތިޞާދު ދަނީ ރަނގަޅު މިޞްރާބަށް ކަމަށާއި، ކުރިއަށް އޮތް ދުވަސްތަކުގައި ރަށްރަށުގައި ކުރަންހުރި ގިނަ މަސައްކަތްތައް ކުރެވޭނެ ފަދަގޮތަކަށް ރާއްޖޭގެ އާމްދަނީވެސް އިތުރުވެގެން ދާނެކަމަށެވެ.

"އެހެންވީމާ، މި ދެންނެވި ގޮތަށް، މަގު ހެދުމާއި، ރަށް ގިރުމުގެ މައްސަލަ ޙައްލު ކުރުމާއި، ބޯހިޔާވަހިކަމާއި، ސްކޫލްގެ ފެންވަރު ރަނގަޅު ކުރުމާއި، ޞިއްޙީ ނިޒާމު ވަރުގަދަ ކުރުމާއި، ކުޅިވަރު ކުޅުމުގެ އެކިކަހަލަ ވަސީލަތްތައް ޤާއިމުކުރުން ފަދަ، މި ހުރިހާ ކަމަކަށް އިރާދަކުރެއްވިއްޔާ ކުރިއަށް މިއޮތް ދުވަސްތަކުގައި، މި އަހަރުގެ ތެރޭގައި ހަމަ ގިނަ މަސައްކަތްތަކެއް އަޅުގަނޑުމެން ފަށައި، އިރާދަކުރެއްވިއްޔާ ނިމެމުންދާނެ." ރައީސުލްޖުމުހޫރިއްޔާ ޑރ.މުހައްމަދު މުއިއްޒު ވިދާޅުވިއެވެ.

މިލަދޫގެ ތަރައްޤީއަށް ކުރަންހުރި ކަންކަމުގައި މިލަދޫގެ ރައްޔިތުން އެދި ވަޑައިގަންވާ ނަތީޖާއެއް ސަރުކާރުން ނެރެދެއްވާނެކަމުގެ ޔަޤީންކަން ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވަނީ މި ބައްދަލުވުމުގައި މިލަދޫގެ ރައްޔިތުންނަށް ދެއްވާފައެވެ.

ކުރިއަށް އޮތް ރައްޔިތުންގެ މަޖިލިސް އިންތިހާބުގައި އެއްވެސް ރިސްކެއް ނަގަން ނުހަދާ ރައްޔިތުންގެ ވިންދާ އެއްގޮތަށް ސަރުކާރުން ކުރަންހުރި ކަންކަމުގައި އެއްބާރުލުން ދޭނެ ކެންޑިޑޭޓަކު ހޮވައިދެއްވުމަށް ރައީސް ޑރ.މުހައްމަދު މުއިއްޒު ވަނީ މިލަދޫ ރައްޔިތުންގެ ކިބައިންވެސް އެދި ވަޑައިގެންންފައެވެ.