ބޭރުގައި ކިޔަވަން އަދާލަތު ޕާޓީން 20 ސްކޮލާޝިޕް ދެނީ، މާލީ ގޮތުން ދަށް މީހުންނަށް އިސްކަން

މެލޭޝިއާގެ ޔުނިވަރސިޓީއެއް ކަމުގައިވާ އަލް-ބުޚާރީ އިންޓަރނޭޝަނަލް ޔުނިވަރސިޓީގެ ފަރާތުން އަދާލަތު ޕާޓީއަށް 20 ސްކޮލަޝިޕްގެ ފުރުސަތު ލިބިފައިވާތީ އެ ސްކޮލަޝިޕްތަކަށް ކުރިމަތިލާން ބޭނުންވާ ފަރާތަކަށް ހުޅުވާލައިފި އެވެ.

އެ ޕާޓީން ބުނީ މި ސްކޮލަޝިޕް ތަކުގެ ތެރެއިން 26 އޮކްޓޫބަރު ގައި ފައްޓާ އިންޓޭކުގައި ބައިވެރިވުމުގެ ފުރުސަތު ލިބިގެންދާނެ ކަމަަށެވެ. މިގޮތުން، ތިން ފެކަލްޓީއަކުން 3 އަހަރު ދުވަހުގެ ޑިގްރީއަކަށް ކުރިމަތިލުމުގެ ފުރުސަތު ލިބިގެންދާނެ ކަމަށް ބުންޏެވެ. އެއީ؛

* ސްކޫލް އޮފް ބިޒްނަސް – ވިޔަފާރި (ބިޒްނަސް) އާ ގުޅޭ ދާއިރާތަކުގެ ޑިގްރީ

* ސްކޫލު އޮފް އެޑިއުކޭޝަން އެންޑް ހިއުމަން ސައިންސް – ތަޢުލީމު، އިޖުތިމާޢީ އަދި އިންސާނީ ސައިންސް އާ ގުޅޭ ދާއިރާތައް

* ސްކޫލު އޮފް ކޮމްޕިއުޓިންގް – ކޮމްޕިއުޓަރ ސައިންސް، ޑާޓާ ސައިންސް، އިންފޯމޭޝަން ޓެކްނޮލޮޖީ އަދި ސައިބަރ ސެކިއުރިޓީ

މި ސްކޮލަޝިޕަށް ކުރިމަތިލެވެނީ ވަކި ޝަރުތުތަކެއް ހަމަވާނަމަ އެވެ.

1- 17 އަހަރާއި 23 އަހަރާއި ދެމެދު

2-  ކައިވެނި ކޮށްފައިވާ މީހަކަށް ނުވުން

3- މާލީ ޙާލަތަށް ރިޢާއަތްކޮށް، މާލީ ފުދުންތެރިކަން ދަށް ކުދިންނަށް އިސްކަން ދޭނެ

4- ގްރޭޑް 12 ނުވަތަ އެއާ އެއްފެންވަރުގެ ސަނަދެއް ހާސިލުކޮށްފައިވުން

5- ދަށްވެގެން ސީޖީޕީއޭ 2.8 ގައި ހިފެހެއްޓުން (ކޮމްޕިއުޓާ ސައިންސް ނުވަތަ ޑާޓާ ސައިންސް ނަމަ، ދަށްވެގެން  ސީޖީޕީއޭ 3.0 ހިފެހެއްޓުން)

6. މިވަގުތު އެއްވެސް މަތީ ތަޢުލީމު ދޭ ތަނެއްގައި ކިޔަމުންދާ ފަރާތެއް ކަމުގައި ނުވުން

7. އެއްވެސް އެއްބަޑު، އެއްބަފާ ނުވަތު އެއްބަނޑު އެއްބަފާ މީހަކަށް މި ޔުނިވާސިޓީގެ ފައުންޑޭޝަންގެ ފަރާތުން އެހީ ލިބިފައި ނުވުން

8. IELTS / TOEFL / TOEFL iBT / PTE  ހާސިލުކޮށްފައިވުން

މި ސްކޮލަޝިޕްގެ ތެރެއިން ވިސާ ފީ އާއި މެލޭޝިޔާއަށް ދަތުރު ކުރުމުގެ ހަރަދާއި ޔުނިވަރސިޓީއަށް ދައްކަންޖެހޭ ސެކިއުރިޓީ ޑިޕޮޒިޓް (1200 ރިންގިޓު) ފިޔަވާ ހުރިހާ ހަރަދެއް ހަމަޖެހިގެންދާނެ ކަމަށް އަދާލަތުން ބުންޏެވެ.

މި ސްކޮލަޝިޕަށް ކުރިމަތިލުމަށް ޝައުޤުވެރިވާ ފަރާތްތަކުން، އައިޑީ ކާޑު ކޮޕީ، ސީވީ އަދ އެޓެސްކޮށްފައިވާ ތަޢުލީމީ ސެޓްފިކެޓްތަކާއު އެ ފަރާތެއްގެ ބެލެނިވެރިންނަށް ލިބޭ އާމްދަނީ ކަށަވަރުކޮށްދޭ ލިޔުންތައް (ސެލެރީ ސްލިޕް) ނުވަތަ ބެލެނިވެރިންނަށް ސަރުކާރުގެ އެހީ ލިބޭ ފަރާތްތެއްކަން ކަށަވަރު ކުރެވޭނެ ލިޔުމެއް [email protected] އަށް 25 ޖުލައި ގެ ކުރިން އީމެއިލް ކުރުމަަށް ވަނީ އެދިފަ އެވެ.