ބ. އޭދަފުށީގައި 1،000 ހައުސިންގް ޔުނިޓް އަޅަން ސިނޯހައިޑްރޯ ކޯޕަރޭޝަން ލިމިޓެޑާ ހަވާލުކޮށްފި

ބ. އޭދަފުށީގައި 1،000 ހައުސިންގް ޔުނިޓް އެޅުމުގެ މަސައްކަތް، ޢިމާރާތްކުރުމާއި ބިނާރާ ބެހޭ ވުޒާރާއިން ސިނޯހައިޑްރޯ ކޯޕަރޭޝަން ލިމިޓެޑާ ހަވާލުކުރައްވައިފިއެވެ.

ޢިމާރާތްކުރުމާއި ބިނާރާ ބެހޭ ވުޒާރާއިން ހާމަކުރެއްވި ގޮތުގައި މިއަދު އެ ވުޒާރާއާއި ސިނޯހައިޑްރޯ ކޯޕަރޭޝަނުން ވަނީ ފަހުމުނާމާއެއްގައި ސޮއި ކުރައްވާފައެވެ. ޢިމާރާތްކުރުމާއި ބިނާރާ ބެހޭ ވުޒާރާއިން މި ފަހުމު ނާމާގައި ސޮއި ކުރެއްވީ ވަޒީރު ޑރ. އަބްދުﷲ މުއްތަލިބުއެވެ.

ބ. އޭދަފުށީގައި ހައުސިންގް ޔުނިޓް ޢިމާރާތްކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެކެވެ. އެގޮތުން މި މަޝްރޫޢު ވަރަށް އަވަހަށް ފަށްޓަވާނެކަމަށް، މިދިޔަ މަހު ބޭއްވި ވިހިވަނަ ރައްޔިތުންގެ މަޖިލީހުގެ އިންތިޚާބުގައި އޭދަފުށީ ދާއިރާއަށް ވާދަ ކުރެއްވި ޕީޕީއެމް/ޕީއެންސީ ގެ ކެނޑިޑޭޓް އަޙްމަދު ސަލީމް (ރެޑުވޭވް ސަލީމް) ގެ ކެމްޕެއިން ޖަލްސާއެއްގައި ވާހަކަ ދައްކަވަމުން ރައީސް ޑރ. މުޢިއްޒު ވަނީ ވިދާޅުވެފައެވެ. ޖަލްސާގައި ވާހަކަ ދައްކަވަމުން އެމަނިކުފާނު ވަނީ ހައުސިން ޔުނިޓުގެ ފައިދާ އޭދަފުށީގެ އިތުރުން، މުޅި އަތޮޅަށް ވެސް ކުރާނެ ކަމަށާއި، އަދި އެ މަޝްރޫއުގެ ސަބަބުން އެ ދާއިރާއަށް ކުރިމަތިވެފައިވާ ބޯހިޔާވަހިކަމުގެ ދަތިކަމަށް ހައްލެއް ލިިބިގެންދާނެކަން ވެސް ފާހަގަކުރައްވާފައެވެ.

މިއަދު ޢިމާރާތްކުރުމާއި ބިނާރާ ބެހޭ ވުޒާރާއިން މި މަސައްކަތް ހަވާލުކުރުމަށް ފަހުމުނާމާގައި ސޮއިކުރެއްވިކަން ހާމަ ކުރެއްވި ނަމަވެސް، މި މަޝްރޫޢާ ގުޅޭ އިތުރު މައުލޫމާތެއް ހާމަކުރައްވާފައެއް ނުވެއެވެ.