އެކި މަރުޙަލާތަކުގައި 19 އެއާޕޯޓެއްގެ މަސައްކަތް ކުރިއަށް އެބަދޭ: މުބީން

ރާއްޖޭގައި އެކި މަރުހަލާތަކުގައި 19 އެއާޕޯޓެއްގެ މަސައްކަތް ކުރިއަށްދާކަމަށް ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރުސީއެލް) ގެ މެނޭޖިންގ ޑިރެކްޓަރ އަހުމަދު މުބީން ވިދާޅުވެއްޖެއެވެ.

މުބީން މިހެން ވިދާޅުވެފައިވަނީ ރައީސުލްޖުމްހޫރިއްޔާ ފ. އަތޮޅަށް ކުރެއްވި ދަތުރުފުޅުގައި ފީއައްޔަށް ވަޑައިގެން އެރަށުގެ ރައްޔިތުންނާއެކު ބޭއްވި ބައްދަލުކުރެއްވުމުގައި ވާހަކަދައްކަވަމުންނެވެ.

މުބީން ވިދާޅުވީ އިޤްތިސާދީ ގޮތުން މިހާރު ރާއްޖެ އޮތް ޙާލަތުން އެހެން ހާލަތަކަށް ގެންދިއުމަށްޓަކައި ވަރަށް ގިނަގުނަ މަސައްކަތްތަކެއް އެބަހުރިކަމަށެވެ. އަދި އޭގެ ތެރެއިން ރާއްޖޭގެ ރައްޔިތުންނަށް އޭގެ ނަފާ އެންމެ ބޮޑަށް ކުރާނެ މަޝްރޫޢުތަކަކީ އެއާޕޯޓުތަކުގެ މަޝްރޫޢުތައްކަމަށެވެ.

"އަޅުގަނޑާ އެންމެ ބޮޑަށް ހަވާލުކުރެވިފަ އޮތް މަސްޢޫލިއްޔަތު ކަމަށްވާ ރާޢްޖޭގެ އެކިއެކި ހިސާބުތަކުގައި އަޅުގަނޑުމެންގެ ކުންފުނީގެ ދަށުގަ މިހުރި އެއާޕޯޓުތައް ރަނގަޅަށް ހަރުދަނާކުރުމުގެ ތެރޭގަ ދިވެހިރާއްޖޭގެ ވައިގެމަގުން ރާއްޖޭގެ އެއް ރަށް އަނެއް ރަށަށް މުޅި ރާއްޖެ ގުޅާލުމާ އެއްކޮށް ރާއްޖޭގެ ޓޫރިޒަމް ސެކްޓަރ މިހާރު މި ބަދަލުވެގެން އަންނަ އައުމަށް ރާއްޖެއަށް މިއަންނަ ފަތުރުވެރިންގެ ޢަދަދު އެއް ދުވަހުން އަނެއް ދުވަހަށް އިތުރުވެގެން މިއަންނަ އައުމުގެ އާޚިރު ނަތީޖާއަކަށް ވެގެން އަންނާނީ މުޅި ރާއްޖޭގެ އެކި ކަންކޮޅުތަކަށް އޭގެ ނަފާ ރައްޔިތުންގެ ޖީބާ ހަމައަށް ފޯރިގެން އައުން"

މުބީން ވިދާޅުވިއެވެ.

މިހާރުވެސް ރާއްޖޭގައި 19 އެއާޕޯޓެއްގެ މަސައްކަތް ކުރިއަށް ދާ ކަމަށާއި، ދައުރުގެ މިހާ ކުރީކޮޅު މިފަދަ ބޮޑެތި މަޝްރޫއުތަކުގެ މަސައްކަތް ކުރިއަށް ދަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ރައްޔިތުން އެދޭ މިންވަރަށް ކަންތައްތައް ފަހިކޮށްދިނުމަށް ދެއްވާ އިސްކަމުގެ ސަބަބުން ކަމަށް މުބީން ވިދާޅުވިއެވެ.

މުބީން އިތުރަށް ވިދާޅުވީ ފީއައްޔަކީ ކުޅިވަރުގެ ދާއިރާއިން ފާހަގަކޮށްލެވޭ ރަށެއްކަމަށާ، މިރަށުގައި ކުޅިވަރުގެ އެކިއެކި އިންތިޒާމުތައް އެންމެ ރަނގަޅަށް ތަރުތީބުކުރެވިފައި ނެތްކަމަށެވެ. އަދި އެ އިންތިޒާމުތައް ހަމަޖެއްސުމަށް މަސައްކަތް ކުރާނެކަމަށެވެ.

މީގެ އިތުރުން މިސަރުކާރުން ކުރަމުން އަންނަ، ކައުންސިލްތައް ބާރުވެރިކުރުވުމުގެ މަސައްކަތްތަކަކީ ރައްޔިތުންގެ މަސްލަހަތު އިސްކުރައްވައިގެން، ރައީސް ޑރ. މުޙައްމަދު މުޢިއްޒު ކުރައްވަމުން އަންނަ މަސައްކަތެއް ކަމަށްވެސް މުބީން ވިދާޅުވިއެވެ.